2 Aətshe kə sə tə̂ nə sə ngbatshe mâ lə anda nə̂ Abä əmə. Də̂ ne, mə pa kə e ə pa: "Mə sə kə na ndə kə gamba ə̈bə̈ ətshe mbrə e a?" 3 Rəkɔ, kədə mə na â gamba ətshe nə kə e gâ ye, mə sə kə do tə̂ əmə ə gu ə ko e gâ ngotə̂ əmə, kanika ətshe ə̂në, əmə, mə sə tə̂ nə, e-e ndje, e sə kə sə tə̂ nə.

9 Mandâ əpʉ səkɔ, ə̂në Jezu sə̂ kə o na ye gâ lafɔ â əndje sə̂ kə shekɔ ətshə kɔ, andra âfɔ â əndje wû ətshə wû kwatəndje ne.

10 Alɔ ə̂në əndje dâka pə kə lishi gâ lafɔ ə̂në Jezu ô na ye tə̂ nə kɔ, alabə̈ akoshe bishi ə̂në əndje yî aə̂mbî aləba kɔ wûtu gâ ngotə̂ əndje 11 ə pâ kə əndje ə pa: «Azü əgɔ Galile, e daka pə kə ka kotə̂ye ə lishi gâ lafɔ mbrə yekɔ? Jezu ə̂në tshə âfɔ lə takpa tə̂ e ə ô na ye mâ lafɔ kɔ, tshə sə kə gu nə kʉ rə mata ə̂në e wû ətshə ə̂në tshə ô na ye kɔ.»

20 Ətshə nə ə̂në tshə pâ əpʉ nə sə tə djatra əpʉ kɔ, tshə pa: «Ayî, mə sə kə na nə katshä katshä səye.» Asərəmə! Nä gâ əmə, Âgbɔ̂ Əyïngerə Jezu!

12 Jezu pâ əpʉ ə pa: «Wü-a, mə sə kə na nə katshä katshä səye, â mə sə kə na də aərə nə̂ əmə mbrə azü, ndə kə pa mə za ərə kə əzü bale bale ə lï də ərə ə̂në tshə mbrə kɔ.

36 «Əzü bale wusə̂ əlo nə də alɔ nə wu ne. Atrawaya nə̂ Ndjapä ə̂në əndje sə mâ lafɔ kɔ wala Ɨrɨ Ndjapä nə wusə̂ əlo nə wu bale ne, kʉtə̂ Abä tshî kə wusə̂ nə. 37 Ərə ə̂në ə wûtu leme-e tə̂ alɔ Nɔwe kɔ, ə sə kə wutu nə äwä bale tə̂ alɔ kə gu Əgblə nə̂ Əzü. 38 Leme-e, tə̂ alɔ nə səkɔ, angbʉlînə ndə kə pa əgerə yavrɨ ni, ə̂ngû su ə za tshepashɔ nɔ̂, azü sə̂ kə zɨ ərə ə sə̂ kə ndju ərə, ə sə̂ kə ko tə̂ əndje, aləvu əndje kô ndje tə̂ əndje ʉrrr gâ tə̂ əlo ə̂në Nɔwe nə lî gâ lə bato kɔ. 39 Əndje wûsə̂ nə wû bale ə pa ə̈bə̈ ərə ə ma je ne, ʉrrr â əgerə yavrɨ nî, ə̂ngû sû ə zâ tshepashɔ nɔ̂ â wô əndje nɔ̂. Ərə nə sə kə sə ndje äwä bale rə tə̂ alɔ kə gu Əgblə nə̂ Əzü.

32 «Əzü bale wusə̂ əlo nə də alɔ nə wu ne. Atrawaya nə̂ Ndjapä ə̂në əndje sə mâ lafɔ kɔ wusə̂ əlo nə wu bale ne wala Ɨrɨ Ndjapä nə bale ne, kʉtə̂ Abä tshî kə wusə̂ nə.

1 Alaye, gâ pâ əpʉ alɔ də əlo aərə səkɔ, ə sə sə tə ə̈bə̈ ərə ə̂në ä ta ngrowô ə ta də əpʉ nə kə e ne. 2 Mbrə ə̂në e wusə̂ nə də ə̂tə̂ e tə ə̂rɔ̂nə ə pa əlo kə gu Âgbɔ̂ Əyïngerə sə kə sə mata əlo kə na əyïangba də tsheləbu. 3 Alɔ ə̂në azü sə kə pa nə ə pa: «A sə də blatshe, ə̈bə̈ ərə kə mbrə tə̂ əzə̂ guta gu ne!» Kôto də̂, bə pa bə dji, tshefô sə kə jerə pâ əndje mata yashe ə̂në əgblə sə kə ka ətshə kɔ â əndje sə sə kə tɔ lə nə bale ne.

42 Rəkɔ, ala e në, mbrə ə̂në, e wusə̂ əlo ə̂në Âgbɔ̂ Əyïngerə nə̂ e ə gu də nə kɔ wu ne. 43 E wüsə̂ nə tə ə̂rɔ̂nə ə pa, kədə əyïnga anda kə wusə̂ alɔ ə̂në əyïangba sə kə na də nə də tsheləbu kɔ, tshə sə sə kə lo nə ə katə̂ ye ka tshə ngɔ anda nə ə li ne. 44 Âdârə ə̂në, e-e ndje, e sə̈ trö, mbrə ə̂në Əgblə nə̂ Əzü sə kə gu nə tə̂ alɔ ə̂në e wusə̂ nə wu ne kɔ.»

1 Alaye, gâ pâ əpʉ kə gu Âgbɔ̂ Əyïngerə Jezu Kristə gâ ndə kə ngbo tə̂ əzə̂ gâ ngotə̂ ye*, ərə ə̂në ä yu tshuku nə kə e kɔ kə də̂ kə pa, 2 alɔ ə̂në ə̈bə̈ əzü pa kə e ə pa alɔ kə gu Âgbɔ̂ Əyïngerə lî gâ ye ə pa ndəma Ndjapä kə sə̂, wala ndəma ä kə sə̂ wala ä-ä kə wlâ fraka də əpʉ rə kɔ, kumu e kpë kpë pâ əndu e katshä ne, e mbrə̈ ndje awa mbrə̈ ne. 3 Ə̈bə̈ əzü bale frɔ̈ e frɔ̈ də ə̈bə̈ əpʉ bale ne. Mbrə ə̂në, angbʉlînə ndə kə pa alɔ nə lï, ə̂kpû azü sə kə katə̂ äwä Ndjapä tʉ â əmbrʉ əzü sə kə yi kumu ye, ətshə ə̂në əndje liwu ətshə je kɔ. 4 Əyïkowɔ səkɔ ə̂në tshə sə kə afɔ ə ro ərə nɔ̂ ə̂në azü e ə pa Ndjapä də ərə ə̂në azü sə kə vrɔ nə kɔ, ə na ʉrrr ndjɔ ndə kə sə gâ tʉ mâ lə Anda Ndjapä ə pa əne də ə̂tə̂ əne, əne sə tə Ndjapä.*

16 Mbrə ə̂në, tə̂ alɔ ə̂në əndje ta râwâ, ə̂në tshema ə̈bə̈ makɔndji nə̂ atrawaya kɨ, ə̂në ängɔ̈ nə̂ Ndjapä sə kə kɨ nə, Âgbɔ̂ Əyïngerə də ə̂tə̂ ye, sə kə afɔ mâ lafɔ ə jerə, bale, azü ə̂në əndje zâ lɔsu əndje kə Kristə nə gâ ye â tshû kɔ, əndje sə kə she angbʉlînə. 17 Mandânə, əzə̂ də̂ asorô nə, ə̂në a daka pə ənə̂ əzə̂ je kɔ, Ndjapä sə kə ko əzə̂ də aəndje äwä bale ə o də əzə̂ mâ lafɔ lə andra ndə kə pa a te Âgbɔ̂ Əyïngerə nə lə əyi, â rəkɔ, a sə kə sə alɔnɔ̂ gâ ngotə̂ Âgbɔ̂ Əyïngerə nə.

24 «Bale, tə̂ alɔ nə səkɔ, mandâ kə wu əyo nə, tshela alɔ sə kə bu nə, yipʉ sə sə kə tɔ kwatə̂ye ne, 25 aambrepe sə kə afɔ mâ lafɔ ə yɔ gâ tə̂ ashɔ, Ndjapä sə kə meme aawlra tshelafɔ. 26 Bale, azü sə kə wu Əgblə nə̂ Əzü ə̂në tshə sə kə gu nə lə andra də awlra nə̂ ye nɔ̂ də ə̂yî ye nɔ̂ kɔ. 27 Bale, tshə sə kə wla atrawaya nə̂ Ndjapä ndə kə pa tshə ngbo azü nə̂ ye ə̂në tshə kê əndje pâ ashɔ nɔ̂ gâ ye kɔ gâ tə̂ nə, ə vɔ̂tə̂ nə mâ tə̂ ama ashɔ ʉrrr ndjɔ gâ tə̂ budu nə.»

31 «Alɔ ə̂në Əgblə nə̂ Əzü sə kə yi kumu ye lə ə̂yî ye, də atrawaya nə̂ Ndjapä nɔ̂, tshə sə kə sə gâ pâ mbata ngerə ə̂yî nə̂ ye. 32 Əndje sə kə ngbo amarä nɔ̂ gâ tə̂ nə gâ ətshi ye â tshə sə kə kru tshelə takpa tə̂ əndje mata ə̂në awobata andalimi sə kə kru tshelə takpa tə̂ andalimi də ayabru kɔ. 33 Tshə sə kə ko andalimi nə gâ ndə ndəkɔ ye â ko ayabru nə gâ ndə gə̂lê ye.

11 Bale, bə pa bə dji, mə wû tshelafɔ ə krɔ̂ â ə̈bə̈ ə̂mbî mbrata wûtu. Ətshə ə̂në tshə ô gâ pâ ye kɔ, əɨrɨ ye kə də̂ «Awombrə ndəma ye» gâ ndə «Awopa djatra əpʉ». Tshə sə kə wa ngbanga ə tɔ kowɔ də äwänə. 12 Andila ye sə mata əwo ə̂në ə tshe ə tshe kɔ, â akpɔtɔ ngerə ngba ə ngba tə̂ akrɔ ye. Əndje tâ ə̈bə̈ əɨrɨ gâ tə̂ ye, ə̂në ə̈bə̈ əzü bale wusə̂ nə nə wu ne kɔ, bale ətshə tshî kə wusə̂ nə. 13 Tshə yî ə̈bə̈ ləba ə̂në əndje yî gâ lə ə̈ndjï. Əɨrɨ ye kə də̂ «Əpʉ Ndjapä». 14 Atrugu ə̂në əndje sə mâ lafɔ kɔ, əndje sə̂ kə za äwä ye na na ye pâ aə̂mbî ambrata, ə yî aə̂mbî aləba ə̂në əndje mbrə̂ kʉ də ə̂rɔ̂ lanə kɔ. 15 Ə̈bə̈ ə̈ngrʉ̈ kamba ə̂në ama nə ki ə ki kɔ wûtu lə ama ye gashu, ə̂në tshə lï ndə kə pa tshə da aəgɔ də nə kɔ. Ətshə kə yisə̂ äwä kə əndje də tshɔngblɔ kowɔ je. Ətshə kə sə kə do tshelə aə̂lê vinyə lə əgerə tshelə əkpʉ kə pʉ tshelə aə̂lê vinyə âgbɔ̂ əkɔ nə̂ Ndjapä nə, tə Âgbɔ̂ Əyïworɔgbɔ. 16 Ə̈bə̈ əɨrɨ ə̂në əndje tâ kɔ sə tə̂ ləba nə̂ ye də tə̂ ə̈kü ye, ə̂në ə pa: «Əyïngerə nə̂ alayïngerə də Âgbɔ̂ Əyïngerə nə̂ aâgbɔ̂ alayïngerə nɔ̂.»

26 Mbrə ə̂në kədə əzü kə ma gana əmə, mbrə əpʉ nə̂ əmə, Əgblə nə̂ Əzü sə kə ma gana lə ala ye ndje, alɔ ə̂në tshə sə kə yi kumu ye lə ə̂yî ye, də ə̂yî Abä də ənə̂ atrawaya nə̂ Ndjapä ə̂në əndje sə kpî kɔ.

8 Alaye əmə ə̂në mə yîndə e ngbatshe kɔ, ə̈bə̈ əpʉ sə je ə̂në ə̂sə̂ nə lï lï ndə kə pa ə djerə e ne: lə ala Əyïlingû, əlo bale sə mata ə̂ngû sake bale (1 000) â ə̂ngû sake bale (1 000) sə mata əlo bale.* 9 Ərə ə̂në Âgbɔ̂ Əyïngerə zâ ama də əpʉ kə mbrə nə gâ ye kɔ, əndʉ nə sə sə kə dɨ ə dɨ â tshə mbrə ndəma nə ne, mata ə̂në alabə̈ azü wu ənə̂ əndje ə pa əndʉ nə dɨ̂ ga ye kɔ. Bale, tshə daka pə kə ru tshelə ye tə̂ e, mbrə ə̂në tshə yində nə yi ə pa ə̈bə̈ əzü tshu kuzu ne, bale tshə yində nə ə pa azü nɔ̂ tɔ gâ tə̂ äwä kə tshi äwä angbrɔ kə mbrə tə̂ əndje tʉ.

10 Bale, əlo kə gu Âgbɔ̂ Əyïngerə sə kə sə mata alɔ kə na əyïangba. Tə̂ əlo nə səkɔ, tshelafɔ sə kə ro nə də əsərɨ nə tə âgbɔ̂, aambrepe sə kə ju nə â tshelə əndje sə kə gba nə â ashɔ də aərə ə̂në azü mbrə̂ pâ ashɔ nɔ̂ kɔ sə kə ro nə*.

11 Rəkɔ ə̂në aərə səkɔ nɔ̂ sə kə ro nə ə ro kɔ, kə sə e lï ndə kə sə atâ a? E mbrə̈ tə̂ e tə azü ə̂në e sə kpî ə tɔ̂ popo Ndjapä gâ ye kɔ 12 ka ə sə kə ka mbrə kə wutu əlo nə̂ Ndjapä nə ə sə kə dra əlo nə ə dra. Tə̂ əlo nə, əwo sə kə ju tshelafɔ â sə kə gba tshelə nə nɔ̂, aambrepe sə kə ju nə â tshelə əndje ə gba nɔ̂ je. 13 Bale, Lïndə̂ tshelə ndəma Ndjapä nə, a sə kə ka mbrə tafa tshelafɔ də tafa ashɔ ə̂në kə mbrə ərə də äwänə sə kə sə je pâ nə kɔ.*

27 Â mata ə̂në əndje za äwä kə azü ndə kə pa əndje tshu kʉ äwä bale kɔ, â mandânə ngbanga sə kə sə je kɔ, 28 äwä bale ndje, Kristə nə kâ tə̂ ye kʉ äwä bale gâ ye ndə kə pa tshə ko anyaka nə̂ ə̂kpû azü lə kumu əndje. Tshə wutu tə̂ bishi nə je, ə də̂ ndə kə pa tshə ko anyaka nə̂ azü də̂ ne, bale ndə kə pa tshə she azü ə̂në əndje sə kə ka mbrə ətshə kɔ lə kuzu.