पांच़ 20

इज़राईली तैर्हुऐ जुधा लै

1 तेखअ हुऐ सोभ इज़राईली कठा। तिंयां आऐ उतरा बाखा दान मुल्खा उंधै दखण बेर्शेबा तैणीं*20:1 उतरा बाखा दान मुल्खा उंधै दखण बेर्शेबा तैणीं अह ती इज़राईली मांझ़ै सोभी इज़राईलीए बारै खोज़णा लै एक कहाबत अर जरदण नदी पुर्बा बाखा गलाद मुल्खा ओर्ही सारै इज़राईल देशा का, संघा किअ मिज़पा नगरी बिधाता सेटा झाल़अ। 2 इज़राईली सैणैं बी तै तिधी परमेशरे परज़ा संघै। तिन्‍नां मांझ़ै तै च़ार लाख तलबारा लै सज़ाण पैदल सपाही। 3 बिन्यामीन गोत्रा आल़ै का लागअ थोघ कि होर इज़राईली हुऐ मिज़पा कठा।

तिंयां इज़राईली लागै पुछ़दै, "खोज़ा, अह इहअ घोर ज़ुल्म किहअ करै हुअ?"

4 सह लेबी ज़सरी डाही दी बेटल़ीए हत्या हुई ती, तेऊ दैनअ ज़बाब, "हुंह अर मेरी डाही दी बेटल़ी पुजै बिन्यामीन मुल्खे गिबा नगरी संघा रहै राची काटणा लै तिधी। 5 गिबा नगरीए लोग आऐ राची संघा गोटअ हुंह घअरा भितरी फेरा-फेर। तिन्‍नों बच़ार ता थिअ मुंह मारनैओ, तेते बदल़ै किअ तिन्‍नैं मेरी डाही दी बेटल़ी संघै सारी राची पाप करी एही बूरी दशा कि तेसे हुई मौत ई। 6 मंऐं आणी तेसे ल्हास घअरा लै, तेखअ किऐ तेसे ठोर-ठोर संघा पजैल़ै मंऐं तिंयां इज़राईले सोभी गोत्रा सेटा एक-एक ठोर। ताकि इहअ थोघ लागे गिबा नगरीए लोगै*20:6 गिबा नगरीए लोगै तेथ रहा तै बिन्यामीन गोत्रे लोग किअ हाम्हां मांझ़ै इहअ घोर पाप अर घोर ज़ुल्म! 7 तम्हैं इज़राईली आसा आझ़ इधी, ऐबै भाल़ा तम्हैं सोभै संघा खोज़ा कि एता लै किज़ै करनअ?"

8 सोभै लोग उझ़ुऐ एक मन्‍न हई खल़ै संघा बोलअ इहअ, "हाम्हां मांझ़ै नां कुंण आपणैं डेरै लै डेऊणअ नां ऐबै आपणैं घअरा बाखा फिरनअ। 9 हाम्हां करनअ इहअ-इहअ कि हाम्हां पाणीं परच़ी संघा छ़ांटणैं आप्पू मांझ़ा का आदमी ज़ुंण गिबा नगरी लै चुटी पल़े। 10 हाम्हां सोभी इज़राईली गोत्रा मांझ़ै हणैं शौआ मांझ़ै दस, हज़ारा मांझ़ै शौ अर दस हज़ारा मांझ़ै एक हज़ार मणछ सपाही खाणैं-पिणें पजैल़णैं आल़ै। बाकी सोभै डेऊणैं बिन्यामीन गोत्रे गिबा नगरीए लोगा लै तेते सज़ा दैंदै ज़ुंण घोर पाप तिन्‍नैं इज़राईला दी किअ।"

11 इहअ करै हुऐ सोभै इज़राईली एक मन्‍न एकी ई गल्‍ला करना लै कि गिबा नगरीए लोगा लै दैणीं सज़ा।

12 इज़राईली छ़ाडै आपणैं आदमी बिन्यामीन गोत्रे सारै मुल्खै, तिन्‍नां लै इहअ बोल्दै, "अह किहअ घोर ज़ुल्म आसा ज़ुंण तम्हां जैंदरी हुअ? 13 गिबा नगरीए तिन्‍नां कदुष्ट मणछा सभाल़ा हाम्हां का ताकि हाम्हैं तिन्‍नां मारी करै इज़राईली मांझ़ा का एही बूराई गोधी का खतम करे।" पर बिन्यामीन गोत्रे लोगै किई तिन्‍नां होरी इज़राईलीए ईंयां गल्‍ला शूणीं नां शूणीं।

14 बिन्यामीन मुल्खे सोभी नगरीए लोग हुऐ गिबा नगरी कठा कि तिंयां बाकी इज़राईली संघै मकाबलअ करे! 15 बिन्यामीन गोत्रा का थिऐ छब्बी हज़ार सपाही ज़ुंण तलबारा करै जुधा लै सज़ाण तै, अर सात शौ शूरबीर थिऐ गिबा नगरी तेता का लाऊआ। 16 ऐहा एतरी सैना मांझ़ै तै सात शौ खज़ैथू सपाही, तिंयां थिऐ फर्णैक्‍की करै पात्थरा बाहणैं आल़ै इहै मशूर कि तिन्‍नों लागा त हर पात्थर नशाणैं दी। 17 बिन्यामीन गोत्रे लोगा छ़ाडी होरी सोभी इज़राईली का थिऐ च़ार लाख तलबार आल़ै सज़ाण शूरबीर सपाही।

बिन्यामीन गोत्रा संघै जुध

18 सोभै इज़राईली डेऊऐ बिधाते पबित्र ज़ैगा बेतेल बिधाता पुछ़दै, तिन्‍नैं पुछ़अ इहअ, "बिन्यामीन गोत्रा संघै जुधा लै कहा गोत्रा लै दैआ तूह सोभी का आजी डेऊणैं ज़ाज़त?"

बिधाता दैनी यहूदा गोत्रा लै सोभी का आजी डेऊणैं ज़ाज़त।

19 दुजै धैल़ै दोत्ती डेऊऐ इज़राईली संघा पाऐ गिबा नगरी नेल़ डेरै। 20 तिंयां निखल़ै बिन्यामीन सैना संघै जुधा लै संघा बान्हैं जुध छ़ेल़णां लै दल। 21 बिन्यामीन गोत्रे सपाही निखल़ै गिबा नगरी बागै अर उडै तैणीं पाऐ तिन्‍नैं बाई हज़ार इज़राईली सपाही मारी।

22,23 तेखअ डेऊऐ इज़राईली बिधाते पबित्र ज़ैगा संघा रहै उडै तैणीं लेरा लांदै लागी। तेखअ लागै तिंयां बिधाता पुछ़दै, "हाम्हां बिन्यामीन गोत्रा संघै भिई जुध छ़ेल़ूं कि नांईं? एही आसा तिंयां म्हारै ई भाई-बंध!"

बिधाता दैनअ ज़बाब, "हाँ।"

तेखअ दैनअ इज़राईली सैना एकी-दुजै लै हैअ कि एभकी बारी लल़णअ हाम्हां खास्सी हिम्मत डाही जुध। दुजै धैल़ै डेऊऐ तिंयां भिई गिबा नगरी लै संघा हुऐ दल बान्हीं जुधा लै तैर। 24 तेखअ निखल़ै इज़राईली दुजी बारी बिन्यामीन गोत्रा संघै जुधा लै, 25 अर दुजी बारी बी निखल़ै बिन्यामीने सपाही गिबा नगरी का बागै इज़राईली संघै जुधा लै अर तिन्‍नैं पाऐ इज़राईलीए ठारा हज़ार तलबारा आल़ै सज़ाण सपाही मारी!

26 तेखअ डेऊऐ सोभै इज़राईली भिई बेतेल संघा लागै बिधाते पबित्र ज़ैगा लेरा लाई शोग करदै, तिंयां रहै सान्हां तैणीं तिधी भुखै-नचिशै बेशी। तेखअ किई तिन्‍नैं बिधाता लै हूम अर मेल़-ज़ोल़ो बल़ीदान बी।

27,28 बिधातो करारो मणशू थिअ तिन्‍नां धैल़ै बेतेल ई। एलीआजरे शोहरू, हारणे पोचै पिनहास प्रोहता का थिई तेते च़ाकरीए ज़िम्मैंबारी। इज़राईली लागै पुछ़दै, "तूह किहअ बोला, हाम्हैं आपणैं भाई-बंध बिन्यामीन गोत्रा संघै एकी बारी भिई डेऊं जुधा लै कि ऐबै छ़ाड़ पाऊंमै?"

बिधाता दैनअ तिन्‍नां लै ज़बाब, "जुध लल़ा, काल्‍ला दैणीं मुंह तम्हां लै ज़ीत।"

29 तेखअ रहै इज़राईली गिबा नगरी फेर-फिरदै लुक्‍की करै ताखुई।✝20:29 ज़ैह. 8:4 30 दुजै धैल़ै बान्हैं तिन्‍नैं गिबा नगरी संघै जुधा लै चिऊथी बारी तिहै ई दल ज़िहै तिन्‍नैं पैहली दूई बारी किअ त। 31 एभकी बारी बी निखल़ै बिन्यामीन गोत्रे सपाही तिहै ई नगरी बागै जुधा लै अर इज़राईली ठुर्है नगरी का दूर, ताकि बिन्यामीन गोत्रे सैना तिन्‍नों पिछ़अ करे। बिन्यामीन गोत्रे लागै तिहै ई इज़राईली मारदै। गिबा का बेतेल डेऊणैं बाता अर सऊंई ज़ैगा मारै तिन्‍नैं तधू कोई तिह इज़राईली।

32 बिन्यामीन आल़ै लागै इहअ बोल्दै, "ज़िहै ईंयां पैहलै मारै तै, आझ़ लागै द ईंयां तिहै ई मरदै।"

पर होरी इज़राईली थिई एही तरकीब बणाईं दी, "हाम्हां ठुहर्नअ इना का दूर ताकि ईंयां नगरीए खुल्ही ज़ैगा का बाता-बणैं एछे।"

33 ज़ांऊं इज़राईलीए खास सैना बालतामार नाओंए ज़ैगा पिछ़ू फिरी दल बान्हैं, अर पिछ़ू ज़ुंण गिबा नगरी फेर पिछ़ू ताखुई तै रहै दै, तिंयां बी निखल़ै नच़ानक अर 34 इज़राईलीए दस हज़ार खास छ़ांटै दै शूरबीर पल़ै गिबा नगरी चुटी। तेखअ हुअ तिधी घणअ जुध। बिन्यामीन गोत्रा आल़ै निं इहअ ज़ाणअ ई आथी कि तिंयां आणनैं खतम करने ताका। 35 इहअ करै दैनी बिधाता इज़राईली लै बिन्यामीने सैना का ज़ीत। तैहा धैल़ी पाऐ इज़राईली तिन्‍नें पच्‍ची हज़ार एक शौ सपाही मारी अर 36 तेखअ हेरअ बिन्यामीनी ज़ाणीं कि ऐबै हारै हाम्हैं।

इहअ करी ज़ितै इज़राईली

इज़राईली ठुर्है बिन्यामीन गोत्रा का दूर कि तिंयां तिन्‍नों पिछ़अ करे, तिन्‍नां थिअ आपणैं तिन्‍नां सपाहीओ भरोस्सअ ज़ुंण गिबा नगरी फेर लुक्‍की करै ताखुई थिऐ रहै दै। 37,38 इज़राईली तै तिन्‍नां इज़राईली सपाही का शारै डाहै दै खोज़ी ज़ुंण नगरी फेर लुक्‍की करै ताखुई तै रहै दै। सह शारअ त इहअ कि नगरी दी चैल़ै आग संघा लोल़ी उझै धूँओ बडअ बादल़ उझ़ुअ। ज़ुंण सपाही पिछ़ू लुक्‍की करै ताखुई तै रहै दै, तिंयां पल़ै नगरी दी चुटी अर तिन्‍नैं पाऐ नगरी दी खास्सै मणछ मारी अर नगरी दी चैल़ी आग। 39 तेतरी तै होर इज़राईली जुधे ज़ैगा का दूर ठुर्ही ओर्ही-पोर्ही छिंघदै लागै दै। बिन्यामीना आल़ै हेरै तै तिह इज़राईली मारी बी। तिन्‍नैं सोठअ इहअ कि ज़िहै हाम्हैं ईंयां पैहलै हारै, तिहै ई लागै ईंयां हारदै!

40 ज़ांऊं तिन्‍नां का धूँओ बादल़ नगरी का सरगा बाखा लै उझ़दअ शुझुअ, बिन्यामीनी लागै पिछ़ू भाल़ै अर तिंयां हुऐ हक्‍कै-बक्‍कै कि सारी नगरी आसा आग शाची दी अर सरगा बाखा लै धूँ लागअ द।

41 तेखअ ज़ुंण इज़राईली दूर तै ठुर्हदै लागै दै, तिंयां गऐ धूँ भाल़ी शारअ समझ़ी। तिंयां पल़ै तेखअ बिन्यामीनी सैना लै चुटी। बिन्यामीने सैना छ़ुटअ हेरा-हेरी दर्छ़णअ, तिन्‍नां का गअ ज़ाण्हुंई कि ऐबै पल़ी तिन्‍नां लै घोर आफ़त। 42 तिंयां ठुर्है इज़राईली का आपणीं नगरी बाखा रेगीस्ताना लै पर तिंयां निं बच़ी सकै। एकी बाखा आई इज़राईलीए बडी सैना अर दुजी बाखा आऐ नगरी दी आग चैल़ी तिंयां सपाही अर बिन्यामीनी लोगे किई तिन्‍नैं बूरी दशा। 43 इज़राईली गोटै तिंयां इहै कि तिंयां डेऊऐ तिन्‍नां मारदी-मारदी गिबा नगरीए पुर्बा बाखा तैणीं अर तिन्‍नां रहै ज़िहै नां किहै मारदै लागी। 44 बिन्यामीने ठारा हज़ार सोभी का खास शूरबीर पाऐ तिन्‍नैं मारी।

45 ज़ुंण तिन्‍नां का बच़ै तिंयां ठुर्है रमोन नाओंए बडी टोल्हा बाखा खुल्ही ज़ैगा लै। तैहा बाता पाऐ इज़राईली तिन्‍नां मांझ़ै पांज़ हज़ार ढाकी-ढाकी करै मारी। ज़ुंण तेता का बी बच़ै, तिन्‍नां मारदै ठुर्है इज़राईली गिदोम तैणीं पिछ़ू अर दूई हज़ार मारै होर बिन्यामीनी। 46 तैहा धैल़ी मारै कोई पच्‍ची हज़ार बिन्यामीनी अर तिंयां सोभै तै तलबारा करै जुध करनै आल़ै शूरबीर।

47 पर छ़ह शौ आदमी ठुर्है बणां बाखा लै संघा पुजै रमोन नाओंए बडी टोल्हा नेल़। सिधै तिंयां बच़ै अर तिंयां रहै च़ऊ भिन्‍नैं धैल़ी तैणीं तिधी। 48 तेखअ फिरै इज़राईली पिछ़ू संघा पल़ै बिन्यामीनी लै चुटी अर तिन्‍नैं पाऐ सोभ मारी। तिन्‍नैं मारै मर्ध, बेटल़ी, लान्हैं अर डागै-चैणैं बी। गिबा नगरी फेर गराऊंऐं बी चैल़ी तिन्‍नैं आग।