1 ज़ांऊं एहूद मूंअ, तेखअ गऐ इज़राईली भिई तिहै ई पाप करदै लागी ज़ेता का बिधाता नफरत करा। 2 बिधाता बी दैनअ तिन्‍नां कनानी राज़े ज़ाबने गलामी दी डेऊणैं ज़ुंण हसोर नगरी का राज़ करा त। तेऊए सैनो सैनापति थिअ सिसरा अर सह थिअ पराई ज़ातीए हरशेत नगरी का। 3 सिसरा का थिऐ नौ शौ लोहे रथ अर तेऊ किअ आपणैं राज़ा दी इज़राईली प्रैंदै बिहा साला तैणीं खास्सअ नर्दैई राज़। तेखअ लागै इज़राईली भिई बिधाता सेटा लेर-पकार पाई मज़त मांगदै।

4 तेऊ ज़मानै ती लपदोते लाल़ी दबोरा *गूर अर इज़राईलीए पांच़ बणी नसाफ करदी लागी दी।✝ 5 सह हआ ती एप्रैम गोत्रे हेस्सै आऐ दै धारा बाखे मुल्खै खज़ूरे बूटा आल़ै दहल़ै बेठी दी ज़ुंण ज़ैगा रामाह अर बेतेल नगरी मांझ़ै आसा। इज़राईली रहा तै तिधी तैहा सेटा आपणैं फैंसलै करदै डेऊंदै लागी कि सह नसाफ करे। 6 एकी बारी शादअ तैहा अबनोमो शोहरू बराक ज़ुंण नप्तालीए कादेश नगरी का थिअ। तैहा बोलअ तेऊ लै इहअ, "इज़राईलीओ परमेशर बिधाता किअ ताल्है इहअ हुकम, ‘नप्ताली अर ज़बलून गोत्रा मांझ़ै छ़ांट दस हज़ार मर्ध, संघा डेऊ तिन्‍नां आप्पू संघै निंईं ताबोर धारा लै।✝ 7 मुंह आणनअ ज़बीन राज़ैओ सैनापति सिसर तेऊए रथा अर सैना संघी किशोन गाडा तैणीं ताह संघै जुधा करदअ अर मुंह हेरनअ तूह तेऊ का आप्पू ज़ताऊई।’"

8 बराकै दैनअ दबोरा लै ज़बाब, "ज़ै तूह बी मुंह संघै च़ाल्‍लै, तै डेऊणअ मुंह, ज़ै नांईं, तै निं हुंह बी च़ाल्‍लअ।"

9 दबोरा दैनअ तेऊ लै ज़बाब, "च़ल्‍ल ठीक आ, हुंह एछूं ताह संघै, तेखअ निं हेरे एऊ जुधा ज़ितणें तेरी सर्राफी हणीं, किल्हैकि बिधाता हणअ सिसरा संघै सह जुध बेटल़ीए हाथै ज़ताऊअ द।" इहअ बोली डेऊई दबोरा बराका संघै कादेश नगरी लै। 10 बराकै शादै ज़बलून अर नप्ताली गोत्रे लोग कादेश मुल्खा लै अर तेऊ संघै लागै दस हज़ार मर्ध उझै हांढदै अर दबोरा बी डेऊई तिन्‍नां संघै।

11 कैनी टोली मांझ़ै त हेबेर नाओं मणछ आपणीं टोली का ज़ुदअ ज़िहअ सान्‍नीम नाओंए ज़ैगा नेल़ बडै महरूए बूटा सेटा बस्सअ द। सह थिअ मोसा गूरे नातीए होबाबे खिंबा का।

12 ज़ांऊं सिसरा का थोघ लागअ कि अबनोमो शोहरू बराक गअ आपणैं आदमी संघै उझै तबेर धारा प्रैंदै पुजी, 13 तेखअ शादै सिसरे आपणैं नौ शौ लोहे रथ अर सारी सैना संघा छ़ाडै पराई ज़ातीए नगरी हरशेता का किशोन गाडा तैणीं।

14 तेखअ बोलअ दबोरा बराका लै, "च़ाल्‍ला, तम्हां आजू आसा बिधाता आप्पै लागअ द हांढदअ! तेऊ हेरै तम्हैं सिसरा का ज़ताऊई।" बराक होथअ आपणैं दस हज़ार मर्धा संघा निंईं धारा का उंधै। 15 ज़ांऊं बराक आपणीं सैना करै सिसरा अर तेऊए सैना लै घेरअ बाहअ, बिधाता दैनअ सिसरा अर तेऊए सोभी रथा अर सारी सैना हारनै। सिसरा पल़अ आपणैं रथा का उंधै होथणअ संघा ठुर्हअ तिधा का दूर।✝ 16 बराक पल़अ आपणैं आदमी संघी पराई ज़ातीए हरशेत नगरी तैणीं रथा अर सैना पिछ़ू अर सिसरे सारी सैना किई तिन्‍नैं मारी खतम अर तिन्‍नां मांझ़ै निं एक बी बच़अ।✝ 17 सिसरा निखल़अ एक्‍कै ठुर्ही दूर संघा पुजअ कैनी ज़ातीए हेबेरे लाल़ी ज़ाएले डेरै किल्हैकि हसोरे राज़ै ज़ाबीन अर हेबेरे टोलीओ थिअ आप्पू मांझ़ै खास्सअ मेल़-ज़ोल़। 18 ज़ाएले निखल़ी बागा लै संघा बोलअ सिसरा लै इहअ, "हे मेरै मालक, मेरै डेरै भितरा लै एछ, तूह निं डरै आथी।" सिसरा डेऊअ तेसे डेरै भितरी अर तैहा डाहअ सह दोहल़ू हेठै बुदरी। 19 थोल़ी घल़ी बाद बोलअ सिसरा तैहा लै, "मुंह आसा चिश लागी दी, मुल्है दै धख ज़िहअ पाणीं।" ज़ाएले दैनअ तेऊ लै दुधे शिंगी का दुध झुटणा लै संघा डाहअ सह भिई दोहल़ू हेठै बुदरी। 20 सिसरा बोलअ तैहा लै इहअ, "तूह रहअ दुआरै खल़्हुई, ज़ै कुंण एछे अर ताखा पुछ़े, ‘इधी कुंण आदमी किनी आअ?’ तूह बोलै, ‘एसी निं कोहै आअ।’"

21 सिसरा थिअ खास्सअ थक्‍कअ द अर तेऊ आऐ नढैऊऐ नींज। ज़ाएले कै किअ आ, तैहा च़कअ ठोल्‍लू अर खिम्भे राश्शी बान्हणें तिछी खुंढी संघा डेऊई च़ुप्प-च़ुप्पै तेऊ सेटा अर तैहा टोक्‍की ठोल्‍लू करै सह खुंढी तेऊए काना पिछ़ू एही ज़ोरै बाही कि सह खुभी दुजै काना बाती उंधै धरनीं अर सिसरा हुअ मरी हक्‍क। 22 ज़ांऊं बराक पिछ़ू सिसरा लोल़अ तेस्सी आअ, ज़ाएले डेऊई तेऊ सेटा संघा बोलअ तेऊ लै इहअ, "ओर्ही एछ मुंह संघै, हुंह रहैऊं ताखा तेऊ ज़हा तूह लोल़अ आसा लागअ द।" सह डेऊअ तैहा संघै तेसे डेरै लै अर तेऊ भाल़अ सिसरा तिधी धरनीं मूंअ द अर तेऊए काना बाती ती खुंढी खभेऊई दी। 23 तैहा धैल़ी दैनी बिधाता इज़राईली लै कनानी राज़ै ज़ाबना का ज़ीत। 24 तेखअ रहै इज़राईली कनाने राज़ै छेऊंदै लागी ज़ांऊं तैणीं सह पठी बरैबाद निं हुअ।