1 गिदोन ज़हा लै जरुबाल बी बोला तै, सह अर तेऊए सैना उझ़ुऐ दुजै धैल़ै दोत्ती-दोत्थी संघा किऐ हरोद नाओंए पाणींए सोबल़ा सेटा आपणैं डेरै खल़ै। मिद्यानी लोगै तै मोरै तिन्‍नां का उतरा बाखा मोरै नाओंए धारे खागा दी डेरै पाऐ दै।

2 बिधाता बोलअ गिदोना लै इहअ, "मिद्यानी का ज़ितणा लै आसा ताह संघै खास्सै मणछ। इहअ निं हआ कि बादा का बोले ईंयां इज़राईली इहअ कि हाम्हैं तै खास्सै अर तैही ज़ितै हाम्हैं आपणैं बला करै!✝ 3 एता लै कर तूह इहअ, इना सोभी लोगा लै बोल, ‘ज़हा डरै काम्मणीं लागी तिंयां हटा ऐहा गलाद धारा का पिछ़ू घअरा लै।’" इहअ शूणीं हटै बाई हज़ार मर्ध तिधा का पिछ़ू अर गिदोना संघै रहै दस हज़ार बाकी।✝

4 तेखअ बोलअ बिधाता गिदोना लै भिई, "अज़ी बी रहै ताह संघै खास्सै। इना निंऊं उंधै पाणींए सोबल़ा सेटा लै, तिधी छ़ांटणैं मुंह इना मांझ़ै आप्पै। तिधी हुंह ज़हा लै बोलूं कि इना निंऊं संघा, तिन्‍नां निंयैं आप्पू संघा, पर ज़हा लै हुंह नांह करूं, तिन्‍नां निंदअ निं लागी।"

5 ज़िहअ बिधाता बोलअ, गिदोने निंयैं तिंयां उंधै पाणींए सोबल़ा सेटा लै। तिधी बोलअ बिधाता इहअ, "ज़ुंण कुक्‍करै ज़िहै ज़िभ चाकल़ी करै पाणीं झुटे तिन्‍नां करै धरनीं ज़ान्हूं लाई चुशी करै पाणीं झुटणैं आल़ै का ज़ुदै।"

6 चअन शौ मणछ निखल़ै इहै ज़ुंणीं अंदल़ू दी पाणीं च़की कुक्‍करै ज़िहअ चाकल़ी करै झुटअ अर बाकी झुटअ सोभी धरनीं ज़ान्हूं लाई उटी बाखा चुशी करै। 7 तेखअ बोलअ बिधाता गिदोना लै, "मुंह दैणीं ताल्है मिद्यानी का इना चिई शौआ मणछा करै ज़ीत ज़ुंणीं चाकल़ी करै पाणीं झुटअ। इना होरी बोल सोभी लै आपणैं घअरा लै डेओआ बापस फिरी।"

8 गिदोनै छ़ाडै होर सोभै इज़राईली तिन्‍नें डेरै लै बापस चाकल़ी करै, पाणीं झुटणैं आल़ै चअन शौ रहै गिदोना संघै। तिन्‍नैं बान्हीं आप्पू संघै ज़िणस अर हाथै लऐ आपणैं-आपणैं नर्शिंगै। मिद्यानी तै तिन्‍नां का धारा उंधै सरलै खागा दी।

9 तैहा राची किअ बिधाता गिदोन लै हुकम, "उझ़ू, संघा पल़ मिद्यानीए दला दी चुटी, मंऐं हेरअ तूह इना का ज़ताऊई। 10 ज़ै तूह अज़ी बी डरा, तै डेऊ आपणैं दास फूरा संघै उंधै मिद्यानी लोगे खिम्भे दला नेल़। 11 तिधी जाणीं ताखा गल्‍ला शुण्हुंई कि तिन्‍नां मांझ़ै किज़ै गल्‍ला आसा लागी दी अर तेखअ जाणीं ताह इना गोटणें हिम्मत एछी।"

गिदोन अर तेऊओ दास फूरा डेऊऐ उंधै पुंझ़ा बाखा मिद्यानी सैने खिम्भे दला नेल़ ज़िहै। 12 मिद्यानी, अमोलकी अर पुर्बा बाखे देशे सैना ती सऊंऐं मुल्खै रैट्टै छ़ुंढा ज़िहै सारै दी बेठै दै अर तिन्‍नें ऊँट थिऐ समुंदरे रेता ज़िहै खास्सै।

13 ज़ांऊं गिदोन तिन्‍नें एकी खिम्भा नेल़ डेऊअ, तेऊ शूणअ कि भितरी आसा एक मणछ आपणैं सुपनै खोज़दअ लागअ द। सह मणछ खोज़ा इहअ, "मुंह हुअ सुपनअ कि ज़ौओ एक बुटूहरू पल़अ घुर्ही करै मिद्यानीए खिम्भे दला लै अर डेरै लै लागी तेता करै इहअ ढेस्सअ कि डेरअ ढूल़अ!"

14 तेऊओ साथी ज़ुंण सुपनै शूणअ त लागअ द, तेऊ दैनअ ज़बाब, "अह आसा इज़राईलीए तलबार, जोआशो शोहरू गिदोन! एऊ सुपनैओ फल आसा अह ई! तेऊ ई लै दैनी परमेशरै मिद्यान अर तेते सारी सैना प्रैंदै ज़ीत!"

15 तेऊ सुपनै अर तेतो फल शूणीं बेठअ गिदोन ज़ान्हूं लाई धरनीं संघा टेक्‍कअ बिधाता लै माथअ। तेखअ डेओआ सह पिछ़ू आपणैं इज़राईली डेरै लै संघा बोलअ, "उझ़िआ! बिधाता लाऐ तम्हैं मिद्यानी सैना का ज़ताऊई।"

16 तेखअ बणाऐं गिदोनै तिन्‍नां चिई शौआ मणछे चअन छ़ुंढ अर एकी-एकी आदमीए हाथै दैनै एक-एक नर्शिंगै, एक-एक रित्तै गाडल़ू अर एक-एक मसाल्‍लै। 17 तेखअ बोलअ गिदोनै तिन्‍नां लै, "हुंह डेऊं मिद्यानी दले खिम्भे डेरे पुंझ़ा तैणीं, तम्हैं रहै मुंह भाल़ै लागी, ज़िहअ-ज़िहअ हुंह करूं तम्हैं बी करै तिहअ ई। 18 ज़ेभै हुंह अर मेरै साथी नर्शिंगै बाज़े, तेभै बाज़ै तम्हैं बी फेरा का नर्शिंगै संघा पाऐ ज़ोरै-ज़ोरै इहअ हाल्‍लअ, ‘बिधाते ज़ीत अर गिदोने ज़ीत।’"

19 राचकै दुजै पहरै ज़ांऊं पहरीए बदल़ी हुई, गिदोन अर तेऊए एक शौ साथी डेऊऐ मिद्यानीए दला नेल़ पुंझ़ै तैणीं। तेखअ बाज़ै तिन्‍नैं ज़ोरै नर्शिंगै अर आपणैं हाथै तिंयां गाडल़ू पाऐ ज़ोरै फाल़ी, 20 होरी दूई छ़ुंढै बी किअ तिहअ ई। खिंज़ै हाथै मसाल्‍लै अर खाणैं हाथै नर्शिंगै ढाकी पाअ तिन्‍नैं ज़ोरै-ज़ोरै हाल्‍लअ, "बिधाता लै जुध अर गिदोना लै जुध!"

21 तिंयां रहै सोभै मिद्यानी खिम्भे दला फेर खल़्हुई अर मिद्यानी सारी सैना ठुर्ही तेऊ हाल्‍लै शूणीं तिधा का च़ऊ पाओऐ। 22 ज़ांऊं गिदोन अर तेऊए साथी चअन शौ नर्शिंगै नभैऊशै बाज़ै, बिधाता किअ इहअ कि दुशमणे सैना बाही आप्पू मांझ़ै एकी-दुजै लै तलबारै। तिंयां ठुर्है सरेरा नगरी बाखा बेथ-शिता अर तबात नगरी नेल़ अबेल-मेहोला तैणीं। ✝

23 तेखअ हुऐ इज़राईली नप्ताली, आशेर अर मनिश्शे गोत्रे मणछ कठा अर तिंयां पल़ै मिद्यानी सैना पिछ़ू चुटी। 24 एप्रैमे धारा बाखे मुल्खा लै छ़ाडअ गिदोने दूत इहअ समाद खोज़दअ, "मिद्यानी संघै च़िखदै होथा ऐबै उंधै। जरदण नदी अर बेत-बारा गाडा तैणीं बाहा घेरअ ताकि मिद्यानी पार नां टपी सके।" एप्रैमी किअ कठा हई जरदण नदी बेतबारा गाडा तैणीं कबज़अ। 25 तिन्‍नैं किऐ दूई मिद्यानी प्रधान ओरेब अर ज़ीब बी कैद। ओरेबे पाअ तिन्‍नैं ओरेब नाओंए टोल्हा* प्रैंदै मारी अर ज़ीब मारअ दाखे कोल्हू सेटा*। तिंयां रहै मिद्यानी पिछ़ू पल़ी अर ओरेब अर ज़ीबे मूंड आणै काटी जरदण नदी पुर्बा बाखा गिदोना सेटा।✝