1 Machobha genago, lilubhalo likolongwa lya bhandu likakondekana kabhele, na bhakibhangahopo na chaakulya. Bahi, Ayesu akaakemanga bhakanapunji bhabhe, akaalobholelanga, 2 "Ndendakwaakolela kiha habha bhandu ligongo bhabhilinge na nenga kwa machobha gatatu, na bhabhilingehopo na chakulya. 3 Handa naalekitinge bhajaulange kwaachabhenji kongo bhabhii na njala bhapakuhindukanga nndela, ligongo pakati jabhenji bhabhilinge bhandu bhabhabhokitinge kutali." 4 Bhanapunji bhabhe bhakaakonya, "Pambani palulemba chipakupatikana koo chaakulya cha kwaajukutianga bhandu habha bhoa?"

5 Ayesu bhakaakonyanga, "Mmilinge na mikate jilengwa?"

Bhakannyangula, "Tubhii na mikate saba."

6 Bahi, akaalobholelanga bhandu bhatamange pahi. Bhakaitola jenijela mikate saba, akachukulu Annoongo, akajimetula, bhakaapekeanga akanapunji bhabhe bhabhametulile bhandu, na bhenaangota bhakaametulila. 7 Kabhele pakibha na homba hichoko kachoko. Ayesu akaachukulu Annoongo, akaalobholelanga bhanapunji bhabhe bhaabhaganakie bhandu. 8 Bhandu bhakalyenganga, bhakajukutanga. Bhanapunji bhabhe bhakajolanga upolo ya mikate na bhakatweleanga hikapo saba. 9 Bhandu bhabhakalyenganga bhakibhanga bhandu handa elupu nchenche. Ayesu bhakaatabhukanga bhandu bhajaulange kwaachabhenji, 10 na popopo Ayesu bhakajingila mu ntumbwi pamo na bhanapunji bhabhe, bhakajaula chilambo cha ku Dalimanuta.

11 Mafalisayo bhakahikanga, bhakajemekanga kulongelanabho na Ayesu. Kwa kwaajiga, bhakannyopa bhatende hilolelo kulangia kubhee bhatumitwe na Annoongo. 12 Ayesu bhakeuchuka muntima gwakwe, akalobhola, "Kwa niki chibhelei chenjeni chipala kulangiwa hilolelo? Kweli ndendakunnobholelanga, chibhelei chenjeni chipakulangiwahopo chilolelo choachela."

13 Ayesu bhakaalekanga Mafalisayo, bhakakwela kabhele mu ntumbwi pamo na bhanapunji bhabhe, na bhakajomboka kuntundu ja litanda.

14 Bhanapunji bhabhe bhakalibhalilanga kupetula mikate, bhakibhanga na nkate gumo mu ntumbwi. 15 Ayesu bh akaakelebhuanga, "Mmangange miho! Ntamange kutali na chilongo cha Mafalisayo na chilongo cha Ahelode." 16 Bhanapunji bhabhe bhakajemekanga kongolelana akaachibhenenji, "Bhalongela henela kwa kubhehe twaangali mikate." 17 Ayesu akagamanya genego, bhakaalobholelananga, "Kwaniki ntendakutaukananga ligongo mwangali mikate? Bholi, tangu mwangaimanya, wala mwangaelewanga? Bholi, mitima jinunji tangu jitekulimba? 18 Bholi, mmilinge na miho nambo ngalolanga? Mmilinge na machikilo nambo ngajoanga? Bholi, ngakombokelanga, 19 penipala panakajimetula jeniijee mikate nhano na kwapekeanga bhandu elufu nhano, nkakondekana hikapu ilengwa ya upolo?"

Bhakanyaangula, "Komi na hibhele."

20 "Na panakajimetula jenijee mikate saba na kwaapekeanga bhandu elupu ncheche, nkakondekana hikapu ilengwa ya upolo?"

Bhakanyaangula, "Hikapo saba."

21 Ngapena bhakaalobholelanga, "Bholi, tangu mwangaimanyanga?"

22 Ayesu na bhanapunji bhabhe bhakahikanga ku Betisaida. Konokwe bhandu bhakannetela amundu bhangalola, bhakaapembelela bhaakwae ili bhaalamie. 23 Ayesu bhakaakamula bhenabho bhangalola lubhoko, bhakaapeleka panja ja chilambo. Akaahunila mata mmio gabhe, akaabhekela mabhoko, akaakonya, "Bholi, mkombola kulola chilebhe?"

24 Bhenabo amundu bhangalola bhakalola, akalobhola, "Ndenda kwabhonanga bhandu handa mikongo jitenda kujenda."

25 Ngapena Ayesu bhakaabhekela kabhele mabhoko mmiho, ngapena miho gabhe gakajogolekwa, bhakakombola kulola kabhele, bhakalola kila chilebhe maha. 26 Ayesu bhakaalagikia bhajaule kwaachabhe, bhakaalobholela, "Nkotokujingila mu chilambo."

27 Ngapena Ayesu na bhanapunji bhabhe bhakajaulanga mu hijiji ya ku Kaisalea Filipi. Pabhakibhanga nndela Ayesu bhakaakonyanga bhanapunji bhabhe, "Bhandu bhalobholanga nenga nga ganiki?"

28 Bhakaajangula, "Bhangi bhalobholanga mwenga nga Ayohana Ambatichaji, bhangi bhalobholanga mwenga nga alondohi Aelia na bhangi bhalobholanga mwenga nga bhamo bha akaalondohi bhangi."

29 Bahi Ayesu bhakaakonyanga, "Bholi na mwangota, nnobholanga nenga nga ganiki?"

Na bhenga Apetulo bhakaajangula, "Mwenga nga Kilisito."

30 Ngapena Ayesu bhakaakelebhuanga bhanapunji bhabhe bhakotokwalobholelanga amundu bhoabhala kubhee nenga nga Akilisito.

31 Ngapena Ayesu bhakajemeka kwajigananga bhanapunji bhabhe, "Kubhehe nenga mwana bha Amundu mbakupata hibhini hijingi na kukanikwa na akanahota, akaakolo bha akaakung'i, na bhabhajigana Malagilo ga Amusa na kubhehe mbakomekwa nambo lichobha lya tatu mbakuyoka." 32 Ayesu bhakaalobholelanga ngani jenejo pangali kuhiya, penapo, Apetulo bhakaatola Ayesu nnyenje, na kujemeka kwakalipila. 33 Nambo Ayesu bhakatendebhuka, bhakaalolekeanga bhanapunji bhabhe, bhakaakalipila Apetulo bhabhikulobhola, "Mmoke nnongi jangu Lichetani! Maganikilo ginu ngabha ga Annoongo nambo ga bhandu."

34 Ngapena Ayesu bhakalikema lyenilyela lilubhalo likolongwa lya bhandu pamo na bhanapunji bhabhe, akaalobholelanga, "Handa amundu bhoabhala bhabhapala kungagula nenga, nga ipaalikwa bhachikane oti bhene, bhakondeke kulaga hata kujomoka ligongo lyangu nenga, bhangagule. 35 Kwa kubhee amundu bhoabhala bhabhapala kuguokoa umomi gwabhe mwene, bhapakugahobhea, nambo amundu bhabhapakuguhobhea umomi gwabhe ligongo lyangu nenga na ligongo lya Ngani Jammbone, bhapakugahokoa. 36 Bholi, mundu bhapakupata na gammbone niki handa bhachipatite chilambo choha na kuguhobhea umomi bwabhe? 37 Amundu bhapakubhoa chilebhe niki ili bhakombole kugubhujia umomi gwakwe? 38 Amundu bhoabhala bhabhanibhonela honi nenga na malobhe gangu mu chibhelei chenjeni cha ngoongola na chichilemwitinge, nenga Mwana bha Amundu, mbakwaakana amundu bhenabho, penipala pabhapakuhika mu nng'anyimo gwa Atati bhabhe pamo na akaapangana mahengo bha kunani kulihunde bha Hangwana."