नहेमया संघै विश्वास घात
1 सनबलात, तोबियाह अर अरब देशो गशेम अर बाकी होरी दुशमणा का गअ थोघ लागी कि हाम्हैं हेरी गहल़े दुआल अर ढूल़ै दै कुछ़ू च़िणीं, पर अज़ी बी थिऐ हाम्हां प्रऊल़ी दी पाल्लै लाणैं बाकी रहै दै। 2 सनबलात अर गशेमै दैनअ मुल्है समाद, "ओनो खागे कहा गराऊंऐं लोल़ी तूह हाम्हां सेटा लै मिलदअ आअ।" सह थिई तिन्नें च़ाल कि किहअ करै मेरी हान्नी करे। 3 मंऐं छ़ाडै तिन्नां सेटा लै इहअ समाद दैई दूत, "हुंह आसा ज़रूरी कामां लागअ द, मुखा निं तेता छ़ाडी उंधै एछणेंओ बगत आथी। सिधअ थारै मुंहां भाल़णैं पिछ़ू निं हुंह आपणअ काम रोक्की सकदअ।"
4 तिन्नैं दैनअ मुल्है इहअ ई समाद च़ऊ बारी अर मंऐं बी दैनअ तिन्नां लै तेतरी बारी तिहअ ई ज़बाब।
5 खिरी छ़ाडअ सनबलातै मुंह सेटा आपणअ एक दास पांज़ूई बारी अर ऐहा बारी थिई एक खुल्ही च़िठी, 6 तेथ त इहअ लिखअ द, "गशेमै खोज़अ मुखा इहअ कि ओरी-पोरी देशै आसा एही फुआह पल़ी दी कि तूह अर यहूदी च़ाहा गहल़े दुआल पाक्की च़िणीं करै द्रोह करनअ अर आप्पू च़ाहा तूह राज़अ बणनअ! 7 तंऐं आसा एरुशलेम नगरी गूर इहअ प्रच़ार करदै डाहै दै लाई कि तूह आसा ऐबै यहूदा मुल्खो राज़अ। ताखा बी आसा थोघ कि अह खबर जाणीं फारसी माहा राज़ै सेटा पुजी! तै बोला हुंह ताल्है कि एछ एते बारै करनअ हाम्हां आप्पू मांझ़ै जोग।"
8 मंऐं दैनअ तेऊ लै इहअ समाद बापस, "ज़ुंण तूह बोला, तेता मांझ़ै निं एक गल्ल बी शुची आथी! तूह आसा आपणीं बाखा इना गल्ला बणाऊंदअ लागअ द।"
9 तिंयां थिऐ इहअ करै हाम्हां डरैऊंदै लागै दै कि हाम्हैं काम रोक्के। मंऐं किई सिधी एचल़ी अरज़, "हे परमेशर ऐबै दै तूह ई मुल्है बल।"
10 एकी धैल़ै डेऊअ हुंह शमयाहे घअरा लै ज़ुंण महेतबेलो पोचअ अर दलायो शोहरू आसा। सह रहा त घअरा भितरी बंद, तेऊ बोलअ मुल्है इहअ, "हाम्हां दुही डेऊणअ बिधाते भबनै पबित्र ज़ैगा संघा रहणअ भितरी लुक्की। बागा का डाहणैं हाम्हां भबने प्रऊल़ी दी शाणै लाई, किल्हैकि दुशमण च़ाहा ताह राची मारी पाणअ अर तिंयां सका कज़ेभल़ी एछी।"
11 मंऐं दैनअ तेऊ लै ज़बाब, "ठुर्हनै अर लुक्की रहणैं आल़ै मणछा ज़िहअ निं हुंह आथी! तेरअ कै मतलब हुंह मरनै का बच़णा लै बिधाते भबनै रहूं लुक्की? इहअ निं मेरै भलै हंदअ।"
12 मुखा गअ त ज़ाण्हुंई कि शमयाह बाती निं परमेशरै गल्ला किई आथी! असली दी थिअ तेऊ मुंह संघै धोखअ करना लै तोबियाह अर सनबलाता का रेशपत खाअ द। 13 तिन्नैं तै तेऊ लै ढब्बै रेशपत दैनै दै कि किहअ करै हुंह डरे अर हुंह किज़ै इहअ पाप करूं कि मेरअ नाअं बदनाम होए अर लोगा मुंह दी खोट शुझिए!
14 मंऐं किई एही अरज़, "हे परमेशर, ऐहा गल्ला डाहै आद कि तोबियाह, सनबलात, नोदिया बेटल़ी गूर अर होरी गूरै मुंह डरैऊंणा लै किज़ै-किज़ै किअ! तिन्नां लै लऐ सज़ा दैई।"
गहल़े दुआल मुक्कै च़िणीं
15 बुंजा धैल़ै बाद पच्ची भदरै मुक्कै हाम्हैं सारअ काम करी। 16 ज़ांऊं ओरी-पोरी देशै म्हारै दुशमणा का एतो थोघ लागअ कि हाम्हैं छ़ेक्कअ काम करी, तिन्नें लागअ मुंहैं पल़थण संघा हुऐ शर्मिंदै किल्हैकि तिन्नां का गअ ज़ाण्हुंई कि म्हारै परमेशर बिधाता किई म्हारी गहल़े दुआली भिई च़िणना लै मज़त।
17 तिन्नां तेतरै धैल़ै रहै यहूदी सैणैं अर तोबियाह आप्पू मांझ़ै च़िठी दी ओर्ही-पोर्ही गल्ला लागी। 18 यहूदा मुल्खै थिऐ कई लोग तोबियाह बाखा किल्हैकि आराहो शोहरू शकनया थिअ तोबियाहो शौहरअ, अर तोबियाहे शोहरू जहोहनानै थिअ बरेक्याहे शोहरू मशूलामे शोहरी संघै बैह किअ द। 19 लोग करा तै मुंह सेटा तोबियाहे भलै कामें बारै गल्ला करी संघा करा तै तेऊ का तिन्नां सोभी गल्ला खोज़ी ज़ुंण हुंह बोला त। तेखअ करा त तोबियाह मुंह डरैऊंणा लै मुल्है च़िठी दी समाद दैई।