1 Ayesu pabhakibha bhatendakubhoka pa Nyuumba ja Annoongo, anapunji bhabhe bhamo bhakaalobholela, "Bhannyigana, nnole maganga gangani makolongwa na nyumba yenjeni chiite kualala!"

2 Ngapena Ayesu bhakajaangula, "Bholi, ntendakangacha heye nyuumba ngolongwa? Lyakwa hata liganga limo lilipakuhigalila nnani ja liganga lyengi, kila liganga lipakubolewa."

3 Ayesu pabhakibha bhatamite pa litombi lya Mizeituni, bhatendita kulolekagana miho na Nyuumba ja Annoongo, Apetulo na Ayakobo na Ayohana na Aandulea bhakaakonyanga pantemela, 4 "Choonde ntulobholele heye hikubho hipakupiitila lii? Nga hilolelo niki hiipakutulangia kubhee hikubho heyo yoha hibhandikile kupiitila?"

5 Ayesu bhakajemeka kwalobholelanga, "Mmangane miho amundu bhoabhala bhakotokuntembanga. 6 Bhandu bhajingi bhapakuhikanga kupetela lihina lyangu na kulongela unami, ‘Nenga nga Akilisito!’ Bhenaangota bhapakwatembanga bhandu bhajingi. 7 Pampakujoanga ngani ja ngondo na nong'omi nong'omi ya ngondo nkoto kujogopanga. Hikubho heyo hipalikwa kupitila, nambo kujomoka kwakwe nga tangu kuhika. 8 Bhandu bha chilambo chimo bhapakupotana na bhandu bha chilambo chengi, bhandu bha ukolo gongi gupakupotana na bhandu bha ukolo gongi, kupakubhehe na nnendemelo gwa undopi na njala jalikuluta. Hikubho heyo hipakupiitila nga handa kujemeka kwa hibhini ya kuchijogola mwana."

9 "Nambo mwangota mmangange miho. Kwakubhee bhapakumpelekanga kumahakama na kumpotanga mihimbati mu Nyuumba ja konganilana Bhayahudi. Namwangota mpakupelekwanga nnongi ja bhatawala na akaakolo ligongo lyangu, ili mkombolange kwaatangachianga Ngani Jammbone. 10 Ngani Jammbone hipaalikwa kutangachwa pachilambo poha. 11 Bhenaangota pabhapakunkamulanga na kumpelekanga pachebule, nkoto kuganikianga cha kulongela. Nnongelange choachela chimpakupekewa kwa muuda gonogwe. Kwakubhee ngabha mwangota bhampakulongelanga, ila nga Mboomo ja Annoongo. 12 Penapo anung'una bhapakwabhoa anung'una bhabhe bhakomekwe. Atati bhapakwabhoa mwana jwabhe bhakomekwe, na bhana bhapakwapotanga bhapakwagaluka na kwaakomanga akaabhelei bhabhenji. 13 Bhandu bhoa bhapakunchimwanga ligongo ntendakungalanga nenga. Nambo jwaapakuchitimalika mpaka majomolekelo nga jwaapakuokoa."

14 "Pampakubhonanga, ‘Chilebhe chakuhakala Annoongo chibhii mu Nyuumba jabhe.’ Bhandu bhenibhala bhabhabhilinge mu chilambo cha ku Yudea bhabhutukilange kumatombi na mundu jwaachoma bhaimanye. 15 Bhandu bhabhabhile panja ja nyuumba jabhena bhakoto kujiingila mu nyuumba kutola chilebhe. 16 Bhabhabhile kumigonda bhakotokubhujanga kaja kutola ngobho yabhenji. 17 Bhapakulaganga hakaikege bhabhabhilenge na hitumbo na hakaikege bhabhajongeanga mu machobha genago! 18 Munnyopange Annoongo muno hikubho heyo hikotokupiitila machobha ga malili. 19 Kwakubhee mu machobha genago kupakubhee hibhini muno yakubhee gangabhokela kandahi Annoongo pabhakaalakia chilambo na ngapiitila kabhele. 20 Handa Hangwana ngapoongoa machobha genago bhakalamite hopo amundu. Ligongo lya bhabhaahagwile, Hangwana bhagapoongwie machobha genago."

21 "Mu machobha genago, handa amundu bhaannobholilinge, ‘Nnole, Kilisito Akomboi bhaabhi pambani,’ au ‘Bhabhi penipala,’ nkotokunhobhalela. 22 Kwakubhee bhapakutilanga akaalondohi bha umani na bhandu bhabhachikema, ‘Nenga nga Akilisito!’ Bhapakutendanga hilolelo na hilebhe yakangachika, ligongo lya kwatembanga bhabhaagulikwe na Annoongo handa hikombolike. 23 Mmangange miho. Nenga ndekunnobholelanga kila chilebhe chichipakupiitila."

24 "Mu machobha genago, kulaga anakujomwike, lyoobha lipakubhee na lubhendu na lwei ngang'anyima, 25 na ndondwa hipakugwee, na hilebhe yengi ya kunani hipakupukunyika. 26 Bhandu bhapakummona nenga Amwana bha Amundu nibhikuhika mu mahunde kwa machili gajingi na kung'anyima. 27 Mbakwatumanga akaatumichi bha kunani kulihunde bhabhakondange bhabhaaguligwe kubhoka pande yoha ya pachilambo, kubhokela kujemeka hoko mpaka kujemeka kwa chilambo hoko."

28 "Nchijigane heche chikubhoka kubhoka mu nkongo gwa ntini. Nyaambi yakwe pahipakujemeka kuhipuka mahamba, mmanyanga kubhee chiimalupya chibhandikile. 29 Hela hela na mwangota pampakubhonanga hikubho yeniyela hiingannobholelanga gapakuteendeka, muimanyange kubhee nenga Amwana bha Amundu ndebhandikila muno kuhika. 30 Nhobhalelange ndendakunnobholelanga, chibhelei chenjeni ngabhuja kwa Annoongo pangali hikubho yeneyo kubhokela. 31 Kunani kulihunde na chilambo ngapela, nambo malobhe gangu ngapeta ng'o."

32 "Nambo kwa ngani ja lichobha au lisaa lyenelyo bhakwa amundu bhabhaimanya lipakuhika lii, wala akaatumichi bha kunani kulihunde, wala nenga Amwana bha Annoongo, nambo Atati jikajabhe nga bhabhaimanya. 33 Mmangange miho na ncheange, ligongo ngaimanya hipakubhee lii. 34 Ipakubhehe handa amundu bhabhabhoka kaja kongo bhabhikwaalekelanga malagilo habhanda bhabhe, kila jumo kubhokana na lihengo lyabhe, na kwaakulumikia jwaalolekea nniyango kuchea. 35 Ncheange, kwakubhee ngaimanya akola nyuumba bhapakubhuja lii, komboleka ipakubhehe kimuo au kilo ja manane au tuputupu au kundabhi. 36 Ncheange handa bhabhujite kwa kung'ang'anuanga bhakotokunkolelanga ng'olwikinge. 37 Lyenilyela lindendakunnobholelanga mwangota, hela hela ndenda kwaalobholelanga bhandu bhoa. Ncheange!"