1 Gakahigalila machobha gabhele tu tangu kuhika lichobha likolongwa lya Pasaka na lichobha likolongwa lya mikate yangalekelwa chilongo. Akolongwa bha akaakung'i na bhabhajigana malagilo ga Amusa bhakibha bhatendakulolea ndela ja kwaakamula Ayesu kwa chili na kwaakoma. 2 Nambo bhakalobholanga, "Tukotokunkamula muuda gwa lichobha lya Pasaka, kwakubhe bhandu bhakombolanga kulekelanga ukomu."

3 Ayesu pabhakibha konokwe ku Betania kaja kwa Asimoni, bhabhabhii na mambujupuju. Pabhatendita kulyee ndalilo, haikege bhamo bhabhahika na mahuta gaganungila muno muchupa na ga bei ngolongwa, ngapena akajogola chene chuupa na akaakuchulila Ayesu mahuta genago mmutwe. 4 Bhandu teno bhabhakibhanga penapo bhakatumbalanga, na bhakalobholelananga, "Kwa niki bhatendakuhalibhiana mahuta ga bei ngolongwa? 5 Mahuta gangani komboleka gangeuchwa kwa bei ngolongwa muno, na mbiha kwaapekeanga akaahocho!" Bhakaakalipila muno bhena haikege.

6 Nambo Ayesu bhakaalobholelanga, "Munnekange! Kwa niki ntendakunhabhua? Andendile chikubho chammbone. 7 Akaahocho bhabhilinge pamo namwangota machobha goha, na ntendakombolanga kwaajangatilanga helahela chimpalanga. Nambo nenga ngabhee pamo na mwangota machobha goha. 8 Hojo mwikege ateendite chibhakombwile, bhalongolile kugubheka maha mmele tangu kunjika. 9 Ndendakunnobholelanga kweli, poapala padunia Ngani Jammbone jipakutangachwa, chikubho chenecho chibhachitendite bhena haikege chipakongolelwa kwa kwaakombokela bhenabho."

10 Ngapena Ayuda Aisikalioti, bhamo bha bhenibhala bhanapunji komi na bhabhele bha Hangwana Ayesu, akajaula kwa akolongwa bha akaakung'i ili kwaagaluka Ayesu. 11 Akolongwa bha akaakung'i pabhakajoanga ngani yeneyo, bhakaangalalanga na bhakaahaidi kwaapekea mbiha. Penapo Ayuda akajemeka kulolea ndela ja kwaagaluka Ayesu.

12 Kujemeka kwa lichobha likolongwa lya mikate yangalekelwa chilongo, lichobha lya mwana ngondolo jwa lichobha likolongwa lya Pasaka ja kwaachenja, bhanapunji bhabhe bhakaakonya Ayesu, "Bholi, mpala tumpanganikie koji chakulya cha Pasaka?"

13 Ayesu akaatumanga bhanapunji bhabhe bhabhele akaalobholelanga, "Nnyaulange kunnyini, na konokwe mpakongana na analome bhamo bhabhapetwile chibhega cha machi. Munkagulange, 14 mpaka mu nyuumba jibhapakujiingila, nkaaobholele akola nyuumba, bhabhajigana atendakonya, ‘Chibhikoji chumbi changu cha akaageni chimbakulila lichobha likolongwa lya Pasaka pamo na bhanapunji bhangu?’ 15 Na bhena apakwalangianga chumbi cha nnani, chichibhekitwe maha. Ntupanganikiange monomwe."

16 Bhanapunji bhenibhala bhakabhokanga na kujaula kunnyini, na bhenaangota bhakakolelanga kila chilebhe maha handa chibhakalobholelwanga na Ayesu, henela bhakapangananga chaakulya cha Pasaka.

17 Pajiika kimuo, Ayesu pabhakaika pa nyuumba jenijela pamo na bhanapunji bhabhe komi na bhabhele. 18 Pabhakibha bhatenda kulyee, Ayesu bhakalongela, "Kweli ndendakunnobholelanga, bhamo pakati jinunji bhabhalyee pamo na nenga, bhapakung'aluka."

19 Penapo bhanapunji bhabhe bhakajemekanga kuhechukanga, na kila bhamo bhakaakonya Ayesu, "Bholi, nga nenga bhambakung'aluka?"

20 Ayesu bhakaajangulanga, "Nga bhamo pakati ja mwangota komi na bhabhele, bhabhatobhela nkate pamo na nenga mu bakuuli. 21 Kwakubhee nenga Amwana bha Amundu mbakujomoka handa chiijandikwe mu Majaandiko ga Annoongo nnani jangu, nambo, kulaga kupakubhe kwa amundu bhenibhala bhabhakung'aluka nenga Amwana na Amundu! Hikabhee mbaya kwa amundu bhenabho bhangabhelekwa!"

22 Pabhatenditakulyanganga, Ayesu bhakatola nkate, bhakachukulu, bhakagumetula na kwaapekeanga bhanapunji bhabhe, akalobhola, "Ntolange nnlyangange gongoni nga mmele gwangu."

23 Kabhele bhakatola chikombe cha divai, bhakachukulu Annoongo, bhakaapekeanga bhanapunji bhabhe, bhoa bhakaching'welanga chikombe chenecho. 24 Akaalobholelanga, "Jenjeni nga miyai jangu jijijitika ligongo lya bhandu bhajingi. 25 Ndendakunnobholelanga kweli, ngang'wee kabhele divai mpaka lichobha lyalela pambakung'wee kabhele divai jiyono mu ukolo gwa Annoongo."

26 Ngapena bhakajembenga nyeembo ja kwaalumbalila Annoongo. Pabhakajomolanga kujembanga bhakabhokanga kujalua ku litombi lya Mizeituni.

27 Pabhakibhanga nndela Ayesu bhakaalobholelanga bhanapunji bhabhe, "Mwangota mwabhoa mpakubhutukanga na mpakunekanga nenga jika jangu, handa chiijaandikwe mu Majaandiko ga Annoongo, Annoongo bhakalobola,

‘Mbakwapota anchungaji,

na ngondolo hipakupwilinganika.’"

28 "Nambo pambakuyoka, mbakunnongolelanga kujaula ku Galilaya."

29 Ngapena Apetulo bhakaalobholela, "Handa bhangi bhoa bhapakunneka, nambo nenga nganneka!"

30 Ayesu bhakaalobholela, "Ndendakunnobholela kweli, chenje kilo cha leleni, tangu likambaliko lyangajemba pa bhele, mpakungana pa tatu."

31 Nambo Apetulo akapunda kolongela, "Hata handa mbaalikwa kujomoka pamo na mwenga, nganneka ng'o." Na bhenibhala bhanapunji bhoa bhakalobholanga hela hela.

32 Bhakahikanga mahali pakemitwa Getisemane, Ayesu bhakaalobholelanga bhanapunji bhabhe, "Ntamange pambani nenga nyaula oti kwajopa Annoongo." 33 Bhakaatolanga Apetulo na Ayakobo na Ayohana bhakajaulanabho kutali kachoko. Bhakajemeka kuhechuka muno na kulaga, 34 bhakaalobholelanga, "Ndendakuhulala muno muntima gwangu hata kubhandikila na kujomoka. Ntamange pambani na ncheange."

35 Bhakajaula nnongi kachoko, bhakachigwia manguku, kongo bhabhikujopa, "Handa ikombolike ngotokugupetela muuda gongoni gwa hibhini."

36 Bhakalongela, "Atati bhangu, kwaachinu hilebhe yoa hitendakomboleka. Mmokee chikombe chenjeni cha hibhini, nambo ikotokubhehe handa chimbala nenga, na hibhee handa chimpala mwenga."

37 Ngapena bhakabhuja kwa bhenibhala bhanapunji bhatatu, bhakaakolelanga bhagolwikinge. Na bhena Ayesu bhakaakonya Asimoni bhakemitwa Apetulo, "Asimoni, bholi, ng'olwike lugono? Bholi mwangakoombola kuchea hata kwa lichaa limo?" 38 Ngapena bhakaalobholelanga, "Ncheange na kwaajopa Annoongo ili nkotokulengekwa na kutenda mabhou. Mwangota mpalanga kuchitimalianga, nambo mwangota mimele yinunji yangali machili."

39 Ayesu bhakajaula kabhele kwajopa Annoongo bhabhikubhujila malobhe gala gala. 40 Ngapena bhakabhuja kabhele kwa bhanapunji bhabhe, bhakaakolelanga bhagolwikinge kabhele, mio gabhenji gakibha na lugono muno. Na bhenaangota bhangalimanya lya kunnyangula.

41 Pabhakaabhujilanga pa tatu bhakaalobholelanga, "Tangu ng'olwikinge na kupomolela? Nangocheni bahi! Muuda guhikite! Nenga Amwana bha Amundu ngocheni mbakukamulikwa na kupelekwa kwa mabhoko ga bhandu akaabhou. 42 Henela nnyemange, tujendange. Nnolange, bhenibhala bhabhapakung'aluka bhabhandikile kuhika!"

43 Ayesu pabhakibha tangu bhatendakulongela, Ayuda bhamo pakati ja bhenibhala bhanapunji komi na bhabhele, bhakaika. Pamo na nkutuli gwa bhandu bhabhalinge na mapanga na himbonga. Bhenibhala bhandu bhakatumwanga na akolongwa bha akaakung'i, na bhabhajigana malagilo ga Amusa na akanahota. 44 Bahi Ayuda bhenibhala bhabhakaagaluka, bhakaapekeanga hilolelo bhenibhala bhandu kubhee, "Bhenibhala bhambakwachalimia kwaanamatila nga bhenabho. Munkamulange na mumpetulange bhabhii pahi ja kwalolekea."

45 Ayuda pabhakaika, bhakaajendela Ayesu jimo kwa jimo na bhakaalobholela, "Bhannyigana!" Ngapena bhakaachalimia kwa kwanamatila. 46 Bahi bhenibhala bhandu bhakaakamula Ayesu na kwaabheka pahi ja kwaalolekea. 47 Bhamo bha bhenibhala bhabhakibha bhajemitinge penapo pamo na Ayesu bhakaguholomola upanga gwabhe, akaapota abhanda bha akolongwa bha akaakung'i, bhakaaheketa lichikilo. 48 Ngapena Ayesu bhakaalobholelanga, "Bholi, nhikitinge pambani na mapanga na himbonga kungamula, handa nenga nga hapokii? 49 Machobha goha nakibha na mwangota nibhii kujigana pa luhani lwa Nyuumba ja Annoongo, nambo mwangangamulanga. Nambo ngocheni nga hipaalikwa Majaandiko ga Annoongo gakweele."

50 Penapo bhanapunji bhabhe bhoha bhakanneka na bhakabhutukanga.

51 Pakibha na nkakombo bhamo bhabhakibha bhatendakunkagula Ayesu bhakibha bhawaalite shuka. Na bhenaangota bhakalenga kwaakamula. 52 Nambo bhenabho bhakaapokonyokanga, bhakaalekelanga shuka na bhakabhutuka pangali kuwala ngobho.

53 Bahi bhakampeleka Ayesu kwa akung'i akolongwa, na akaalongoi bha akaakung'i bhoa, akanahota na bhabhajigana malagilo ga Amusa bhakibhanga bhakonganike. 54 Apetulo bhakaakagula Ayesu kwa kutali, bhakajiingila nkati ja luhani lwa akung'i akolongwa. Akatama pamo na alendei bhabhikujota moto. 55 Akaalongwa bha akaakung'i pamo na Chebule bhakalongelanga ngani ya umani kwa Ayesu ili bhakombolange kwaakoma, nambo malobhe gabhenji gangalandana.

56 Bhandu bhajingi bhakalongelanga ngani ya umani kwa Ayesu, namno malobhe gabhenji gangalandana.

57 Ngapena bhangi bhakajemanga bhakalongelanga malobhe ga unami kwa Ayesu bhabhikulobholanga, 58 "Twakaajoa habha amundu bhabhikulongela, ‘Mbakuhalibiana Nyuumba ja Annoongo jenjeni lilyangachengwa na bhandu kwa mabhoko, na kwa machobha gatatu mbakuchenga jengi jangachengwa na bhandu.’" 59 Nambo hata henela, malobhe gabhenji ga umani gwangalandana.

60 Bahi akung'i akolongwa bhakajema pakati ja bhandu bhakaakonya Ayesu, "Bholi, ngajaangula chilebhe? Bholi, ngabhona kubhee habha bhandu bhoha bhalongelanga malobhe ga kunhukumula mwenga?"

61 Nambo Ayesu bhakatama jii, bhangalongela hata lilobhe limo. Akung'i akolongwa akaakonya kabhele, "Bholi, mwenga nga Kilisito, Amwana bha Annoongo bhabhalumbalilwa?"

62 Ayesu bhakajaangula, "Eloo, nga nenga, kabhele, mpakumwonanga nenga Amwana bha Amundu ndamite upande gwa kunnelo kwa bhenibhala Hangwana Annoongo akola machili, nibhikuika mu mahunde ga kunani kulihunde."

63 Penapo akung'i akolongwa bhakapapula ngobho jabhe kulangia lilaka, bhakalobhola, "Bholi, Tulolee machahidi kabhele bha niki! 64 Ntekujohanga mwaachinabhene chibhatekwaaponja Annoongo. Mwangota mmonanga bholi?"

Chebule joha jikanhukumula kubhee bhapaalikwa kujomoka.

65 Bahi pakati jabheni bhakajemakanga kwahunila mata, bhakantabha chitambaa kumio, bhakampotanga na kwaalobholela, "Nnondole nga ganiki bhabhampotite!" Hata akaalendei bhakantola, bhakampota mapalamanda.

66 Apetulo pabhakibha tangu bhabhii mu luhani, haikege bhamo antumichi bha akung'i akolongwa bhakahika. 67 Pabhakammona Apetulo bhabhikujota moto, bhakapia miho, bhakaalobholela, "Hela hela na mwenga mwakibha pamo na Ayesu bha ku Nazaleti."

68 Nambo Apetulo bhakakana, "Ngammanya, na wala ngalimanya linnongela." Ngapena Apetulo bhakabhoka bhakajaula panja ja luhani. Penapo likambaliko likajemba.

69 Bhenibhala antumichi haikege pabhakammona Apetulo mahali penipala, bhakajemeka kwaalobholelanga bhandu bhabhakajemanga penapo, "Amundu habha nga bhamo bhabhenji." 70 Nambo Apetulo bhakakana kabhele.

Nnongi kachoko, bhandu bhabhakajemanga penapo bhakaalobholela Apetulo, "Nga kweli mwenga nga bhamo bhabhenji, kwakubhehe mwenga nga amundu bha ku Galilaya."

71 Nambo Apetulo bhakajemeka kuchilaani na kuchilapila bhabhikulobhola, "Nenga ngammanya amundu bhenabho bhannongelanga ngani yabhe."

72 Popopo likambaliko likajemba pa bhele, ngapena Apetulo bhakakombokela namuna chibhakalobholelwa na Ayesu, "Tangu likambaliko kujemba pa bhele, mpakungana pa tatu." Apetulo bhakaengeleka ntima, bhakaguta muno.