पांच़ 14

शिमशोन पांच़ अर तिम्ना नगरीए बेटल़ी

1 शिमशोन डेऊअ एकी बारी उंधै तिम्ना नगरी लै अर सह लोभणूंअ तिधी एक पलिश्ती ज़ुआन शोहरी लै।✝14:1 मूल. 38:13 2 शिमशोनै बोलअ घअरै डेऊई आपणैं ईजा-बाबा का इहअ, "तिम्ना नगरी गम्मी मुंह एक पलिश्ती शोहरी, तम्हैं करा मेरअ बैह तैहा संघै।"

3 पर तेऊए बाबै बोलअ तेऊ लै इहअ, "तूह इना पलिश्ती लोगे शोहरी संघै किल्है च़ाहा बैह करनअ ज़सरअ खतैर निं हंदअ किअ द? ताह आपणैं एतरै लोगा मांझ़ै कोहै निं गम्मी! तंऐं आपणीं टोली मांझ़ै किल्है निं भाल़ी आप्पू लै बेटल़ी?"

शिमशोनै बोलअ आपणैं बाबा लै इहअ, "हुंह च़ाहा तैहा ई शोहरी संघै बैह करनअ किल्हैकि सह गम्मी मुंह खास्सी।"✝14:3 मूल. 24:3-4

4 तेऊए ईज-बाब निं समझ़ै कि अह गल्‍ल आसा लागी दी बिधाता बाखा हंदी अर बिधाता आसा इहअ करदअ लागअ द कि इज़राईली पलिश्ती संघै जुध छ़ेल़णेंओ भान्‍नअ भेटे। तेऊ ज़मानै करा तै पलिश्ती इज़राईली प्रैंदै राज़।

5 तेखअ डेऊअ शिमशोन आपणैं ईजा-बाबा संघै उंधै तिम्ना नगरी लै। ज़ांऊं तिंयां तिधी एकी दाखे बागा बाती तै डेऊंदै लागै दै, शिमशोना का शुझुअ एक ज़ुआन सिह क्रुंगदअ अर तेऊ बाखा एछदअ। 6 बिधाता दैनअ शिमशोना लै इहअ बल कि, तेऊए हाथै निं तेभै किछ़ै थिअ अर तज़ी धुआशअ सह सिह दूई बाखा लै ज़िहअ कि सह होछ़अ ज़िहअ छ़ेल्हू होए। पर तेऊ निं आपणैं ईजा-बाबा का इहअ खोज़अ कि तेऊ किज़ै किअ।

7 तिम्ना नगरी पुजी किई शिमशोनै तैहा शोहरी संघै गल्‍ला अर तेऊ गम्मी सह होर बी खास्सी। 8 थोल़ै धैल़ै बाद आअ सह तिम्ना नगरी लै भिई कि तैहा शोहरी संघै बैह करी आपणैं घअरा लै निंए। बाता फिरअ सह तेऊ सिहा भाल़अ ज़ुंण तेऊ मारअ त। सह हुअ तिधी भाल़ी रहैन कि सिहे ल्हासा दी थिऐ माहूँ बेठै दै अर माहूँए काशणीं ती मखीरा करै भरी। 9 तेऊ काढअ धख मखीर आपणैं हाथै अर तेता खांदी-खांदी डेऊअ सह आपणैं ईजा-बाबा सेटा लै। तेऊ निं इहअ खोज़अ कि अह मखीर आणअ मंऐं सिहे ल्हासा का अर तेऊ दैनअ तेता का तिन्‍नां लै बी अर तिन्‍नैं बी खाअ।

10 तेऊओ बाब डेऊअ तैहा शोहरीए घअरा लै अर शिमशोनै दैनी तिधी धाम, अह त तेऊ ज़मानैं ज़ुआन मर्धा जैंदरी इहअ रबाज़। 11 ज़ांऊं पलिश्ती भाल़अ कि शिमशोन किज़ै च़ाहा, तिन्‍नैं बोलअ ज़ुआन मणछा मांझ़ै तिह ज़ण्हैं लै कि धामा दी तेऊ संघै रहे। 12 शिमशोनै बोलअ तिन्‍नां लै, "हुंह खोज़ूं तम्हां का एक भज़ाहणीं, ज़ै तम्हैं साता धैल़ी तैणीं हणैं आल़ै एऊ कारजा मुक्‍कणैं का आजी तम्हैं तैहा भज़ाहणीं भुझ़ी हेरे, तै दैंऊं तम्हां लै हुंह बाछे तिह च़ोल़ै अर तिह ज़ोल़ी झिकल़ै।✝14:12 1 राज़. 10:1; एज. 17:2 13 पर ज़ै तम्हैं साता धैल़ै भितरी ऐहा भज़ाहणीं नांईं भुझ़े तै लागणै तम्हां मुल्है बाछे तिह च़ोल़ै अर तिह ज़ोल़ी झिकल़ै दैणैं।" तिन्‍नैं बोलअ तेऊ लै इहअ, "आपणीं भज़ाहणीं, खोज़, हाम्हां दै शूणीं लणैं।"

14 शिमशोनै बोलअ इहअ,

"खाणैं आल़ै मांझ़ा का निखल़अ खाणां लै,

जोधै का निखल़ी मिठी च़ीज।"

ऐहा भज़ाहणींओ मतलब निं तिंयां चिई धैल़ै तैणीं बी खोज़ी सकै।

15 च़ौथी धैल़ी बोलअ तिन्‍नैं शिमशोनै लाल़ी का, "आपणैं लाल़ै का पुछ़ किज़ै मोही करै कि तैहा भज़ाहणींओ किज़ै मतलब आसा। नांईं ता हाम्हां चैल़णीं तेरै बाबे घअरै आग अर तूह पाणीं तेता संघी दहई। तम्हैं कै हाम्हां लै म्हारै ढब्बै लुटणैं तैणीं आसा छ़ांदअ किअ द? एता ई लै आसा हाम्हैं शादै दै भाल़ी?"

16 तेखअ डेऊई शिमशोनै लाल़ी तेऊ सेटा संघा लागी लेरा लाई तेऊ लै इहअ बोल्दी, "तूह निं मुल्है झ़ूरदअ! ताह आसा मुखा सिधी नफरत! तंऐं डाही म्हारै लोगा का भज़ाहणीं बोली अर मुखा निं तंऐं तेतो मतलब बी खोज़अ!"

शिमशोनै बोलअ तैहा लै इहअ, "भाल़, मंऐं निं एतो मतलब आपणैं ईजा-बाबा का बी खोज़अ, तेखअ हुंह ताखा किल्है खोज़ूं?" 17 सह थिई कारजे हर धैल़ै तेऊ का लेरा लाई पुछ़दी लागी दी, पर ज़ांऊं तैहा सातुई धैल़ी सह खास्सअ तंग किअ, तेखअ खोज़अ तेऊ तैहा का तेतो मतलब अर तैहा पाअ आपणैं तिन्‍नां आपणैं लोगा का खोज़ी।✝14:17 लूक. 11:8

18 सातुई धैल़ी निं अज़ी धैल़अ उडअ त अर तैहा नगरीए तिन्‍नैं मणछै हेरी शिमशोना लै एही लाई,

"मखीरा का मिठअ किज़ै सका हई?

सिहा का खास्सअ ज़ोर कहा सका हई?"

शिमशोनै दैनअ तिन्‍नां लै ज़बाब,

"ज़ै तम्हैं मेरी बाछ़ी हल़ै निं ज़ुंडी हंदी,

तै निं तम्हैं कधि भज़ाहणीं भुझ़ी सकदै तै।"

19 बिधाता दैनअ हेरा-हेरी शिमशोना लै इहअ बल कि सह डेऊअ उंधै अशकलोन नगरी अर तिधी पाऐ तेऊ तिह मणछ मारी अर तिन्‍नें ढब्बै-धेल्‍लै अर झिकल़ै लुटी करै दैनै तिन्‍नां लै ज़ुंणीं सह भज़ाहणीं भुझ़ी ती। ज़ुंण इहअ हुअ तेता करै आई तेऊ खास्सी रोश्शै अर तेखअ डेऊअ सह आपणैं बाबे घअरा लै, 20 अर शिमशोनै लाल़ीओ बैह किअ तेसे बाबै पिछ़ू तेऊ मणछा संघै ज़हा संघै शिमशोन तेऊ कारजा लै साथी ज़िहअ रहअ।