1 धारा बाखे मुल्खै ज़िधी एप्रैम गोत्रा आल़ै तै बस्सै दै, तिधी त एक मिका नाओं मणछ। 2 तेऊ बोलअ आपणीं ईजा लै इहअ, "ताह आसा आद कि ताखा तै गैरा शौ च़ंदीए सिक्‍कै अर तिंयां पाऐ तै ताखा कुंणी च़ोरी? तंऐं दैनअ त तेऊ च़ोरा लै फिटक अर हुंह त तिधी शूणअ लागअ द! तिन्‍नां च़ंदीए सिक्‍कै च़ोरनै आल़अ आसा हुंह ई।"

तेऊए ईजै बोलअ तेऊ लै इहअ, "मेरै बेटैआ, मेरी आसा बिधाता का एही अरज़ कि तेऊ लोल़ी ताल्है बर्गत दैनी।"

3 तेऊ दैनै तिंयां गैरा शौ च़ंदीए सिक्‍कै आपणीं ईजा लै बापस अर तैहा बोलअ तेऊ लै इहअ, "मुंह डाहणीं अह च़ंदी बिधाता लै बांधअ। अह एछणअ काठे मुहुर्ती बणाईं तेथ च़ंदी महल़णें कामैं। हुंज़, अह च़ंदी डाही मंऐं ताखा दैई।"

4 मिका दैनै तिंयां च़ंदीए सिक्‍कै आपणीं ईजा का बापस। तेखअ दैनै तेऊए ईजै दूई शौ च़ंदीए सिक्‍कै सनारा का अर तेऊ बणाईं एक काठे मुहुर्ती संघा महल़ी सह च़ंदी करै। सह मुहुर्ती डाही मिके घअरै।

5 मिका बणाअं आपणअ एक देअआ लै देहुरअ। तेऊ स्तापी तिधी आपणैं कुल़ज देअए मुहुर्ती अर प्रोहता लै एक च़ोल़अ बी बणाअं। तेखअ किई तेऊ आपणैं एकी शोहरूए शुधी कि सह तिधी प्रोहते रुपै च़ाकरी करे।✝ 6 तेऊ ज़मानै निं इज़राईलीओ राज़अ हंदअ त। परज़ा करा ती ज़िहअ तिन्‍नां भलअ ज़ाण्हिंआं त तिहअ।✝

7 तधू काल्‍ला त लेबी गोत्रा का एक ज़ुआन मणछ यहूदा मुल्खै बेतलेम नगरी आअ द।✝ 8 सह डेऊअ यहूदा बेतलेम नगरी का किधा होर्ता लै रहंदअ। एप्रैम गोत्रे धारा बाखे मुल्खै भेटअ बाता तेऊ मिको घअर।

9 मिका पुछ़अ तेऊ का, "तूह केत बाखा आअ?"

तेऊ दैनअ मिका लै ज़बाब, "हुंह आअ यहूदा बेतलेम नगरी का, हुंह आसा लेबी। हुंह आसा हांढदअ लागअ द कि ज़िधी मुंह रहणा लै भेटे, मुंह रहणअ तिधी।"

10 मिका तेऊ लेबी लै, "मुंह संघै रहअ इधी। तूह बण मेरअ बाबा ज़िहअ अर प्रोहत अर हुंह दैंऊं ताल्है तेते बदल़ै सालकै दस च़ंदीए सिक्‍कै, घेरी लै झिकल़ै अर दोत्ती बैल़ी खाणां लै।" 11 सह ज़ुआन लेबी मनअ तेऊ संघै रहणा लै। मिका डाहअ सह तिधी आपणैं शोहरू ज़िहअ। 12 मिका डाहअ सह ज़ुआन लेबी तिधी प्रोहत अर सह बी लागअ मिके घअरै रहंदअ। 13 मिका बोलअ इहअ, "ऐबै आसा लेबी मेरै घअरै प्रोहत अर ऐबै करनी बिधाता मुल्है सोभै गल्‍ला भली।"