पांच़ 3

ज़ुंण ज़ाती कनान देशै ई रही

1 बिधाता दैनअ थोल़ी ज़ातीए लोगा कनान देशै इज़राईली मांझ़ै ई रहणैं। ताकि इज़राईलीए नऊंईं पोस्ती बी परखे ज़ुंण कनान देशै जुधे पलका लान्हैं थिऐ या हुऐ ज़ल्मैं ई निं आथी तै। 2 तैही किअ बिधाता इहअ कि इज़राईलीए नऊंईं पोस्ती जुध करनअ शिखल़े, खासकर तिंयां ज़ुंणी कधू जुध भाल़अ ई निं आथी। 3 ज़ुंण पराई ज़ातीए लोग कनान देशै ई बस्सी रहै तिंयां ती पलिश्ती अर तिन्‍नें पांज़ राज़ै, कनानी, सदोनी अर हिब्बी ज़ुंण लाबानोन मुल्खै बाल-हर्मोन धारा पोर्ही हमात ज़ोता तैणीं तै बस्सै दै। 4 मोसा तै इज़राईलीए दादा-बाबा का बिधाते सोभै हुकम खोज़ी डाहै दै, अर ऐबै डाही बिधाता ईंयां ज़ाती इज़राईली परखणां लै कि तिंयां बिधातो हुकम तिहअ ई मना कि नांईं। 5 इहअ करै रहै इज़राईली मांझ़ै कनानी, हित्ती, अमोरी, परिजी, हिब्बी अर जबेशी तिन्‍नां ई संघै बस्सी।✝3:5 भज. 106:35 6 तेखअ लागै खिरी इज़राईली तिन्‍नां संघै ओर्ही-पोर्ही बैहूंदै अर तिन्‍नें देअआ-देबीए पूज़ा-गाज़ा करदै।

ओतनिएल पांच़

7 इहअ करै बिस्सरुऐ इज़राईली बिधाता पठी, तिन्‍नैं किअ सह ई काम ज़ेता का बिधाता नफरत करा अर तिंयां लागै बाल देअए अर अशेरा देबीए मुहुर्ती पूज़दै। 8 इहअ करै रुश्शअ बिधाता तिन्‍नां का पठी अर तेऊओ कोप पल़अ तिन्‍नां लै इहअ कि तेऊ दैनअ तिन्‍नां अराम*3:8 अराम मेसोपोटामिया देशे राज़ै कुशान-रिशताईमे गलामी दी डेऊणैं अर इज़राईली रहै आठा साला तैणीं तेऊ राज़े गलामी दी। 9 तेखअ लागै इज़राईली बिधाता सेटा लेर-पकार पाई छ़ुटकारे अरज़ करदै। बिधाता छ़ाडअ तिन्‍नां लै कालेबे कान्हैं भाई कनजीओ शोहरू ओतनिएल अर तेऊ छ़ड़ैऊऐ इज़राईली तिन्‍नें दुशमणा का। 10 बिधाते आत्मां दैनअ तेऊ लै बल अर सह बणअ सोभी इज़राईलीओ पांच़। ओतनिएल डेऊअ जुधा लै अर बिधाता दैनी तेऊ लै अराम देशे राज़ै प्रैंदै ज़ीत। 11 तधा बाद रही च़ाल़्ही साला तैणीं इज़राईला जैंदरी शांती अर बादा का मूंअ कनजीओ शोहरू ओतनिएल।

एहूद पांच़

12 तेखअ हेरअ इज़राईली भिई तिहअ ई पाप करी एता पिछ़ू दैनअ बिधाता मोआब देशे राज़ै एगलोना इज़राईली का ज़ितणैं। 13 राज़ै एगलोनै किअ अमोरी, अमोनी अर अमोलकी लोगा संघै एक्‍कअ। तिन्‍नैं ज़ितै इज़राईली का, संघा किअ तिन्‍नैं खज़ूरे बूटा अल़ी जेरिहो नगरी कबज़अ। 14 इज़राईली रहै ठारा साला तैणीं मोआब देशे राज़ै एगलोने गलामी दी।

15 तेखअ लागै इज़राईली बिधाता सेटा लेर-पकार पाई छ़ुटकारे अरज़ करदै। ऐहा बारी छ़ाडअ बिधाता खिरी बिन्यामीन गोत्रा का गेरो शोहरू एहूद, सह थिअ खज़ैथू। इज़राईली छ़ाडअ एहूद एगलोन राज़ै सेटा लै अर तेऊ का दैनी राज़ै लै भैंट बी। 16 एहूदै ती आप्पू लै दोहरी बाखा काटणै आल़ी एक हाथ लाम्मी तलबार बझ़ैल़ी दी बणाणैं। सह थिई तेऊ आपणैं च़ोल़ै हेठै दैहणीं ज़ांघा छ़ड़ाऊई डाही दी। 17 तेऊ निंईं सह भैंट मोआबे राज़ै एगलोना सेटा लै, सह राज़अ त खास्सअ मोट्टअ। 18 ज़ांऊं एहूदै सह भैंट तेऊ लै दैनी, तेऊ छ़ाडै तिंयां मणछ बापस ज़ुंणी भैंट च़की आणी। 19 पर आप्पू फिरअ एहूद पिछ़ू गिलगाल नेल़ पात्थरे कारीगीरी किई दी मुहुर्ती सेटा का राज़ै सेटा लै बापस। तेऊ दैनअ राज़ै लै फैल़अ, "माहा राज़अ, मंऐं लाई ताखा एक गुप्त गल्‍ल खोज़ी।" राज़ै किअ हुकम, "थोल़ी घल़ी डेओआ इधा का सोभ बागै।" ज़ेतरै लोग तिधी राज़ै सेटा थिऐ तिंयां डेऊऐ सोभ बागा लै।✝3:19 ज़ैह.

20 राज़अ त मैहलै आपणैं प्रैंधल़ै कमरू एक्‍कै बेठअ द ज़िधी ठांढी बागरी रहा ती लागी। एहूद डेऊअ उझै तेऊ सेटा लै संघा बोलअ इहअ, "मुखा आसा बिधाता बाखा ताल्है एक समाद।" राज़अ उझ़ुअ तेभी धरना का खल़अ।✝3:20 भज. 29:1; मिक. 6:9 21 तेतरी हेरी एहूदै आपणैं खिंज़ै हाथा करै दैहणीं ज़ांघा बाखा का सह तलबार खिंच़ी, संघा ज़ोरा संघै बाही राज़े पेटै। 22 सारी तलबार डुबी तेते तलबारे मुठ बी डुबी तेऊए च़र्बी दी। एहूदै निं तलबार राज़े पेटा का ओर्ही बापस खिंच़ी अर तलबारा करै निखल़ी तेऊए पेटे च़र्बी बागै। 23 एहूद निखअ छ़ाप्परा बाती पोर्ही बागा लै अर तेऊ कमरूओ दुआर डाहअ पिछ़ू हुल़ी करै शाणअ लाई। 24 राज़े च़ाकरी आल़ै का ज़ांऊं खास्सी बल़ैग ज़ाण्हुंई, तिंयां आऐ भाल़ै अर दुआर भाल़अ तिन्‍नैं शाणअ लाई हूल़अ द, तिन्‍नैं सोठअ इहअ कि राज़अ हणअ कमरू भितरी च़ल़ै दी छ़ोटी डेऊअ द। 25 तिंयां थकै बागै न्हैल़ी-न्हैल़ी, पर ज़ांऊं खास्सी बल़ैग हुई कि आटल़ूए कमरूओ दुआर निं कोही घुआल़अ, तेखअ आणी तिन्‍नैं कुंज़ी संघा घुआल़अ दुआर अर भितरी भाल़अ कि तिन्‍नों राज़अ आसा धरनीं पल़अ द मरी खतम हुअ द।

26 तिंयां थिऐ तेते बारै सोठदै ई लागै दै कि एहूद गअ तेभै तैणीं तिधा का तिन्‍नां कारीगीरी किई दी मुहुर्ती दुजी बाखा ठुर्ही पुजअ सेराह नाओंए ज़ैगा। 27 सह पुजअ तिधा का धारा बाखे मुल्खै ज़िधी एप्रैम गोत्र रहा त, तिधा बाज़अ तेऊ नर्शिंगअ कि सोभै इज़राईली हआ जुधा लै कठा। तेखअ निंयैं तेऊ तिंयां सोभ आप्पू संघै धारा बाखे मुल्खा का उंधै। 28 एहूदै बोलअ तिन्‍नां लै इहअ, "मुंह पिछ़ू एछा! बिधाता हेरी तम्हां लै थारै मोआबी दुशमणा का ज़ीत दैई।" तिंयां सोभ इज़राईली लागै एहूदा पिछ़ू उंधै हांढदै अर तिन्‍नैं किई सह ज़ैगा आपणैं कबज़ै दी ज़िधा का मोआबी जरदण नदी आर-पार टपा तै। तिन्‍नैं निं कोही मोआबी जरदण नदी टपणै दैनअ। 29 तैहा धैल़ी मारै तिन्‍नैं कोई दस हज़ार मोआबी सपाही अर तिंयां थिऐ बी सोभ ज़बर मर्ध अर शूरबीर पर तिन्‍नां मांझ़ै निं एक बी बच़अ। 30 तधू ज़ितै तेखअ इज़राईली मोआबी का अर तधा बाद रही इज़राईला जैंदरी अश्शी साला तैणीं शांती।✝3:30 पांच़ 3:11

शमगार पांच़

31 एहूदा बाद हुअ अनातो शोहरू शमगार इज़राईलीओ सैणअ। तेऊ पाऐ तै छ़ह शौ पलिश्ती मर्ध बल्दा लै चोभा दैणें लुहाल़ा करै मारी। इहअ करै हुअ सह बी इज़राईली लै दुशमणा का छ़ुटकारै दैणैं आल़अ।✝3:31 पांच़ 10:17; 15:15