1 तेऊ ज़मानै ज़धू इज़राईली मांझ़ै राज़अ नांईं त हंदअ, लेबी गोत्रो एक मणछ लागअ एप्रैम गोत्रे धारा बाखे मुल्खै परदेसी ज़िहअ रहंदअ। तेऊ निंईं आप्पू संघै बेतलेम नगरी का एक ज़ुआन बेटल़ी संघा डाही आप्पू लै। 2 तेऊ किअ तैहा संघै विश्वास घात, सह रुश्शी तेऊ का संघा डेऊई तेऊ छ़ाडी आपणैं पेऊकै यहूदे बेतलेम नगरी लै बापस संघा रही च़ऊ भिन्‍नैं तिधी।

3 बादा का बणाअं तेऊ लेबी इहअ मन्‍न कि सह आणनीं समझ़ाऊई करै घअरा लै। सह डेऊअ बेतलेम नगरी लै अर आप्पू संघै निंयैं तेऊ आपणअ एक दास अर दूई गाधै। तेऊ किई तैहा संघै गल्‍ला अर तैहा निंयं सह आपणैं बाबे घअरा लै अर तेसो बाब बी हुअ आपणैं ज़ुआंईं भाल़ी खुश। 4 तैहा बेटल़ीए बाबै बोलअ तेऊ लै, खास्सअ ज़ोर लाई कि तूह दै इधी रहणैं अर तेखअ रहअ सह चिई धैल़ै तैणीं तिधी आपणैं शौहरै संघै खांदअ-पिंदअ लागी।

5 च़ौथै धैल़ै ज़ांऊं तिंयां दोत्ती सुत्ती उझ़ुऐ, सह लेबी तैर्हुअ घअरा डेऊणा लै। पर तैहा बेटल़ीए बाबै बोलअ तेऊ लै इहअ, "नुहारी लआ खाई तै निं बाता तराण मरदै, तेखअ लागै तम्हैं डेऊंदै।"

6 तेखअ बेठै तिंयां दुहै ज़ण्हैं खांदै पिंदै संघा, तेखअ बोलअ तैहा बेटल़ीए बाबै तेऊ लै इहअ, "ज़ीबाण, आझ़ बैल़ी रहा तम्हैं इधी संघा करा मौज़।"

7 सह लेबी उझ़ुअ खल़अ संघा लागअ डेऊणैं ज़ाज़त लंदअ पर तैहा बेटल़ीए बाबै बोलअ ज़ोरा-ज़ोरी तेऊ लै कि आझ़ निं डेऊई आथी। तेखअ रहअ सह तैहा बैल़ी बी तिधी। 8 पांज़ूई धैल़ी दोत्ती हुअ सह डेऊणा लै तैर, पर तैहा बेटल़ीए बाबै बोलअ तेऊ लै इहअ, "रोटी लआ खाई, अज़ी दैआ रहणैं उडै डेओऐ।" तेखअ बेठै तिंयां दुहै ज़ण्हैं कठा रोटी खांदै।

9 ज़ांऊं उडै सह लेबी आपणीं डाही दी बेटल़ी अर दासा संघी डेऊणैं ज़ाज़त मांगदअ लागअ, ताऊं हेरअ तैहा बेटल़ीए बाबै भिई इहअ बोली, "भाल़ ऐबै गअ धैल़अ उडी अर ऐबै च़ाल्‍ली सान्ह पल़ी अर ऐबै दैआ तम्हैं आझ़ बैल़ी इधी रहणैं। इधी दैआ रहणैं संघा करा मौज़। काल्‍ला दोत्ती लागै तम्हैं दोत्थी आपणैं घअरा लै डेऊंदै।"

10 पर तैहा बैल़ी निं सह तिधी रहणअ च़ाहंदअ त, तेखअ लागअ सह आपणैं दास अर आपणीं तैहा बेटल़ी अर आपणैं गाधे पिठी काठी लाई हांढदअ। संघा पुजै तिंयां उडै जबेश सम्हनै ज़ेता लै आझ़काला एरुशलेम बोला।✝ 11 तिधी बोलअ तेऊ दासै आपणैं मालका लै, "आझ़ रहणअ हाम्हां इधी संघा काटणी आझ़की राच ऐहा जबेशी लोगे नगरी।"

12,13 तेऊए मालकै बोलअ इहअ, "पाखलै लोगे नगरी निं हाम्हां रहणअ, एथ निं एक बी इज़राईली आथी। हाम्हां डेऊणअ इधा का आजू संघा काटणी राच गिबा या रामाह नगरी।" 14 तेखअ रहै तिंयां तिधा का आजू हांढदै लागी। बिन्यामीन गोत्रे मुल्खै गिबा नगरी पुजदी-पुजदी गअ तिन्‍नां लै धैल़अ पठी उडी। 15 तेखअ फिरै तिंयां गिबा नगरी बाखा कि बैल़ी तिधी रहे। नगरी भितरी डेऊई रहै तिंयां च़फै बेठी। पर तिंयां निं कोही आपणैं घअरा लै शादै कि रहे।

16 तेखअ आअ एक प्रोढअ मणछ आपणैं खेचा काम करी, सह एप्रैमे धारा बाखलै देशो अर सह थिअ गिबा नगरी रहंदअ लागअ द अर गिबा नगरीए लोग थिऐ बिन्यामीन गोत्रे। 17 तेऊ प्रोढै मणछै भाल़ै कि नगरीए च़फै आसा कुंण परदेसी बेठै दै, तेऊ पुछ़अ तिन्‍नां का, "तम्हैं किधा का आऐ अर किधा लै आसा च़ाल्‍लै दै?"

18 तेऊ लेबी बोलअ, "हाम्हैं आसा यहूदा बेतलेम नगरी का, हाम्हैं तै किधी डेऊऐ दै, ऐबै च़ाल्‍लै हाम्हैं शिलोह बिधाते पबित्र ज़ैगा लै अर तिधा का डेऊणअ हाम्हां एप्रैमे धारा बाखे मुल्खा लै, हाम्हैं आसा तिधे ई। पर इधी निं हाम्हां लै कोही आपणैं घअरै रहणा लै बोलअ कि हाम्हैं आझ़ बैल़ी काटी सके। 19 हाम्हां का आसा सोभै गल्‍ला, गाधै लै घाह पाच बी आसा हाम्हैं आप्पू संघा आणअ द अर मुंह, ऐहा तेरी दासी मेरी बेटल़ी अर मेरै दासा संघी रोटी अर दाखो रस बी आसा हाम्हां का आपणअ। हाम्हां लोल़ी ती सिधी सुत्तणा लै ज़ैगा भेटी।"

20 तेऊ प्रोढै आदमी बोलअ, "तूह एछ मेरै घअरै प्राहुंणअ, ताह निं इधी च़फै दी राच काटणें ज़रुरत आथी।" 21 तेऊ प्रोढै मणछै निंयैं तिंयां आपणैं घअरा लै प्राहुणैं, तिन्‍नें गाधै लै बी दैनअ घाह। तिन्‍नैं धोऐ हाथ खूर संघा खाई बैल़ी।

22 तिंयां थिऐ मौज़ी कि नगरीए कदुष्ट मणछै गोटअ सह घअर फेर-फिरदअ संघा लागै ज़ोरै-ज़ोरै दुआरा टोक्‍कदै! तिन्‍नैं बोलअ तेऊ प्रोढै मणछा लै, "ज़ुंण आदमी तेरै घअरै आसा आअ द, तेऊ काढ बागै हाम्हां करनअ आझ़ बैल़ी तेऊ का बेटल़ी ज़िहअ सुख।" ✝

23 सह प्रोढअ मणछ निखल़अ बागै संघा बोलअ तिन्‍नां लै, "भाईओ, ज़ीबाण इहअ घोर पाप निं करा। अह मणछ आसा मेरअ प्राहुंणअ। 24 भाल़ा, इधी आसा मेरी कुंआरी शोहरी अर एऊ मणछे आसा एक डाही दी बेटल़ी, हुंह आणू तम्हां लै तिन्‍नां बागै। तेखअ करै तम्हैं ज़िहअ च़ाहा तिहअ। पर एऊ मणछा संघै निं इहअ ऐडअ काम करी।"

25 पर तिन्‍नैं निं तेऊ प्रोढै मणछे एक बी शूणीं। तेऊ लेबी काढी आपणीं सह डाही दी बेटल़ी बागा लै। तिंयां रहै सोभै सारी राची दोत्ती तैणीं तैहा संघै ज़ोरा-ज़ोरी लागी। दोत्ती छ़ाडी तिन्‍नैं सह राच भैई करै। 26 दोत्ती न्हैर-प्रैश्शै पुजी सह बेटल़ी तेऊ प्रोढै मणछे घअरे दुआरा आजू संघा बधल़ूई तिधी धरनीं, सह रही धुप्पै निखल़णैं तैणीं तिधी तेही ई पल़ी ज़ेऊ घअरै तेसो मर्ध थिअ। 27 ज़ांऊं तेसो मर्ध दोत्ती निंजा का उझ़ुअ, अर डेऊणा लै दुआर घुआल़अ, तेऊ भाल़ी आपणीं सह डाही दी बेटल़ी दुआरा बाखा बाह करी उटी बाखा बधल़ूई दी। 28 तेऊ लेबी बोलअ तैहा लै, "उझ़ू, च़ाल्‍ल ऐबै डेऊणअ हाम्हां।" ज़ांऊं तैहा का किछ़ै ज़बाब निं भेटअ, तेऊ लादी तेसे ल्हास गाधै प्रैंदै संघा लागअ आपणैं घअरा लै हांढदअ। 29 आपणैं घअरै पुजी पाई तेऊ आपणीं डाही दी बेटल़ी छ़ूरी करै काटी। तेऊ किऐ तेसे बारा ठोर संघा पजैल़ै तिंयां बारा ठोर इज़राईले बारा गोत्रा सेटा एक-एक तिन्‍नें देशै। ✝

30 ज़ुंणीं बी तिंयां भाल़ै तिंयां लागै इहअ बोल्दै, "इज़राईलीए मिसर देशा का निखल़णैं ओर्ही निं हाम्हैं आझ़ तैणीं एही गल्‍ला शूणीं! इहअ निं कधि हुअ अर नां आझ़ तैणीं इहअ भाल़अ! कठा हआ संघा करा बच़ार कि किज़ै करनअ!"