2 मेरै बाबे घअरै आसा रहणा लै बतेर्ही ज़ैगा। ज़ै नांईं हंदी तै हेरनअ त मुंह तम्हां लै बोली। हुंह आसा च़ाल्‍लअ द तम्हां लै ज़ैगा बणाऊंदअ डेऊई। 3 ज़ांऊं मुंह तम्हां लै ज़ैगा बणाईं हेरनी, तेखअ एछणअ मुंह बापस फिरी अर तम्हैं बी निंणै मुंह आप्पू संघै ताकि ज़िधी हुंह रहूं तिधी तम्हैं बी तिधी रही सके।

9 इना गल्‍ला बोली डेऊअ प्रभू तिन्‍नां सम्हनै उझै स्वर्गा लै अर बादल़ै च़ोरअ सह तिन्‍नें आछी का दूर।✝ 10 प्रभू डेऊंदी बारी तै तिंयां सोभ लागै दै सरगा बाखा लै भाल़ै, अर दूई स्वर्ग दूत शेतै झिकल़ै बान्हैं दै तिन्‍नां सेटा लै आऐ अर खल़्हुऐ।

11 तिन्‍नैं स्वर्ग दूतै बोलअ तिन्‍नां लै, "हे गलीली मणछो, तम्हैं इधी खल़्हुई करै किल्है आसा लागै दै सरगा बाखा लै भाल़ै? अह ई ईशू ज़ुंण परमेशरै तम्हां सेटा का स्वर्गा लै च़कअ, ज़िहअ करै तम्हैं अह स्वर्गा लै डेऊंदअ भाल़अ, तिहअ ई एछणअ अह बापस फिरी।"✝

20 ज़ुंण इहअ बोला कि ईंयां गल्‍ला आसा शुची, सह ईशू बोला इहअ, "हाँ हुंह आसा छ़ेक्‍कै एछणैं आल़अ!" हुंह जोहन्‍ना बोला बापस, "एवमस्तू। हे प्रभू ईशू छ़ेक्‍कै एछ।"

12 प्रभू ईशू बोलअ इहअ, "भाल़ हुंह आसा छ़ेक्‍कै एछणैं आल़अ, अर हरेकी लै आसा मुखा तेऊए कामें साबै फल।*मोत्त. 16:27

36 "तैहा धैल़ी अर तेऊ बगतो निं कोही का थोघ आथी कि ईंयां केभै हणीं। नां एतो थोघ स्वर्ग दूता का आथी अर नां पूता का। पर ऐहा गल्‍लो थोघ आसा सिधअ बाब परमेशरा का।

37 "ज़िहअ म्हारै दाद-बाब नूहे ज़मानैं हुअ, तिहअ ई हणअ मुंह मणछे पूतो फिरी एछणअ बी। 38 किल्हैकि ज़िहै पाणीं करै हुई दी प्रल़या का आजी ज़ेभै तैणीं नूह ज़हाज़ा भितरी नांईं बेठअ, तेभै तैणीं रहै लोग खांदै-पिंदै अर तिन्‍नां मांझ़ै रहा ती बैह शादी हंदी। 39 ज़ांऊं तैणीं तिंयां पाणींए प्रल़या दी डुबी मूंऐं निं आथी, तेभै तैणीं निं तिन्‍नां का किछ़ बी थोघ लागअ। ठीक तिहअ ई हणअ तेभै बी ज़ेभै हुंह मणछो पूत फिरी एछणअ।

32 "ऐहा गल्‍लो निं कोही का थोघ आथी कि ईंयां केभै हणीं। नां एतो थोघ स्वर्ग दूता का आथी अर नां पूता का। पर ऐहा गल्‍लो थोघ आसा सिधअ परमेशर बाब का।

1 भाईओ, एही बी निं किछ़ै ज़रुरत आथी कि प्रभू फिरी एछणें तैहा ऋता अर बगते बारै तम्हां लै किज़ै लिखे। 2 किल्हैकि तम्हां का आप्पै इना गल्‍लो ठीक थोघ कि प्रभूए सह धैल़ी एछणी तम्हां लै नभैऊशै ज़िहअ राची च़ोर एछा। 3 ज़ेभै लोगा इहअ बोल़णअ, "ठीक-ठाक आसा, अर किछ़ै फिकर निं आथी।" तिन्‍नां लै एछणअ हेरा-हेरी बनाश, ज़ेही सुंदी बेटल़ी लै सूंणें दाह एछा, तिहै ई च़ाऐ तिंयां किछ़ बी करे पर तिंयां निं तैहा बडी खरी का बच़ी सकदै।✝

42 "तैही रहै तम्हैं बिऊंतै, किल्हैकि तम्हां का निं इहअ थोघ आथी कि थारअ प्रभू कहा धैल़ी एछणअ। 43 पर इहअ लआ समझ़ी कि, ज़ै घअरे मालका का इहअ थोघ हंदअ कि च़ोर केऊ पहरै एछणअ, तै रहणअ त तेऊ बिऊंतै संघा निं आपणैं घअरै च़ोरी हणैं दैणीं ती। 44 इहै ई रहा तम्हैं बी हर बगत तैर्हुई। किल्हैकि हुंह मणछो पूत बी एछणअ तैहा घल़ी ज़ेभा लै तम्हैं सोठअ निं हणअ।

1 भाईओ, हाम्हैं लाई तम्हां का धख गल्‍ला प्रभू ईशू मसीहे फिरी एछणें बारै अर तेऊ बगते बारै खोज़ी ज़ेभै हाम्हां सोभै कठा तेऊ का मिलणैं। 2 तम्हैं निं आपणीं सोठदै रही धखी का झाखुई आथी या इहअ शूणीं कि प्रभू एछणें सह धैल़ी आसा एछी मुक्‍की दी। कई सका तम्हां लै इहअ समाद खोज़ी या एही गल्‍ला खोज़ी या च़िठी दैई कि अह आसा तम्हां लै हाम्हां बाखा आई दी।

3 लोगे इना एही झ़ुठी गल्‍लो विश्वास करी निं कबाता पल़ी। किल्हैकि मसीहा फिरी एछणैं का आजी एछणअ इहअ बगत तेभै हणैं खास्सै मणछ परमेशरे द्रोही। ज़हा कदुष्टो परमेशरा न्हैरी जम्परी बनाश करनअ, सह हणअ तेभै प्रगट। 4 तेऊ करनअ परमेशरो अर तिन्‍नां सोभी गल्‍लो बरोध ज़ेता लोग पूज़ा अर देअ बोला। तेऊ बोल़णअ इहअ कि सह आसा इना सोभी का महान। होर ता होर तेऊ कदुष्टा बोल़णअ परमेशरे भबनै बेशी सोभी का कि सह आसा आप्पू ई परमेशर।✝

16 किल्हैकि प्रभू ईशू मसीहा होथणअ आप्पै स्वर्गा का, तेभै शुणनअ अर प्रधान स्वर्ग दूतो बोल अर परमेशरे नाद बाज़णीं, अर ज़ुंण विश्वासी मरी आसा गऐ दै, तिंयां हणैं पैहलै ज़िऊंदै। 17 तेखअ हाम्हैं ज़ुंण ज़िऊंदै अर बच़ै दै आसा, तेखअ च़कणै हाम्हैं बी तिन्‍नां संघै उझै बादल़ा दी प्रभू सेटा मिलदै अर तेभा पोर्ही रहणैं हाम्हैं सदा प्रभू संघै।

24 "इना दुख-सांगटे धैल़ी बाद हणअ इहअ कि ✝

सुरज़ फिरनअ न्हैरअ

अर ज़ोथ हणीं काल़ी।

25 सरगा का अल़णैं तारै धरनीं

अर सरगे सारी शगती बी सिक्‍कणी आजू-पिछ़ू।"

26 तेखअ भाल़णअ लोगा हुंह मणछो पूत महान शगती अर प्रतप्पा संघै बादल़ा दी एछदअ। ✝ 27 तैहा बेला छ़ाडणैं मुंह आपणैं स्वर्ग दूत। पृथूई दी हर ज़ैगा का करनै आपणैं छ़ांटै दै लोग कठा।*बधा. 30:4; मोत्त. 24:31

31 "ज़ांऊं हुंह मणछो पूत आपणैं प्रतप्पा दी आपणैं स्वर्ग दूता संघै फिरी एछणअ, तेभै बेशणअ मुंह आपणीं प्रतप्पी राज़गाद्दी दी नसाफ करदै। 32 तेभै करनी मुंह सोभै ज़ाती कठा। ज़िहअ फुआल बाकरी का भेडा ज़ुदी करा तिहै ई करनै धर्मीं अर पापी मणछ एकी-दुजै का ज़ुदै। 33 भेडा करनी मुंह आपणीं दैहणीं बाखा अर बाकरी करनी तेऊ आपणीं बाऊंईं बाखा खल़ी।

11 तेखअ भाल़अ मंऐं स्वर्ग घुआल़ी, अर तेथ कै भाल़अ कि एक शेतअ घोल़अ आसा, अर तेऊ घोल़ै प्रैंदै आसा एक शुंआर, ज़हा लै भरोस्सैमंद अर शुचअ बोला, सह करा धर्में साबै परमेशरे दुशमणो नसाफ अर तिन्‍नां संघै जुध।✝

12 तेऊए आछी आसा आगीए लुपल़ै ज़ेही अर तेऊए मुंडै आसा राज़ मुगट। तेथ आसा तेऊओ नाअं लिखअ द पर तेऊ नाओं किज़ै मतलब आसा तेतो थोघ आसा सिधअ तेऊ ई का।✝

13 सह आसा लोहू करै छ़ल़िकै दै झिकल़ै बान्हीं अर तेऊओ नाअं आसा "परमेशरो बैण।" 14 स्वर्गे खास्सी सैना लागी शेतै घोल़ै दी शुंआर अर शेतै असली बाछे शेतै झिकल़ै बान्हीं तेऊ पिछ़ू-पिछ़ू हांढदी। 15 ज़ाती-ज़ाती मारना लै निखल़ा तेऊए मुंहां का एक तिछी तलबार अर तेऊ करनअ लोहेओ राज़दंड लई करै तिन्‍नां दी राज़। सर्वशक्तिमान परमेशरा करनै आपणैं दुशमण इहै खतम ज़िहै लोग दाखो रस बणाआं। तेऊ करनी ईंयां सोभै गल्‍ला परमेशरा लै ज़ुंण सोभी प्रैंदै राज़ करा अर ज़सरअ प्रकोप तिन्‍नां लै पल़णअ किल्हैकि तिन्‍नैं किअ पाप।✝

16 तेऊए झिकल़ै दी अर ज़ांघा आसा इहअ नाअं लिखअ द कि माहा राज़अ अर प्रभूओ प्रभू।✝

26 "ज़ुंण मुंह आपणअ प्रभू मनणै अर मेरी शिक्षा मनणै का हुधिए, तेभै हुधणअ मुंह मणछे पूता बी ज़ेभै हुंह आपणैं पबित्र स्वर्ग दूता संघै पृथूई दी फिरी एछणअ। तेभै भाल़णअ सोभी मेरअ प्रतप्प ज़िहअ मेरै बाबो आसा।

8 मेरै पैरै साथीओ, ऐहा गल्‍ला निं कधि बिस्सरी कि परमेशरे एक धैल़ी हआ हज़ार साला ज़ेही अर हज़ार साला हआ एकी धैल़ी ज़ेही। तेऊ लै आसा एक धैल़ी अर हज़ार साला दुहै एक बराबर।✝

9 कई लोग सोठा इहअ कि प्रभू आसा आपणीं फिरी एछणें करारा पूरी करना लै बल़ैग पांदअ लागअ द। पर प्रभू निं एऊ साबै बल़ैग करदअ आथी लागअ द। तेऊ आसा तम्हां लै सबर डाहअ द। किल्हैकि सह निं कोही बरैबाद करनअ च़ाहंदअ। पर सह च़ाहा इहअ कि हरेक मणछ आपणैं पापो प्राश्त करे अर परमेशरा सेटा फिरी एछे।✝

10 पर मसीहा एछणअ पाक्‍कै दी फिरी अर सह एछणअ नभैऊशै, ज़िहअ च़ोर एछा। तैहा धैल़ी हणीं सरगै गुल़ूबिज़ल़ू करै बडी छ़ेल़ अर सरग निं शुझणअ। सरगे सोभै च़िज़ा सुरज़, ज़ोथ अर तारै दझ़णैं पठी। तैहा धैल़ी करनी परमेशरा लोगे तिंयां गल्‍ला प्रगट ज़ुंण तिन्‍नैं संसारै रहंदी किई ती अर तेतो हणअ नसाफ।

11 अह गल्‍ल आसा पाक्‍की कि परमेशरा करनी सोभै गल्‍ला इहअ करै खतम, तै आसा तम्हां का थोघ कि थारअ बभार किहअ लोल़ी हुअ। थारअ बभार लोल़ी धर्मीं अर पबित्र हुअ अर थारै हर कामां करै लोल़ी परमेशर खुश हुअ। 12 आपणअ बभार डाहा तिहअ ज़िहअ तम्हैं आशा डाही तैहा धैल़ी न्हैल़ै आसा लागै दै ज़ुंण परमेशरै मसीहा फिरी एछणा लै आसा छ़ांटी दी। तैहा धैल़ी छ़ेक्‍कै एछणा लै करा पूरी कोशिश। तैहा धैल़ी दहणअ परमेशरा सरग आगी करै अर सुरज़, ज़ोथ अर तारै गल़णै तैहा आगीए घमास्सा करै।✝

13 पर हाम्हां विश्वासी आसा परमेशरा का एही आशा कि तेऊ बणाणैं नऊंअ सरग अर पृथूई ज़िहअ तेऊ बाहिदअ आसा किअ द। तिधी रहणैं सिधै धर्मीं मणछ।✝

27 ज़िहअ मणछा लै एकी बारी मरनअ अर नसाफ हणअ पैहलै ई का आसा पाक्‍कअ किअ द,✝

28 तिहअ ई हुअ मसीहा बी हरेकी मणछे पाप दूर करना लै बल़ीदान। सह एछणअ एकी बारी भिई तिन्‍नां बच़ाऊंदअ फिरी ज़ुंण तेऊ न्हैल़ै भाल़ै आसा लागै दै नां कि पापे तैणीं भिई बल़ीदान हणां लै।✝