नहेमया 13

इज़राईलीए गलती दी सदेर

1 तैहा ई धैल़ी ज़ांऊं मोसा गूरो बधान सोभी का ज़ोरै-ज़ोरै पहल़ी करै खोज़अ, तेथ भेटी तिन्‍नां एही गल्‍ल लिखी दी कि अमोनी अर मोआबी लोग निं परमेशरे लोगा जैंदरी सभा दी कधि लोल़ी आऐ। 2 किल्हैकि ज़धू इज़राईली मिसर देशा का एछदै तै लागै दै, तधू निं बाता अमोनी अर मोआबी तिन्‍नां लै नां झुटणा लै पाणीं अर नां नाज़ दैनअ त। तिन्‍नैं शादअ त हथू ढब्बै दैई बलाम गूर इज़राईला लै फिटक दैंदअ, पर म्हारै परमेशरै बदल़अ तेऊ फिटक बर्गता दी। 3 ज़ांऊं इज़राईली बधाने अह गल्‍ल शूणीं, तिन्‍नैं काढै आप्पू मांझ़ा का सोभ परदेसी पोर्ही।

नहेमया किऐ होर बी सदेर

4 एलियाशिब प्रोहता का थिअ बिधाते भबनो भढार सभाल़अ द, तोबियाह थिअ तेऊओ रिश्तैदार। 5 तेऊ डाहअ तिधी आप्पू संघै एकी खुडी तोबियाह बी ज़ेथ बिधाता लै भैंट किई दी खास च़िज़ा, हूम करना लै नाज़, धूप, बिधाते भबनै काम एछणैं आल़ै समान, प्रोहता लै भैंट किई दी च़िज़ा, लोगा का झाल़अ द नाज़ो दसुअ निसब, दाखो रस, जैतूनो तेल ज़ुंण लेबी, घैरी, भबने पहरी लै हआ त दैनअ द अर प्रोहता लै ज़ुदी डाही दी भैंटा हआ ती डाही दी। 6 ज़धू ईंयां गल्‍ला हआ ती तधू निं हुंह एरुशलेम आथी त। बाबेल देशे माहा राज़ै अर्तक्षत्रे राज़ा दी बत्तुई साला डेऊअ हुंह माहा राज़ै सेटा। बादा का दैनी मुल्है माहा राज़ै यहूदा मुल्खा लै एछणें ज़ाज़त 7 संघा आअ हुंह एरुशलेम नगरी लै। तेखअ लागअ मुखा थोघ अर हुंह हुअ इहअ भाल़ी रहैन कि एलियाशिब प्रोहतै आसा तोबियाह बिधाते भबने भढारै खुडी डाहअ द! 8 तेऊ रोश्शै शोटअ मंऐं तोबियाहो सारअ समान खुडी का बागै। 9 तेखअ बझ़ैल़ी मंऐं बिधाते भबने भढारे खुडीए धोई-शोई शुधी करनै अर तेथ भबनो समान, भांडै, लोवान अर नाज़, बापस डाहणैं।

10 तेखअ लागअ मुखा इहअ बी थोघ कि भबने गाज़ै-बाज़ै आल़ै अर होर लेबी आसा आपणैं खेचा-खहल़ा खटदै घअरा लै मुक्‍कै दै डेऊई! किल्हैकि ज़ुंण भाग तिन्‍नां लै खाणां ज़िऊंणां लै दैणअ लागा त, तेता निं तिंयां तिन्‍नां लै दैंदै आथी तै! 11 तेखअ किऐ मंऐं भबने कार-करिंदै कठा संघा बोलअ तिन्‍नां लै रोश्शा संघै इहअ, "तम्हैं किल्है आसा बिधातो भबन नकदरअ समझ़अ द?" तेखअ डाहै मंऐं तिंयां तिन्‍नें आपणैं-आपणैं कामां लाई ज़ुंण तिन्‍नें ज़िम्मैंबारी थिई। 12 तधा बाद लागै तेखअ सोभ यहूदी नाज़, ताज़अ दाखो रस अर जैतूने तेलो दसुअ निसब भबनै आणदै। 13 खिरी दैनी मंऐं भढारे ज़िम्मैंबारी शेलेमयाह प्रोहत, बधाने शास्त्री सदोक अर लेबी मांझ़ै पदायाह लै। तिन्‍नां संघै डाहअ जक्‍कूरो शोहरू मतानियाहो पोचअ हनान। तिंयां थिऐ सोभी च़िज़ा सभाल़ी डाहणैं अर तेता बांडणां लै शुचै-पाक्‍कै मणछ।

14 मंऐं किई एही अरज़ कि परमेशर मेरै इना भलै कामां आद डाहे ज़ुंण मंऐं तेऊए भबन अर तिधी पूज़ा-गाज़ा करनै आल़ै लै किई।

15 तिन्‍नां ई धैल़ै भाल़अ मंऐं यहूदा मुल्खै कि लोग हआ बशैघे पबित्र धैल़ै दाखा जैंटी रसा काढदै लागै दै, होर भाल़ै नाज़, दाखे रस, फेडू अर होरी च़िज़ा गाधै दी लादी एरुशलेम नगरी बेच़णां लै आणदै! मंऐं दैनी तिन्‍नां सोभी लै चतैनगी कि बशैघे धैल़ी निं किछ़ू च़िज़ा बेच़ी आथी। 16 कई लोग रहा तै सूर नगरी का एरुशलेम, तिंयां आणा तै कबल्‍लै बशैघे धैल़ी म्हाछ़ली एरुशलेम नगरी यहूदी का बेच़णां लै। 17 तिन्‍नें रोश्शै बोलअ मंऐं यहूदी सैणैं लै, "भाल़ा तम्हैं किहै कदुष्ट काम करदै आसा लागै दै! तम्हैं लाई बशैघे पबित्र धैल़ी बी छ़ोत। 18 थारै दाद-बाब बी करा तै इहअ ई अर तम्हैं बी आसा आझ़ इहअ ई करदै लागै दै ज़ेता करै परमेशरो कोप पल़ा! तैही आसा आझ़ हाम्हां इज़राईली अर ऐहा नगरी लै आफ़त पल़ी दी! तम्हैं किई बशैघे धैल़ी छ़ोतली! तैहा धैल़ी बी निं तम्हैं इहै च़िल़्हखरै काम करने कसर डाही!"

19 तेखअ किअ मंऐं हुकम कि एरुशलेम नगरीए प्रऊल़ी डाहै पैहलै धैल़ै उडै बशैघे धैल़ी शुरू हणैं पोर्ही हूल़ी अर तिन्‍नां निं बशैघे धैल़ी मुक्‍कणैं तैणीं घुआल़ी आथी। प्रऊल़ी दी डाहै मंऐं आदमी पहरी लाई कि बशैघे धैल़ी निं नगरी भितरा लै कोही किछ़ै लोल़ी आणअ। 20 इहअ करै रहै बपारी अर कई रंगे सौदै बेच़णैं आल़ै एरुशलेम नगरीए गहल़े दुआली बागै शुकरै उडै पोर्ही शणिहचरै उडै तैणीं न्हैल़ै बेठी। 21 मंऐं दैनी तिन्‍नां लै चतैनगी, "तम्हैं किज़ू हआ गहल़े दुआली बागै बेशी रहै दै? ज़ै तम्हैं मुखा भिई शुझुऐ, तम्हैं करनै मुंह सोभ कैद! तेखअ निं बोली कि किज़ै हुअ।" तधा पोर्ही निं तेखअ तिंयां भिई बशैघे धैल़ी कधि आऐ। 22 मंऐं किअ लेबी लै हुकम कि आपणीं शुधी करा, संघा करा प्रऊल़ीए पहरै लै एछी ताकि बशैघे धैल़ी पबित्र रहे।

हे परमेशर, एता लै बी डाहै तूह मुंह आद, ज़ेही तूह आपणीं महान झ़ूरी करा, तेही करै मुल्है झींण बी।

23 तिन्‍नां ई धैल़ै भाल़ै मंऐं यहूदी मांझ़ै कई इहै बी ज़ुंणीं अशदोद, अमोन अर मोआबा का थिई बेटल़ी आणी दी। 24 तिन्‍नें शोहरू-माठै मांझ़ै निं आधै यहूदी बोली ई ज़ाणदै तै! तिंयां करा तै अशदोदी अर होरी परदेसी ई बोली दी गल्‍ला! 25 तिन्‍नां लै दैनी मंऐं गाल़ी अर फिटक, कोई बझ़ैल़ै च़िक्‍कणै अर कोई बच़ोटै मुंडा का। तेखअ बझ़ैल़ै तिन्‍नां का परमेशरे सोह खाणैं कि तिंयां आजू नां आपणैं शोहरू लै परदेसी शोहरी बैही आणे अर नां आपणीं शोहरीओ बैह परदेसी बेटल़ी संघै करे। 26 मंऐं बोलअ तिन्‍नां लै, "राज़अ सुलैमाना का बी कराऊअ एही ई पराई बेटल़ी पाप। सुलैमाना बराबर राज़अ निं कोही देशै आथी त, तेऊ लै झ़ूरा त परमेशर बी संघा बणाअं सह सोभी इज़राईली प्रैंदै राज़अ, एतरअ हंदी बी घिझ़ुअ सह पाप करदअ। 27 हाम्हां बी कै तम्हां ई ज़िहअ कबध खटणअ कि हाम्हैं पराऐ देशे बेटल़ी संघै बैह करी सह पाप करनअ ज़ेता परमेशर नांईं च़ाहंदअ?"

28 एलियाशिब माहा प्रोहते शोहरू जहोयादा थिअ माहा प्रोहत, पर जहोयादे एकी शोहरू त बेथ-हारोन नगरीए सनबलाते शोहरी संघै बैह किअ द, अर मंऐं काढअ जहोयादा एरुशलेम नगरी का दरल़ाऊई।

29 मेरी आसा एही अरज़ कि हे परमेशर ऐहा गल्‍ला लै डाहै तिन्‍नां मणछा आद कि तिन्‍नैं लाई प्रोहते पदबी अर तेरी करारा दी छ़ोत ज़ुंण तंऐं प्रोहत अर लेबी संघै किई ती।

30 इहअ करै किई मंऐं तिन्‍नें होरी ज़ाती जैंदरा का शुधी, मंऐं बणाअं प्रोहत अर लेबी लै सूल कि तिंयां आपणैं-आपणैं कामें ज़िम्मैंबारी सभाल़े। 31 बेदी दी हूम करना लै बी डाहै मंऐं तिन्‍नां लै खोज़ी कि तेता लै झ़ुका कहा धैल़ै आणनीं अर लोगा लै नऊंईं साल-फसला का नाज़ अर फल़ो पैहलै भाग भैंट करनैओ इंतज़ाम बी डाहअ करी।

हे परमेशर, इना गल्‍ला डाहै आद अर मुंह लोल़ी एतो फल भेटअ।