1 बिधातो स्वर्ग दूत डेऊअ गिलगाल नगरी का बोकीम नाओंए ज़ैगा लै, संघा खोज़अ इज़राईली का कि बिधाता बोला तम्हां लै इहअ, "मंऐं पजैल़ै तम्हैं मिसर देशा का ऐहा ज़ैगा ज़ेते करार मंऐं थारै दादा-बाबा का किई ती। मंऐं त तिन्‍नां लै बोलअ द, ‘हुंह निं कधि आपणीं करार चोल़दअ। 2 तम्हैं निं एऊ देशै बस्सै दै लोगा संघै करार करदै लागी। तिन्‍नें बेदी ढोल़ै पोर्ही।’ पर तम्हैं निं ज़िहअ मंऐं बोलअ तिहअ शूणअ अर तम्हैं किअ तेतो उंबल़अ ई!✝ 3 ऐबै बोला हुंह इहअ, ‘मुंह बी निं ऐबै ईंयां लोग तम्हां मांझ़ा का पोर्ही काढणैं। तिंयां हणैं थारै दुशमण अर तिन्‍नें देअ-देबी हणैं तम्हां लै फाही।’" 4 ज़ांऊं बिधाते स्वर्ग दूत इना एतरी गल्‍ला खोज़ी मुक्‍कअ, तेखअ लागै सोभ इज़राईली ज़ोरै-ज़ोरै लेरा लांदै। 5 तैही पल़अ तैहा ज़ैगा नाअं बोकीम*। तिधी किअ तिन्‍नैं तेखअ बिधाता लै बल़ीदान।

6 ज़ैहसू दैनी तेखअ सोभी इज़राईली लै डेऊणे ज़ाज़त अर तिंयां बी डेऊऐ आपणैं-आपणैं मुल्खे तिन्‍नां ज़ैगा लै ज़ुंण-ज़ुंण तिन्‍नें हेस्सै आई ती। 7 ज़ेतरी साला ज़ैहसू ज़िऊंदअ रहअ, तेतरी साला रहै इज़राईली बिधाते च़ाकरी लागी। बादा का बी रहै इज़राईली तिन्‍नां सैणें ज़िऊंदी ज़िता बिधाते च़ाकरी करदै लागी, ज़ुंण ज़ैहसूए पोस्तीए थिऐ। तिन्‍नैं सैणैं त आपणीं आछी भाल़अ द कि बिधाता इज़राईला लै किहै-किहै महान काम किऐ तै। 8 बिधातो दास नूनो शोहरू ज़ैहसू गअ खिरी एकी शौआ दसा साले अमरा ज़ांऐं। 9 तेऊए ल्हास डाही तिन्‍नें एप्रैम गोत्रे धारा बाखे मुल्खै गाश नाओंए धारे उतरा बाखा तिम्ना-सेरी नाओंए नगरी तेऊए आपणीं ज़ैगा घोरी दाबी। 10 खिरी गऐ तैहा पोस्तीए सोभ लोग अमर पूरी हई ज़ांऐं अर नऊंईं पोस्तीए खारकै लोगा का निं थोघ ई आथी त कि बिधाता इज़राईला लै किज़ै आसा किअ द।

11 इज़राईली लागै तेऊ पापा करदै ज़ेता का बिधाता नफरत करा, तिंयां लागै बाल नाओंए कनानी देअए मुहुर्तीए पूज़ा करदै। 12 तिन्‍नैं छ़ाडी आपणैं दादा-बाबे तेऊ बिधाते च़ाकरी करनी ज़ुंणी तिंयां मिसर देशा का काढी आणै तै! तिंयां लागै बिधाता छ़ाडी आप्पू फेर बस्सै दै पराऐ लोगे देअआ पूज़दै अर तिन्‍नां मुहुर्ती सेटा माथअ टेक्‍कदै। इहअ करै ठैऊई तिन्‍नैं बिधाता लै खास्सी रोश्शै। 13 तिंयां लागै बिधाता छ़ाडी कनानी लोगे बाल देअआ अर अशतरोत नाओंए देबीए पूज़ा करदै। 14 इहअ करै पल़अ बिधातो कोप इज़राईली लै इहअ कि तेऊ दैनअ होरी देशा तिन्‍नें साल-फसल अर ज़ैदात लुटणैं। तेऊ दैनअ तिन्‍नां फेर दुशमणा तिन्‍नां का कबल्‍लै ज़ितणैं अर तिंयां निं तिन्‍नों मकाबलअ करी सकै। 15 ज़ेभै बी तिंयां जुधा लै डेओआ तै, ऐबै निं बिधाता तिन्‍नां संघै हंदअ त, ज़िहअ बिधाता आप्पै त बोली हेरअ द कि मुंह करनअ इहअ। इहअ करै पल़ी तेखअ इज़राईली लै आफ़ता।✝

16 बादा का छ़ांटै बिधाता इज़राईली लै पांच़ अर तिंयां हेरा तै तिन्‍नां लुटणैं आल़ै का बच़ाऊई।✝ 17 पर तिंयां निं आपणैं तिन्‍नां पांच़े गल्‍ला बी मंदै तै! इज़राईली किअ कंज़री बेटल़ी ज़िहअ धोखअ अर तिंयां लागै बिधाता छ़ाडी पराऐ देअआ-देबीए पूज़ा करदै। तिन्‍नें दाद-बाब ज़िऊआ तै बिधाते बधाने साबै आपणीं ज़िन्दगी पर ऐहा नऊंईं पोस्तीए लोग गऐ तेता झ़ट च़ारै बिस्सरुई।✝ 18 ज़ांऊं दुशमण इज़राईलीए बेघै बूरी दशा करा तै, तेखअ फिरा ती बिधाता तिन्‍नें झींण। सह छ़ांटा त तिन्‍नां मांझ़ै एक पांच़। तेऊ पांच़ा संघै रहा त बिधाता अर तेऊ करै छ़ड़ैऊआ त सह इज़राईली तिन्‍नें दुशमणा का। पांच़े ज़िऊंदी ज़िता रहा त बिधाता इज़राईली लै झणैल़ू। 19 पर पांच़ा मरनै का बाद जाआ तै लोग भिई बिगल़ी अर तिन्‍नों बभार हआ त हर बारी पिछ़ली पोस्ती का बी खास्सअ खराब। तिंयां निं होरी देअआ पूज़णे अर आपणैं कदुष्ट कामां करने हठ छ़ाडदै ई आथी तै। 20 तेखअ एछा ती बिधाता इज़राईली लै खास्सी रोश्शै अर तेऊ बोलअ त इहअ, "इनै मणछै पाई मेरी सह करार चोल़ी ज़ुंण मंऐं इने दादा-बाबा संघै किई ती। ईंयां निं ज़िहअ हुंह बोला तिहअ शुणदै ई आथी, 21 तैही निं मुंह ऐबै इना जैंदरा का तिंयां ज़ाती पोर्ही काढणीं आथी ज़ुंण ज़ैहसूए मौत हणैं तैणीं एऊ देशे बाकी तै रही दी। 22 तिन्‍नां करै रहणअ मुंह इज़राईली परखदै लागी कि ज़िहै इने दाद-बाब मेरै साबै ज़िन्दगी ज़िऊआ तै, इना बी तिहअ करनअ कि नांईं।" ✝

23 तैही दैनअ बिधाता तिन्‍नां बाकी बच़ी दी पराई ज़ाती बी तेऊ देशै रहणैं अर ज़ैहसू बी निं तैही तिन्‍नां का ज़िती सकअ। ज़ैहसू मरनै बाद बी निं इज़राईली तिन्‍नां छ़ेक्‍कै पोर्ही काढी सकै।