नहेमया आअ एरुशलेम नगरी लै फिरी
1 राज़ै अर्तक्षत्रे राज़ा दी बिहुई साला च़ैत्रै त राज़अ अर्तक्षत्र राज़अ खांदअ बेठअ द, मंऐं निंयं तेऊ लै दाखो रस। तधा का पैहलै निं तेऊ हुंह इहअ दुखी कधि भाल़अ त, 2 माहा राज़ै पुछ़अ मुखा इहअ, "तंऐं किल्है आसा मुंह शेऊई डाहअ द? तूह रोगी ता आथी निं! तेरै दिलै इहअ किज़ै दुख आसा पल़अ द?"
मुंह छ़ुटअ डरै दर्छ़णअ! 3 संघा दैनअ मंऐं ज़बाब, "माहा राज़अ, तूह लोल़ी जुगै-जुगै ज़िऊअ! मेरै दिलै दुख किल्है निं हणअ कि मेरी सह नगरी आसा पठी बरैबाद हुई दी अर तैहा नगरीए प्रऊल़ी आसा आगी जैंदरी दहई-प्लुशी करै धरनीं डाही दी शोटी ज़िधी मेरै दाद-बाब आसा दाबी डाहै दै?"
4 माहा राज़ै पुछ़अ मुखा, "तूह किज़ै च़ाहा कि हुंह ताल्है करूं?"
मंऐं किई स्वर्गे परमेशरा सेटा अरज़, 5 संघा बोलअ मंऐं माहा राज़ै लै, "माहा राज़अ, हुंह आसा तेरअ दास, ज़ै तूह मुखा खुश आसा अर ज़ै तूह मेरी अरज़ शुणनी च़ाहा, तै दै मुल्है तूह यहूदा मुल्खै तैहा नगरी डेऊणे ज़ाज़त ज़िधी मेरै दाद-बाब दाबी आसा डाहै दै, ताकि हुंह तैहा नगरी भिई च़िणीं सकूं।"
6 माहा राणीं बी थिई तेऊ संघै तिधी बेठी दी अर माहा राज़ै दैनी मुल्है ज़ाज़त संघा पुछ़अ मुखा इहअ, "ताह तिधी पुजणा लै केतरै धैल़ै लागणै अर तूह फिरी केभै एछणअ?" मंऐं डाही माहा राज़ै का बापस फिरनें धैल़ी खोज़ी।
7 तेखअ किई मंऐं माहा राज़ै सेटा एही अरज़, "माहा राज़अ, मेरी आसा ताखा एही अरज़ कि तूह दै मेरै हाथै आपणीं मोहर लाई एते बारै एप्रात दरैऊआ पछ़मा बाखे मुल्खे राज़पाला लै सरकारी च़िठी लिखी, ताकि हुंह राज्ज़ी-राम्बल़अ यहूदा मुल्खै पुजी सकूं।" 8 तेखअ किई मंऐं माहा राज़ै का एही मांग, "सरकारी बणें पहरी असापा लै बी दै तूह एक च़िठी लिखी कि सह मुल्है नगरीए अर भबने प्रऊल़ी, गहल़ा अर आप्पू रहणा लै घअरा च़िणना लै काठ काढणैं दैए।" माहा राज़ै दैनअ मुल्है ज़िहअ मंऐं मांगअ तिहअ किल्हैकि परमेशर थिअ मुंह संघै।
9 माहा राज़ै छ़ाडै मुंह संघै एप्रात पछ़मा तैणीं सैने थोल़ै अफसर अर घोल़े शुंआर पल़टण बी। तिधी पुजी दैनी मंऐं माहा राज़ेए च़िठी राज़पाला का। 10 पर ज़ांऊं ईंयां गल्ला बेथ-हारोन नगरीए सनबलात अर अमोन नगरी का तोबियाह, इने दूई कार-करिंदै शूणीं कि एक मणछ आसा इज़राईलीए भलै करदअ आअ द, तिन्नां आई एता लै खास्सी रोश्शै!
11 ज़ांऊं हुंह एरुशलेम नगरी पुजअ, तेखअ रहअ हुंह चिई धैल़ै तैणीं तिधी 12 अर मंऐं निं तिधी कोही का खोज़अ कि परमेशरै एरुशलेम नगरीए भलाई लै मेरै दिलै किज़ै गल्ल आसा पज़ेरी दी। तेखअ उझ़ुअ हुंह एकी धैल़ै आधा राची खल़अ संघा निखल़अ पोर्ही बागा लै, आप्पू संघै निंयैं मंऐं मेरै धख आदमी अर पशू त हाम्हां संघै एक्कै गाधअ ज़ेथ प्रैंदै हुंह थिअ बेठअ द। 13 अज़ी ती एरुशलेम नगरी राच अर हाम्हैं निखल़ै पछ़मा बाखा नगरीए गाडा बाखे प्रऊल़ी बाती बागै मगर म्हाछ़ नाओंए कुहै बाखा लै, संघा पुजै शणैऊंआं शोटणें प्रऊल़ी तैणीं। तेस्सी बाती हांढ दैई भाल़ी मंऐं गहल़े दुआल ज़ैगै-ज़ैगै ढूल़ी दी अर आगी करै दहई-प्लुशी दी प्रऊल़ी। 14 तिधा का डेऊअ हुंह नगरीए पुर्बा बाखा हांढी उतर गाडे प्रऊल़ी अर राज़े कोफरी तैणीं। पर तिधा आजू ती बात खास्सी घाटी अर मेरअ गाधअ निं तेथ हांढी सकदअ त ज़ेथ प्रैंदै हुंह शुंआर थिअ। 15 तेखअ डेऊअ हुंह उंधै किद्रोन नाल़ा बाखा लै संघा लागअ हुंह तेथ नगरीए दुआली हेरअ-भाल़अ। तेखअ आअ हुंह राच भैणै का आजी गाडा बाखे प्रऊल़ी बाती नगरी भितरा लै फिरी।
16 तिधी निं कोही कार-करिंदै का थोघ लागअ कि हुंह किधा लै डेऊअ अर हुंह किज़ू लै डेऊअ त। इधी तैणीं कि मंऐं बी निं होरी कोही यहूदी, प्रोहत, सैणैं, कार-करिंदै अर तिन्नां यहूदी का आथी त खोज़अ ज़ुंण तिधी कामां थिऐ लागै दै। 17 पर ऐबै खोज़अ मंऐं तिन्नां का, "तम्हैं भाल़अ आपणीं आछी कि हाम्हैं एरुशलेम केही खरी काटदै आसा लागै दै, किल्हैकि एरुशलेम नगरी आसा पठी बरैबाद हुई दी अर एते प्रऊल़ी आसा दहई-प्लुशी दी! एछा, हाम्हां च़िणनी अह नगरी भिई ताकि आजू हाम्हां शर्मिंदै नां हणअ पल़े।" 18 तेखअ खोज़अ मंऐं तिन्नां का इहअ बी कि परमेशर किहअ रहअ मुंह संघै मेरी मज़त करदअ लागी अर माहा राज़ै मुल्है किज़ै बोलअ।
तिन्नैं दैनअ ज़बाब, "च़ाल्ला, हाम्हां लागणअ तै ऐबै च़िणदै!" एऊ भलै कामां करना लै तैर्हुऐ तिंयां सोभ।
19 ज़ांऊं सनबलात, अमोनी तोबियाह अर अरब देशे एकी गशेम नाओंए कार-करिंदै म्हारी ईंयां गल्ला शूणीं कि हाम्हैं लाअ इहअ खटी, तिंयां लागै हाम्हां लै हास्सदै अर इहअ बोल्दै, "तम्हैं एऊ कामां करना लै किज़ै सोठा? एता करै तम्हैं माहा राज़ै लै द्रोह च़ाहा करनअ?"
20 मंऐं दैनअ तिन्नां लै ज़बाब, "ज़ुंण परमेशर स्वर्गै आसा, तेऊ हेरनै हाम्हैं सफल करी। हाम्हैं करा तेऊए च़ाकरी अर ऐबै लाअ हाम्हैं भिई च़िणनेओ काम शुरू करी। पर थारी नां एरुशलेम नगरी ज़ैदात आथी, नां किज़ू दी हक आथी अर नां एथ थारअ इतिहास आथी।"