नहेमया 10

1 सोभी का आजी किऐ करारे कागदा दी दसकत हाकालीए शोहरू राज़पाल नहेमया अर सिदकिया प्रोहतै। तिन्‍नां संघै किऐ इनै होरी बी दसकत:

प्रोहत:

2 सरयाह, अजर्याह, जेरमयाह,

3 पशहूर, अमर्या, मलकिजा,

4 हतूश, शेबानयाह, मलूक,

5 हारीम, मरमोत, ओबेदिया,

6 दानिएल, गिनतोन, बारूक,

7 मशूलाम, अबियाह, मिजामीन,

8 माजाहा, बिलगाई अर शमयाह प्रोहत।

लेबी:

9 अजनियाहो शोहरू जेशूआ, हेनदादे आद-लुआदा मांझ़ै

बिनूई अर कदमीएल।

10 शेबानयाह, होदिया, कलीता, पलाया, हनान,

11 मिका, रहोब, हशाबिया,

12 जक्‍कूर, शेरेबयाह, शेबानयाह,

13 होदिया, बैनी अर बनीनू।

इज़राईली टोलीए सैणैं:

14 पारोश, पहात-मोआब, एलाम, ज़ाटू, बैनी,

15 बुन्‍नी अजगाद, बेबाई,

16 अदोनियाह, बिगबाई, आदीन,

17 अतेर, हिजकिया, अजूर,

18 होदिया, हशूम, बेसाई,

19 हारीप, अनातोत, नेबाई,

20 मगपाश, मशूलाम, हेजीर,

21 मेशेलबेल, सदोक, जदूद,

22 पलतीया, हनान, अनाया,

23 होशे, हनन्याह, हशूब,

24 हलोहेश, पिल्हा, शोबेक,

25 रहूम, हशाबना, मासेया,

26 अहिजाह, हनान, अनान,

27 मलूक, हारीम अर बानाह।

करार ती एही लिखी दी

28 हाम्हैं सोभै इज़राईली, प्रोहत, लेबी, बिधाते भबने पहरी, गाज़ै-बाज़ै आल़ै, बिधाते भबनै च़ाकरी करनै आल़ै अर होर परदेसी ज़ुंण ऐहा ज़ैगा रहंदी परमेशरे बधान मनणा लै होरी का ज़ुदै हुऐ, हाम्हैं अर म्हारी बेटल़ी अर म्हारै शोहरू ज़ुंण इना गल्‍ला समझ़ी सका, 29 हाम्हैं सोभी खाऐ आपणैं सैणैं संघै इहै सोह, ज़ै हाम्हैं ऐहा करारा चोल़े, तै लोल़ी हाम्हां बिधाता का फिटक लागअ, हाम्हां ज़िऊंणीं तेऊ बधाने साबै ज़िन्दगी ज़ुंण बिधाता आपणैं गूर मोसा बाती दैनअ। हाम्हां करनअ ज़िहअ बिधाता बोले तिहअ, हाम्हां डाहणअ हर बगत धैन कि हाम्हैं तेऊए हुकम अर तेऊए बिधी सोभै तेही ई पूरी करे।

30 हाम्हां निं आपणीं कोही शोहरीओ बैह एऊ देशै बस्सै दै परदेसी संघै करनअ अर नां तिन्‍नें शोहरी ओर्ही आपणैं शोहरू लै आणनीं।

31 ज़ै पराई ज़ातीए परदेसी बशैघे धैल़ी या होरी शुची धैल़ी नाज़ या किज़ै होर च़िज़ा बेच़णां लै आणे, हाम्हां निं तेभै तिन्‍नां का तिंयां लणी आथी।

हर सातुई साल ज़ुंण बशैघे साल होए, तेभै निं हाम्हां ज़ैगा-ज़िम्मीं का साल-फसल काढणीं आथी अर होरी लै दैनअ द ऋण करनअ हाम्हां तेभै माफ।

32 हर साल करनीं हाम्हां च़ंदीए च़ुआन्‍नी परमेशरे भबना लै भैंट दैई।

33 बिधाते भबने पूज़ा-गाज़ा लै करनीं हाम्हां ईंयां च़िज़ा दैई: भोज़न, नाज़ बल़ी करना लै धैल़ नाज़, हूम बल़ीदान करना लै धैल़ पशू, बशैघे धैल़ी लै पबित्र बल़ीदान, पुनूंई अर होरी तिह-थैरा लै पबित्र बल़ीदान, इज़राईले पाप माफी लै पाप बल़ीदान अर होर ज़ेही बिधाते भबनै ज़ेही ज़रुरत पल़े तेही च़िज़ा।

34 हाम्हां इज़राईली, प्रोहत अर लेबी पुछ़णअ हर साल परच़ी पाई आपणअ परमेशर बिधाता कि बधाने साबै बेदी दी बल़ीदानो हूम करना लै झ़ुका आणने ज़िम्मैंबारी कसरी हणीं।

35 हर साल करनअ हाम्हां बिधाते भबना लै आपणीं साल-फसला का हरेकी बूटा का पैहलै भ्रहो भाग आणी।

36 ज़िहअ बिधाते बधाना दी आसा लिखअ द, तेऊ साबै करनअ हाम्हां आपणैं ज़ेठै शोहरू बिधाते भबनै प्रोहता सेटा आणी। हर गाऊईओ पैहलै सोओ बाछ़ू, हेल़्ही मांझ़ै सोभी भेडो पैहलै सोओ मिम्मूं अर हर बाकरीओ पैहलअ छ़ेल्हू बी करनअ हाम्हां बिधाते भबनै भैंट करी।

37 हर साल नऊंईं साला का पैहलअ मुछ़अ द पिठअ, दाखो रस, जैतूनो तेल अर सोभै फल़ा मांझ़ै पैहलअ भाग बी करनअ हाम्हां आपणैं परमेशर बिधाते भबनै प्रोहता सेटा पजैल़ी।

हाम्हां करनअ आपणीं साल-फसलो दसुअ हेस्सअ हर साल तिन्‍नां लेबी सेटा पजैल़ी ज़ुंण तेता कठा करना लै म्हारी नगरीओ दरोगअ होए। 38 ज़ेभै बी परज़ा का साल-फसलो दसुअ हेस्सअ कठा करे, तेभै लोल़ी लेबी संघै हारणे आद-लुआदा मांझ़ा का कुंण नां कुंण प्रोहत ज़रूर हुअ। लेबी करनअ हाम्हां का झाल़ै दै दसुऐ हेस्सैओ दसुअ निसब बिधाते भबनै भढारै पजैल़ी। 39 इज़राईली परज़ा अर लेबीए ज़िम्मैंबारी आसा कि तिंयां नाज़, दाखो रस, जैतूनो तेल बिधाते भबने भढारै पजैल़े ज़िधी भबने भांडै आसा डाहै दै अर ज़िधी प्रोहत, भबने पहरी च़ाकरी करा अर ज़िधी गाज़ै बाज़े डेरै आसा।

इहअ करै निं हाम्हां आपणैं परमेशरो भबन कधि छ़ाडणअ आथी।