1 Ayesu bhakajemeka kulongela nabho kwa kulandanakia, "Amundu bhamo bhakalema ng'onda gwa mzabibu, akachenga likukumba kulitindiila, na pakati jabhe akahemba lihembo mahali pa kuminyila zabibu, bhakachenga chilendo cha kulendelela. Ngapena bhakagujaika nng'onda gonogwe gwa mizabibu kwa akaalemi, na bhakajaula ulendo." 2 Machobha ga kuhuna pagakahika, akaatuma abhanda bhabhe bha bhenibhala akaalemi, ili kupetula chehemu ya mahuno ga ng'onda gwakwe kwa bhenabho akaalemi. 3 Bhenibhala akaalemi bhenabho bhakaakamula, bhakaampota na bhakaabhenga pangali kwaapekea chilebhe. 4 Bhakaatuma kabhele abhanda bhangi, bhenabho kabhele bhakampota mmutwe na kwaatendela hikubho ya honi. 5 Ngapena bhakaatuma akaabhanda bhangi bhajingi bhangi bhakaapotanga na bhangi bhakaakomanga. 6 Bhenabho bhakujomolekea, "Bhapakuntopea ligongo habhabha nga mwana jwangu." 7 Nambo bhenabho akaalemi pabhakaalola bhabhikuhika bhakalobholelana, "Jonjoni nga nnekelwa bha nng'onda gongoni bahi twaakome ili nng'onda gubhee gwitu! 8 Henela bhakaakamula, bhakaakoma na kwaajea panja ja gonigola ng'onda gwa mzabibu."

9 Ayesu bhakaakonya, "Akola ng'onda bhapakutenda chiniki? Apakuhika kwaakomanga bhenaangota bhekulema na kugujaika gono ng'onda gwa mizabibu kwa bhandu bhangi. 10 Bholi, mwangachomanga mu Majaandiko ga Annoongo?

‘Liganga libhalikanitinge bhabhachenganga

nangocheni litekubhehe liganga lyammbone kupeta maganga goa ga kuchengela!

11 Hangwana Annoongo nga bhabhatendite chikubho chenje,

na lyene nga lyakangachika muno kwaachitu!’"

12 Akaakolongwa bha akaakung'i, na bhabhajigana Malagilo ga Amusa na akanahota bhakaimanyanga yakubhehe kulandanikia kongoni kukibha ligongo lya bhenaangota. Henela bhakalenganga kwaakamula, nambo bhakagujogopanga nkutuli gwa bhandu bhajingi, ngapena, bhakanneka, bhakajaulanga.

13 Ngapena, akaakolo bhenabho bhakaatuma Mafalisayo teno na chibhoga cha bhandu chichajaangatila Ahelode ili kujaula kwaalenga Ayesu mu genigala gabhalongela. 14 Bhakaajendelela, bhakannobholela, "Bhannyigana, tuimanyi kubhehe mwenga nga amundu bhannongela kweli tu, na wala ngaajogopa amundu bhaobhala. Wala ngalola mamulaka ga amundu kwa kubhee ngapendelea, nambo mwenga mkajigana maha lilobhe lya Annoongo. Bholi, hipaalikwa kulepa kodi kwa akolo bha ku Loma, au ngabha? Tulepe au tukotokulepa?" 15 Nambo Ayesu bhakagumanya ukaandendemundu gwabhenji, na akaakonyanga, "Bholi, kwaniki ntendakulenganga kupala kundangia? Nnetange oti jene mbiha nijilole." 16 Bhakannetelanga jene mbiha, nabhena akaakonyanga, "Kumio na lihina hele nga lya ganaiki?"

Bhakannyangulanga, "Nga lya akolo bha ku Loma."

17 Ngapena Ayesu akaalobholelanga, "Mumpekeange akolo bha ku Loma chichibhi cha akolo bha ku Loma, na mumpekeange Annoongo chichibhii cha Annoongo."

Na bhenaangota bhakakangachanga muno.

18 Ngapena Masadukayo, bhandu yakubhee bhabhalobholanga kwakwa kuyoka, bhakaajendelela Ayesu, kwaakonya, 19 "Bhannyigana, Amusa bhakatulagakia henela, ‘Handa amundu bhawile na kuleka mwikege pangali kubhehe na mwana, bahi anung'una bhabhe hipaalikwa bhannombele bhena nhelwa, ili bhaabhelekee anung'una bhabhe yana.’ 20 Pakibha na akaanung'una saba, bhenibhala akolongwa bhabhenji bhakalombela na bhakajomoka pangali kuleka mwana. 21 Anung'una bha bhele akaalombela bhena nhelwa, na bhena kabhele bhakajomoka pangali kuleka mwana. Ikabhokela henela kwa anung'una bha tatu. 22 Akaanung'una bhoa saba bhakawenganga pangali kulekwa mwana. Na bhenibhla nhelwa bhakajomolekea kujomoka. 23 Henela bahi, lichobha lya kuyokanga bhandu, haikege bhenabho bhapakubhehe bha ganiki? Bhoha saba bhakibha bhatekunnombela." 24 Ayesu bhakajangulanga, "Mwangota nnemwitinge kwa kubhee ngagamanyanga Majaandiko ga Annoongo wala machili ga Annoongo. 25 Bhabhawilinge pabhapakuyokanga ngalombelanga wala kulombelwa, nambo bhapakubhenganga handa akaapangana mahengo bha kunani kulihunde bha Annoongo. 26 Kwa ngani ja kuyoka kwa bhabhawilinge, bholi, mwangachomanga mu chitabu cha Amusa namuna Annoongo chibhakalongela na Amusa kubhoka mu chenichela chitekete chichijaka moto, pabhakalobhola, Annoongo bhakaalobholela Amusa, ‘Nenga nga Annoongo bha Aibulahimu, na Annoongo bha Aisaka na Annoongo bha Ayakobo?’ 27 Bahi, bhena ngabha Annoongo bhabhawilinge, ila nga Annoongo bha bhandu bhamomi. Kwa henela mwangota nnemwitinge muno."

28 Bhamo bha bhabhajigana Malagilo ga Amusa bhakaika, bhakajoa bhabhi kutaukananga kwabhenji. Pabhakabhona kubhehe Ayesu bhakaajangulanga maha, na bhena bhakaakonya, "Mu amuli yoha nga niki jijibhii ngolongwa?"

29 Ayesu bhakajaangula, "Amuli jijibhii ngolongwa nga jenjeni, ‘Nnyonikiange mwangota bhandu bha ku Isilaeli! Hangwana Annoongo bhitu, nga Hangwana jika jabhe. 30 Mwaapale Hangwana Annoongo bhinu kwa ntima gwinu gwoa, kwa mboomo jinu joa, na kwa malango ginu goa na kwa machili ginu goa.’ 31 Na jabhele nga jenjeni, ‘Mwapale ajinu handa chinchimpala mwabhene.’ Jakwa amuli jengi jijibhii ngolongwa kupunda yenjeni hibhele."

32 Penapo bhenibhala bhabhajigana Malagilo ga Amusa bhakaalobholela Ayesu, "Bhannyigana nnyangwile maha! Kubhee Annoongo nga bhamo wala bhakwa Annoongo bhangi. 33 Mwaapale Annoongo kwa ntima gwinu gwoa na kwa malango ginu goa na kwa machili ginu goa na kwaapala ajinu handa amundu chibhachipala bhene, nga yammbone kupunda kwabhokea Annoongo mbeeko na chadaka."

34 Ayesu pabhakabhona kubhehe bhajangwile kwa malango, bhakaalobholela, "Mwenga mmandikile kujingila mu ukolo gwa Annoongo."

Kubhokela penapo bhakwa amundu bhoabhala bhabhakalenga kabhele kwaakonya Ayesu chilebhe choa chela.

35 Ayesu pabhakibha bhatendakujigana kubhandikila pa Nyuumba ja Annoongo, bhakakonya, "Mboni bhabhajigana Malagilo ga Amusa bhalongelanga kubhehe Kilisito nga mwana jwa Akolo Adaudi? 36 Adaudi bhene bhakaatandaigwa kwa Mboomo ja Annoongo na bhabhi kulobhola,

‘Hangwana akaalobholela Hangwana bhangu,

Ntame upande gwangu gwa kunnelo,

mpaka pambakwachindanga akaapwati bhinu.’"

37 "Adaudi bhene bhaakema Akilisito nga Hangwana. Bahi, ikomboleka bholi Akilisto kubhee mwana jwa Adaudi?"

Nkutuli gwa bhandu bhajingi gukibha gutendakunnyonikia Ayesu kwa kuhangalala. 38 Mu majigano gakwe, Ayesu akalongela, "Mmangange miho na bhabhajigana Malagilo ga Amusa, bhenaangota kupala kutyanga bhakibha bhawalitinge ngobho hitandamao na kuchalimiwa kwa kwaatopea mahali pamakonganilo ga bhandu, 39 kabhele bhenaangota kupala kutama mu hitengu ya nnongi mu nyuumba ya konganilana Bhayahudi na kwaapekea napachi ja kutama mahali pakutopea wakati gwa lichobha likolongwa lya kulyee na kuhangalala. 40 Bhenaangota bhatendakutolanga hilebhe ya akaahelwa kwa machili, kongo bhabhi kuchikopokeanga kujopa majopelo matandamao ili bhabhonekane bhammbone. Bhena bhandu bhapakupatanga hukumu ngolongwa muno."

41 Ngapena Ayesu bhakatama kubhandikila na chikapu cha kubhokea chadaka, pabhatenditakulola namuna bhandu bhajingi chibhatendita kubhoa mbiha na kulekela mu chikapu cha chadaka lya Nyuumba ja Annoongo. Akaakola hilebhe hijingi bhakabhoanga mbiha hijingi. 42 Penapo bhakaika haikege bhamo haocho, bhakabhoa senti hibhele ya hipande ya mbiya. 43 Ayesu bhakaakemanga bhanapunji bhabhe, na kwaalobholelanga, "Kweli ndendakunnobholelanga, haikege abhabha nhelwa bhabhoite hijingi kupeta bhangi bhoa. 44 Bhandu bhoa bhabhoitinge hilebhe yabhenji hiijonjokike, nambo nhelwa habhabha haocho bhabhoite hilebhe yoha yakwajangatila mu umomi gwabhe."