पांच़ 1

इज़राईलीए कनान देशा दी ज़ीत

1 ज़ैहसू मरनै का बाद पुछ़अ इज़राईली बिधाता का, "कनानी संघै जुधा लै हाम्हां मांझ़ै कहा गोत्रा लै दैआ तूह सोभी का आजू डेऊणे ज़ाज़त?"

2 बिधाता दैनअ तिन्‍नां लै ज़बाब, "सोभी का आजी डेओऐ यहूदा गोत्रा आल़ै, एऊ देशा ज़ितणा लै करनी मुंह तिन्‍नें मज़त।"

3 यहूदा गोत्रा आल़ै बोलअ आपणैं भाई-बंध शमौन गोत्रा आल़ै लै, "ज़ुंण ज़ैगा बिधाता म्हारै हेस्सै आसा दैनी दी, तेथ आसा कनानी बस्सै दै, तम्हैं करा तिन्‍नां संघै जुधा करना लै म्हारी मज़त अर तेता बाद कर्मै हाम्हैं थारी मज़त।" शमौन गोत्रा आल़ै डेऊऐ यहूदा गोत्रा आल़ेए मज़त करदै। 4 यहूदा अर शमौन गोत्रा आल़ै छ़ेल़अ कनानी अर परिजी संघै बेज़ेक नाओंए ज़ैगा जुध। बिधाता दैनी तिन्‍नां लै ज़ीत अर तिधी पाऐ तिन्‍नैं कनानी अर परिजी लोगे दस हज़ार मर्ध मारी। 5 यहूदे सैना भेटअ बेज़ेक नगरीओ राज़अ अदोनी-बेज़ेक, संघा छ़ेल़अ तेऊ संघै जुध, संघा ज़ितै कनानी अर परिजी लोगा का। 6 अदोनी-बेज़ेक ठुर्हअ तिन्‍नां का बच़णा लै दूर, पर यहूदे सैना हेरअ सह तेतरी ढाकी अर तिन्‍नैं पाऐ तेऊए हाथा अर खूरे गुंठै काटी। 7 तेखअ बोलअ अदोनी-बेज़ेकै इहअ, "मंऐं डाहै तै सत्तर राज़ै तिन्‍नें हाथे अर खूरे गुंठै काटी आपणैं पलगा गोधै रोटीए ठोर-म्हार खांदै लाई। ज़िहअ मंऐं किअ, परमेशरै दैनअ बदल़ै मुल्है बी तिहअ ई।" सह निंयं तेखअ कैद करी एरुशलेम नगरी लै अर तिधी हुई बादा का तेऊए मौत।

यहूदा गोत्रा आल़ै ज़िती हेब्रोन अर एरुशलेम नगरी

8 तेखअ बाहअ यहूदा गोत्रा आल़ै एरुशलेम नगरी लै घेरअ संघा किअ तेथ कबज़अ। तेथ बस्सै दै लोग पाऐ तिन्‍नैं मारी संघा चैल़ी सारी नगरी दी आग। ✝1:8 ज़ैह. 15:63; 2 शमू. 5:6 9 तेखअ डेऊऐ तिंयां तिन्‍नां कनानी संघै जुधा करदै ज़ुंण उझै धारा बाखे मुल्खै, उंधै सऊंऐं मुल्खै समुंदरे बाढै अर दखण रेगीस्ताना बाखा तै बस्सै दै। 10 यहूदा छ़ेल़अ तिन्‍नां कनानी संघै जुध ज़ुंण हेब्रोन नगरी रहा तै। हेब्रोन नगरी लै बोला तै किर्यात-अराबा। तिधी ज़ितै तिंयां शेशै, आहीमान अर तलमाई टोलीए लोगा का।

ओतनिएलै ज़िती दबीर नगरी

11 तिधा का डेऊई यहूदा गोत्रे सैना दबीर नगरी जुधा लै, दबीर नगरीओ पराणअ नाअं थिअ किर्यात-सेपर। 12 तिधी डाहअ कालेबै आपणैं लोगा लै इहअ बोली, "ज़ुंण किर्यात-सेपर नगरी ज़िती तेथ कबज़अ करना लै सफल होए, तेऊ संघै करनअ मुंह आपणीं शोहरी अकसो बैह।" 13 अह काम किअ कालेबे कान्हैं भाईए शोहरू ओतनिएलै पूरअ अर तेऊ किअ तैहा सारी नगरी कबज़अ। संघा किअ कालेबै आपणीं शोहरी अकसो बैह तेऊ संघै। 14 बैहे धैल़ी ज़ांऊं अकसा तिन्‍नें रबाज़े साबै ओतनिएला सेटा आई, तेऊ डाही सह शगरेऊई कि तूह मांग आपणैं बाबा का धख ज़िम्मीं। सह होथी आपणैं गाधे शुंआरी का उंधै अर तेसे बाब कालेबै पुछ़अ तैहा का, "ऐबै किज़ै बोला तूह?" 15 तैहा बोलअ आपणैं बाबा लै इहअ, "मुल्है दै बर्गत, ज़ुंण तंऐं दखण रेगीस्तानै ज़ैगा दैनी, तेथ संघै लोल़ी तै मुंह पाणींए कुहै बी।" कालेबै दैनी तिधे कोफरी अर कुहै तैहा लै।

यहूदा अर बिन्यामीन गोत्रै ज़िती कई नगरी

16 मोसे शौहरे च़ितरुए आद-लुआद थिऐ कैनी। तिंयां थिऐ यहूदा गोत्रा आल़ै संघै जेरिहो नगरी ज़ेता लै खज़ूरे बूटा आल़ी नगरी बोला तै। तिंयां डेऊऐ तिधा का यहूदा गोत्रे हेस्सै आऐ दै दखण रेगीस्ताना बाखा अराद नाओंए नगरी, संघा बस्सै तिधी इज़राईली*1:16 इज़राईलीअमोलकी लोगा नेल़।✝1:16 गण. 10:29-32 17 यहूदा गोत्रे सैना डेऊई आपणैं भाई-बंध शमौन गोत्रे सैना संघै, संघा बाहअ तिन्‍नैं कठा ज़पात नगरी बस्सै दै कनानी लै घेरअ। तिन्‍नैं किई सह नगरी पठी बरैबाद। तेखअ डाहअ तैहा नगरी नाअं होर्मा*1:17 होर्मा इब्रानी बोली दी मतलब बरैबादी ज़िहअ।✝1:17 गण. 21:3 18 बिधाता किई यहूदा गोत्रे जुध ज़ितणा लै मज़त अर तिन्‍नैं किई गाज़ा, अशकलोन अर अक्रोन नगरी अर तेता फेर फिरदी सारी ज़ैगा संघी आपणैं कबज़ै। 19 धारा बाखे मुल्खै बस्सै दै कनानी, काढै तिन्‍नैं तेता का बागै। पर सऊंऐं मुल्खै बस्सै दै कनानी का थिऐ बडै-बडै लोहे रथ, तिहअ करै निं तिंयां तिन्‍नां तिधा का पोर्ही काढी सकै। 20 ज़िहअ मोसा गूरै पैहलै ई त बोली डाहअ द कि हेब्रोन नगरी दैऐ कालेबा लै अर तिन्‍नैं किअ तिहअ ई। तिधी बस्सी दी अनाक खिंबे चअन टोली काढी कालेबै तिधा का बागै संघा किअ नगरी दी कबज़अ।✝1:20 ज़ैह. 15:14 21 पर बिन्यामीन गोत्रा आल़ै निं एरुशलेम बस्सै दै तिंयां जबेशी पोर्ही काढी सकै, तैही आसा जबेशी आझ़ तैणीं बी एरुशलेम नगरी बिन्यामीन गोत्रा आल़ै संघै रहंदै लागै दै।✝1:21 ज़ैह. 15:63; 18:28; 2 शमू. 5:6

एप्रैम अर मनिश्शे गोत्रा आल़ै ज़िती बेतेल नगरी

22,23 युसुफे खिंबा का एप्रैम अर मनिश्शे गोत्रा आल़ै बाहअ बेतेल नगरी लै घेरअ। तेऊ ज़मानै त बेतेल नगरी नाअं लूज। बिधाता किई तेता लै तिन्‍नें मज़त। तिन्‍नैं छ़ाडै बेतेल नगरी लै भेख लणैं आल़ै। 24 तिंयां भेख लणैं आल़ै तै नगरी बाखा भाल़ै लागै दै, खिरी शुझुअ तिन्‍नां का एक मणछ नगरी बागा लै निखल़दअ अर तिन्‍नैं बोलअ तेऊ लै इहअ, "ज़ै तूह हाम्हां का ऐहा गल्‍ले धख बी भेख दैए कि म्हारी सैना किहअ करै सका ऐहा नगरी भितरी डेऊई, तै निं हाम्हां तेरी किछ़ै हान्‍नी करदै।" 25 ज़ेही तेऊ मणछै नगरी भितरा लै डेऊणे बात खोज़ी, एप्रैम अर मनिश्शे गोत्रे सैना पाऐ नगरीए सोभ मणछ मारी अर तेथ बच़अ सिधअ सह मणछ अर तेऊए रिश्तैदार ज़ुंणीं तिन्‍नां लै भितरी डेऊणे बाते भेख दैनअ त। 26 बादा का डेऊअ सह मणछ तैहा नगरी छ़ाडी हित्ती लोगे देशा लै संघा बसाऊई तेऊ तिधी एक नगरी अर तैहा नगरी नाअं बी डाहअ तिन्‍नैं लूज अर सह नाअं आसा आझ़ तैणीं*1:26 आझ़ तैणीं ऐहा कताबा लिखणे ज़मानै तैणीं बी तिहअ ई।

तिंयां लोग ज़ुंण इज़राईली कनान देशा का बागै निं काढै

27 मनिश्शे गोत्रा आल़ै निं बेथ-शान, तनाक, दोर, इबलाम, मगिदो नगरी अर तेता ओरी-पोरी बस्सै दै कनानी पोर्ही काढी सकै अर तिंयां बी रहै तिधी बस्सी।✝1:27 ज़ैह. 17:11 28 बादा का हुऐ तेथ इज़राईली बलबान अर तिन्‍नैं डाहै तिंयां कनानी आपणैं बेठू लाई पर तज़ी बी निं तिंयां पठी पोर्ही काढै आथी।

29 एप्रैम गोत्रा आल़ै बी निं गज़ेर नगरी बस्सै दै कनानी पठी पोर्ही काढै अर तिंयां बी रहै इज़राईली संघै तिधी बस्सी।✝1:29 ज़ैह. 16:10; 1 राज़. 9:16

30 ज़बलून गोत्रा आल़ै बी दैनअ नहलोन अर कत्रोन नगरीए कनानी तिधी रहणैं अर तिंयां बी रहै तिधी बस्सी अर तिन्‍नें बेठू लागी।

31 आशेर गोत्रा आल़ै बी दैनअ अक्‍को, सदोन, अहलाब, अकज़ीब, हेलबा, अपेका अर रहोब नगरी दी बच़ै दै कनानी आप्पू ई संघै बस्सी रहणैं। 32 इहअ करै बस्सै आशेर गोत्रे इज़राईली बी तिन्‍नां कनानी ई संघै किल्हैकि तिन्‍नैं निं तिंयां कनानी तेता का बागै काढै।

33 नप्ताली गोत्रा आल़ै बी दैनअ बेथ-नाथ अर बेथ-शमेश नगरी बस्सै दै कनानी तिधी बस्सी रहणैं। नप्ताली गोत्रे लोग बस्सै तिन्‍नां संघै पर तिन्‍नैं बी डाहै तिंयां कनानी आपणैं बेठू लाई।

34 अमोरी लोगै दर्लाऊऐ दान गोत्रे लोग उझै धारा बाखे मुल्खा बाखा अर तिन्‍नां निं तिन्‍नैं सऊंऐं मुल्खै बाखा एछणैं दैनअ। 35 हेसरेस धारा, अजालोन अर शालबीम नगरी बी निं अमोरी आपणअ कबज़अ छ़ाडअ, अर तिंयां रहै तिधी बस्सी। बादा का हुऐ एप्रैम अर मनिश्शे गोत्रा आल़ै इहै बलबान कि तिन्‍नैं किऐ तिंयां अमोरी आपणैं काबू संघा डाहै तिंयां बी आपणैं बेठू लाई।

36 पराणैं अमोरी*1:36 अमोरी एदोमी देशे सिअं ती बिंच़ू*1:36 बिंच़ू अक्रबीम ज़ोता बाती उतरा बाखा लै सेला नगरी तैणीं।✝1:36 गण.