पांच़ 8

मिद्यानीए सारी हार

1 तेखअ बोलअ एप्रैमी लोगै गिदोना लै इहअ, "मिद्यानी संघै जुधा लै डेऊंदी तंऐं हाम्हैं किल्है निं शादै? तंऐं हाम्हां संघै इहअ बर्ताअ किल्है किअ?" एऊ रोश्शै हुऐ तिन्‍नां तिधी खास्सै बैंस।

2 पर गिदोने बोलअ तिन्‍नां लै इहअ, "मंऐं निं तम्हां बराबर किछ़ बी किअ! बादा का एछी बी किअ तम्हैं तेता का बी खास्सअ ज़ेतरअ मंऐं किअ। तम्हैं एप्रैमी मांझ़ै धख ज़िहै किअ मेरी एबीएजेर सारी टोली का कई गुणा खास्सअ। 3 ✝8:3 भज. 83:11परमेशरै दैनअ तम्हां लै इहअ बल कि थारै हाथै हुई मिद्यानी दूई प्रधान ओरेब अर ज़ीबे मौत। थारै एऊ कामां सेटा निं मंऐं किअ ई किछ़ै आथी।" गिदोने इना गल्‍ला शूणीं हुऐ तिन्‍नें रोश्श ठांढै।

4 तेखअ आऐ गिदोन अर तेऊए तिंयां चअन शौ साथी जरदण नदी लै संघा टपै पार बाखा। तिंयां थिऐ खास्सै थकी गऐ दै पर तज़ी बी रहै तिंयां दुशमणा दरल़ाऊंदै लागी। 5 ज़ांऊं तिंयां सक्‍कोत आऐ, तिधी बोलअ गिदोने नगरीए एकी मणछा का, "मुंह संघै इना आदमी लै दैआ धख-धख रोटी। ईंयां आसा खास्सै थकै दै, हाम्हैं आसा जेबाह अर सल्मुना दूई मिद्यानी राज़े पिछ़ै करदै लागै दै।"

6 सक्‍कोत नगरीए सैणैं दैनअ गिदोना लै ज़बाब, "हाम्हां कै पल़ी तेरै आदमी लै रोटी खैऊणें, तंऐं कै जेबाह अर सल्मुना कैद हेरै करी?"

7 गिदोनै दैनअ तिन्‍नां लै ज़बाब, "धिरअ बै तै, ज़ेभै बिधाता जेबाह अर सल्मुना का हाम्हां लै ज़ीत दैई हेरे तेभै रल़ाकणै मुंह तम्हैं रेगीस्ताने झ़रीली कुंगशी करै।"

8 तिधा का डेऊअ गिदोन पनूएल नगरी, तिधी लागअ सह तिन्‍नां का रोटी मांगदअ पर पनूएल नगरीए बी दैनअ तिन्‍नां लै सक्‍कोत नगरी आल़ै ई ज़िहअ ज़बाब। 9 गिदोने बोलअ तिन्‍नां लै बी इहअ, "ज़ेभै हुंह जुध ज़िती करै राज्ज़ी-राम्बल़अ फिरी एछे, तेभै पाणअ मुंह थारअ अह उछ़टअ कोट ढोल़ी!"

10 ज़ेबाह अर सल्मुना तै आपणीं सैना संघी कर्कोर नाओंए ज़ैगा। तिन्‍नां संघै तै सैना दी कोई पंद्रा हज़ार मणछ बच़ै दै अर एक लाख बिह हज़ार सपाही पाऐ तै तिन्‍नें मारी। 11 गिदोन डेओआ रेगीस्ताने बाढा बातीए बाता नेबो अर जोगबाह पुर्बा बाखा संघा दैनअ निहंचै बेठी दी तैहा बच़ी दी सैना लै नच़ानक फेरा-फेर गोट। 12 मिद्यानी राज़ै जेबाह अर सल्मुना पल़अ तिधा का ठुहर्नअ पर गिदोने किअ तिन्‍नों पिछ़अ संघा हेरै तिंयां ढाकी अर मिद्यानीए बाकी सारी सैना ठुर्ही तिधा का कज़ेस्सी।

13 ज़ांऊं जोआशो शोहरू गिदोन जुधा का बापस हटदी हेरेस धारे कुआल़ी पुजअ, 14 तिधी पुछ़अ तेऊ सक्‍कोत नगरीए एकी खारकै मणछा का अर तेऊ बझ़ैल़ै गिदोना लै सतत्तर सैणैंओ नाअं गराअं लिखणैं। 15 तेखअ डेऊअ गिदोन सक्‍कोत, संघा बोलअ तिधे लोगा लै इहअ, "आद करा कि तम्हैं मेरी मज़त करना लै किहै हुधूऐ तै! तम्हैं तै तिंयां इहअ बोल़णैं आल़ै, ‘हाम्हां कै पल़ी तेरै आदमी लै रोटी खैऊणें, तंऐं कै जेबाह अर सल्मुना कैद हेरै करी?’"

16 तेखअ ढाकै गिदोने नगरीए सैणैं संघा भल़ाकै तिंयां रेगीस्ताने झ़रीली कुंगशी करै। 17 गिदोनै अर तेऊए साथी पाअ पनूएलो उछ़टअ कोट✝8:17 कोट पांच़ 8:9 ढोल़ी अर नगरीए कई मर्ध पाऐ मारी।

18 तेखअ पुछ़अ गिदोने ज़ेबाह अर सल्मुना का, "ज़ुंण मणछ तंऐं ताबोर मारी पाऐ तै तिंयां किहै तै?" तिन्‍नैं दैनअ ज़बाब, "तिंयां थिऐ हेरनै ताह ज़िहै, तिंयां सोभै ज़ाण्हिंआं तै राज़े टिक्‍कै ज़िहै।"

19 गिदोने बोलअ इहअ, "तिंयां सोभै तै मेरै भाई-बंध, हाम्हैं आसा सोभै एकी माए। हुंह काढा बिधाते सोह, ज़ै तम्हैं तिंयां मारै निं हंदै, तै निं मुंह बी तम्हैं मारनै तै।"

20 तेखअ बोलअ गिदोने आपणैं ज़ेठै शोहरू जतेरा लै, "डेओआ, इना करा मारी हक्‍क!" पर तेऊ शोहरू निं आपणीं तलबार खिंच़ी। सह थिअ अज़ी शोहरू अर तैही डरअ सह।

21 एता लै बोलअ जेबाह अर सल्मुना गिदोना लै इहअ, "तूह मार हाम्हां आप्पै। ज़िहअ मर्ध तिहअ लोल़ी ज़ोर बी।" तेखअ मारै गिदोने तिंयां दुहै आप्पै अर तिन्‍नें ऊँटे गल़ै ज़ुंण हार थिऐ तिंयां काढै आप्पू लै। 22 तेखअ बोलअ इज़राईली गिदोना लै इहअ, "तूह कर हाम्हां प्रैंदै राज़ अर ताह बाद लोल़ी तेरै पोचै अर पल़पोचै तैणीं हाम्हां प्रैंदै राज़ किअ। किल्हैकि तंऐं बच़ाऊऐ हाम्हैं मिद्यानी का।" 23 गिदोने दैनअ तिन्‍नां लै इहअ ज़बाब, "नां मुंह तम्हां प्रैंदै राज़ करनअ अर नां आजू मेरै शोहरू। तम्हां प्रैंदै राज़ करनै आल़अ राज़अ हणअ बिधाता आप्पै।" ✝8:23 1 शमू. 8:12

24 पर गिदोने बोली तिन्‍नां लै एही गल्‍ल, "पर हुंह मांगा तम्हां का इहअ कि ज़ुंण तम्हैं सुन्‍नें कनऊज़ू आसा लुटै दै तिन्‍नां दैआ तम्हैं सोभै मुल्है।" मिद्यानी लोग तै इशमाईले आद-लुआद अर तिन्‍नैं हआ तै कानै सुन्‍नें कनऊज़ू बान्हैं दै।

25 इज़राईली बोलअ गिदोना लै इहअ, "हाम्हां दैणैं ताल्है तिंयां खुशी-खुशी।" तिन्‍नैं छ़ैअ धरनीं च़ादरू संघा पाऐ तिंयां कनऊज़ू तेथ ज़ुंण तिन्‍नैं जुधा का लुटै तै। 26 तिंयां सुन्‍नें कनऊज़ू निखल़ै तोली करै उन्‍नीं किलू।*8:26 उन्‍नीं किलू। सात शौ शकेल च़ंदर हार, शल़ुम्हणूं, बैंज़णीं रांगे झिकल़ै ज़ुंण मिद्यानी राज़ै बान्हां तै अर तिन्‍नें ऊँटे गल़े हार तै तेता का लाऊआ। 27 गिदोने बणाईं तेऊ सुन्‍नें एक मुहुर्ती संघा निंईं ओफरा नगरी लै ज़िधी सह रहा त! बादा का लागै इज़राईली कंज़री ज़िहै बिधाता छ़ाडी तैहा मुहुर्तीए पूज़ा करदै! इहअ करै खटी गिदोने आप्पू अर आपणैं घअरा आल़ै लै फाही।✝8:27 1 शमू. 14:18

28 मिद्यानी, हेरै इज़राईली ठिंहीं अर तेखअ निं आजू तिंयां इज़राईली सम्हनै खल़ै हई सकै। गिदोने ज़िऊंदी ज़िता रही आजू च़ाल़्ही साला तैणीं तेऊ देशै सुख-शांती।

गिदोने मौत

29 गिदोन*8:29 गिदोन गिदोनो दुजअ नाअं त जरूब्बाल डेऊअ आपणैं घअरा लै संघा लागअ तिधी रहंदअ। 30 तेऊए तै सत्तर शोहरू किल्हैकि तेऊ ती खास्सी बेटल़ी आणी दी। 31 शकेम नगरी ती तेऊ एक होर बेटल़ी डाही दी अर तैहा का बी हुअ तेऊओ एक शोहरू अर गिदोने डाहअ तेऊ शोहरू नाअं अबीमोलक। 32 ज़ांऊं जोआशो शोहरू गिदोन खास्सअ प्रोढअ हुअ, तेखअ गअ सह ज़ांऐं। एबीएजेर टोली आल़ै रहा तै ओफरा नगरी अर सह डाहअ तिन्‍नैं तिधी दाबी ज़िधी तेऊओ बाब जोआश दाबअ त।

33 गिदोना मरनै का बाद किअ इज़राईली भिई बिधाता संघै विश्वास घात, संघा लागै तिंयां बाल देअआ पूज़दै। तिन्‍नैं बणाअं बाल-बरीत*8:33 बाल-बरीत करारो देबतअ नाओं देअ आपणअ कुल़ज! 34 तेखअ बिस्सरुऐ इज़राईली आपणैं परमेशर बिधाता पठी ज़ुंणीं तिंयां तिन्‍नें सोभी दुशमणा का बच़ाऊई राज्ज़ी-राम्बल़ै तै डाहै दै। 35 गिदोने टबरा संघै बी निं तिन्‍नैं आजू भलअ बर्ताअ किअ ज़ुंणीं इज़राईली लै एतरअ खास्सअ भलअ किअ।