नहेमया 3

एरुशलेम नगरी फेर गहल़े दुआल च़िणीं भिई

1 एरुशलेम नगरीए गहल़े दुआली च़िणना अर प्रऊल़ी भिई बणाणां लै किई इनै मज़त:

माहा प्रोहत एलियाशिब अर तेऊ संघै होरी प्रोहतै च़िणीं भेड़ प्रऊल़ भिई संघा किई तिन्‍नैं तेते प्रतिष्ठा अर तेते पाल्‍लै बी लाऐ तिन्‍नैं ई। तिधा पोरी च़िणीं तिन्‍नैं गहल़े दुआल एकी बाखा हमेया पुंडरी तैणीं अर दुजी बाखा हनानेल पुंडरी तैणीं अर तेते बी किई तिन्‍नैं प्रतिष्ठा।

2 तिधा आजू गहल़े दुआलीओ भाग सधेरअ जेरिहो नगरीए लोगै अर तेता का आजू सधेरअ एक भाग इम्रीए शोहरू जक्‍कूरै।

3 म्हाछ़ली प्रऊल़ च़िणीं हसोने सोभी शोहरू मिल़ी-ज़ुल़ी। तिन्‍नैं लाऐ प्रऊल़ीए द्रींड, तेते पाल्‍लै, शाणै अर कुंडै कबज़ै बी।

4 तिधा का आजू किई गहल़े दुआलीए मराम्मत हकोज़े पोचै अर उरियाहे शोहरू मरमोतै।

तेता आजू च़िणीं गहल़े दुआल मशेलबेले पोचै बरेक्याहे शोहरू मशूलामै।

तिन्‍नां आजू च़िणीं गहल़े दुआल बानाहे शोहरू सदोकै।

5 तिन्‍नां का आजू च़िणीं गहल़े दुआल तकोआ नगरी का आऐ दै मणछै, पर तिन्‍नें सैणैं ज़हा का काम थिअ सभाल़अ द, तिन्‍नैं किअ कामां करना लै नांह।

6 पसेहे शोहरू जहोयादा अर बसोदयाहे शोहरू मशूलामै च़िणीं पराणीं प्रऊल़ भिई, तिन्‍नैं लाऐ तेता लै नऊंऐं द्रींड, पाल्‍लै, आगल़ी अर कुंडै-कबज़ै।

7 तिधा का आजू च़िणीं गहल़े दुआल गबोन नगरीए मलाती, मरनोत नगरीए जादोन, गबोन अर मिज़पा नगरीए लोगै एप्रात पछ़मा बाखा मुल्खे राज़पाले डेरै तैणीं।

8 तिन्‍नां का आजू च़िणीं गहल़े दुआल हर्हयाहे शोहरू उज्जीएल अर होरी सनारै।

हनन्याह करा त खुशबूदार तेला बणाणेंओ काम, तिधा आजू किअ तेऊ अर तेऊए साथी एरुशलेम नगरीए गहल़े दुआली च़िणनेओ काम बिरलै गहल़ा तैणीं।

9 रपायो शोहरू हूर करा त एरुशलेम आधै गहल़ा दी राज़, तिधा आजू सदेरी गहल़े दुआल तेऊ।

10 हारूमापे शोहरू जदाया, गहल़े दुआल ज़ुंण तेऊए घअरा नेल़ थिई, तिधी च़िणीं सह गहल़े दुआल तेऊ।

तिधा आजू च़िणीं गहल़े दुआल हशाबनेह शोहरू हतूशै।

11 तेता आजू सदेरी गहल़े दुआल हारीमे शोहरू मलकिजा अर पहात-मोआबे शोहरू हशूबै अर भठीए पुंडरीए मराम्मत बी किई तिन्‍नैं ई।

12 तिधा आजू गहल़ च़िणअ हलोहेशे शोहरू शलूमै, सह करा त एरुशलेम एकी होरी आधै गहल़ा दी राज़ अर तेऊए शोहरी बी किई तेऊ कामां करना लै तेऊए मज़त।

13 हानून अर जानोह नगरी बस्सै दै लोगै किई गाडा बाखे खागे प्रऊल़ीए मराम्मत। तिन्‍नैं किई प्रऊल़ खल़ी, तेते द्रींड, डेहल़, पाल्‍लै, आगल़ी सोभै गल्‍ला अर तिधा आजू गहल़े दुआल बी च़िणीं तिन्‍नैं कोई एक हज़ार हाथ लाम्मी शणैऊंआं शोटणें प्रऊल़ी तैणीं।

14 रकाबो शोहरू मलकिजा ज़ुंण बेथ-हकरेम गहल़ा दी राज़ करा त, तेऊ किई शणैऊंआं शोटणें प्रऊल़ीए मराम्मत, तेते द्रींड, पाल्‍लै अर शाणै बी लाऐ तेऊ ई।

15 कोलहोजो शोहरू शलूम करा त मिज़पा गहल़ा दी राज़, तेऊ किई सअरा सेटे प्रऊल़ीए मराम्मत। तेऊ बणाऐं प्रऊल़ी लै द्रींड, पाल्‍लै, कल़ोलै सोभै गल्‍ला अर तिधा आजू नगरीए गहल़े दुआल बी च़िणीं तेऊ राज़े बागा सेटा शेलाह नाओंए सअरा अर आजू दाबेदपूर गहल़ा का उंधै होथणे सुआणा तैणीं।

16 अजबूको शोहरू नहेमया करा त बेथ-सूर आधै गहल़ा दी राज़, तिधा आजू गहल़े दुआल च़िणीं तेऊ राज़ै दाबेदे घोरी अर तेता आजू बणाऐं दै सअरा बाती सैने डेरै तैणीं।

लेबी ज़ुंणीं गहल़े दुआली सदेरना लै काम किअ

17 तिधा आजू गहल़े दुआली च़िणनेओ काम ज़ुंण लेबी सभाल़अ, तिंयां थिऐ ईंयां:

एक भाग च़िणअ तिधा आजू बैनीए शोहरू रहूमै अर तेऊए होरी साथी। तेता आजू किई केलाह आधै गहल़ा दी राज़ करनै आल़ै हशाबिया आपणैं गहल़े मराम्मत।

18 केलाह गहल़े बच़ै दै आधै मुल्खे दुआलीए मराम्मत किई तेथ राज़ करनै आल़ै हेनदादे शोहरू बबाई।

19 तिधा आजू ज़ुंण गहल़े दुआल अस्त्र-शस्त्रे भढारे कुआल़ी दी ज़िधी दुआली दी घूम पल़अ, तेते मराम्मत किई जेशूए शोहरू एजेरै ज़ुंण मिज़पा नगरी राज़ करा।

20 दुआलीए घूमा पोर्ही सदेरी गहल़े दुआल एलियाशिब माहा प्रोहते घअरा तैणीं जज्बे शोहरू बारूकै तत्त-दिला का मैन्थ करी।

21 एलियाशिब माहा प्रोहते घअरा आजू पोर्ही तेऊए घअरे पुंझ़ै तैणीं च़िणअ एक कुछ़ू मरमोतै ज़ुंण उरियाहो शोहरू अर हकोज़ो पोचअ थिअ।

प्रोहत ज़ुंणीं गहल़े दुआल च़िणीं

22 तिधा आजू किई गहल़े दुआलीए मराम्मत प्रोहतै, ज़ुंण एरुशलेम नगरी दुआली नेल़ तै बस्सै दै।

23 तिन्‍नां आजू सदेरी गहल़े दुआल बिन्यामीन अर हशूबै ज़ुंण तिन्‍नें घअरा आजू थिई।

ज़ुंण दुआल अननन्याहे पोचै अर मासेये शोहरू अजर्याहे घअरा आजू थिई, तेते मराम्मत किई तिन्‍नैं आप्पै।

24 अजर्याहे घअरा पोर्ही ज़िधा का दुआल फिरी, तिधी पुंझ़ै तैणीं किई गहल़े दुआलीए मराम्मत हेनदादे शोहरू बिनूई।

25 दुआलीए तेऊ घूमा पोर्ही राज़े मैहलै कैदखाने खोल़ै आजू उछ़टी पहरीए उछ़टै कोटा तैणीं सदेरी गहल़े दुआल उज्ज़े शोहरू पालालै अर तेता आजू सदेरी गहल़े दुआल पारोशे शोहरू पदायाह,

26 तेऊ सदेरी गहल़े दुआल पुर्बा बाखा फणैरे प्रऊल़ी अर भबने पहरीए उछ़टै कोटा तैणीं। अह ज़ैगा थिई ओपेल नगरीए सिऊंआं नेल़ ज़िधी बिधाते भबनै च़ाकरी करनै आल़ै रहा तै।

होर ज़ुंणीं गहल़े दुआली च़िणनेओ काम किअ

27 तिधा आजू गहल़े दुआल सदेरी तकोआ नगरी बस्सणै आल़ै ज़ुंण दुआल ओपेल सिऊंआं नेल़ बिधाते भबने पहरै लै उछ़टै कोटा सम्हनै थिई।

28 तिधा आजू गहल़े दुआल सदेरी प्रोहतै, तिन्‍नैं सदेरी गहल़े दुआल घोल़ै प्रऊल़ी पोर्ही उतरा बाखा आपणैं-आपणैं घअरा सम्हनै।

29 तेता आजू च़िणीं गहल़े दुआल इमेरे शोहरू सदोकै ज़ुंण तेऊए घअरा आजू पल़ा ती।

तेता आजूए दुआल सदेरी शकनये शोहरू शमयाहै ज़हा का पुर्बा बाखा प्रऊल़ीए पहरे ज़िम्मैंबारी थिई।

30 तिधा आजू दुआली च़िणनेओ काम किअ शेलेमयाहे शोहरू हनन्याह अर सालापे छ़हुऐ शोहरू हानूनै।

तेता आजू च़िणीं गहल़े दुआल बरेक्याहे शोहरू मशूलामै ज़ुंण तेऊए घअरा सम्हनै थिई।

31 तेता आजू च़िणीं गहल़े दुआल मलकिजा सनारै बिधाते भबनै च़ाकरी करनै आल़ेए अर बपारी बेशणे भबना तैणीं, अह ज़ैगा थिई झाल़ै करने प्रऊल़ी दुजी बाखा दुआली प्रैंदै खुडी उतर-पुर्बा बाखा पुंझ़ै।

32 तिधी पुंझ़े खुडी पोर्ही भेड़ प्रऊल़ी तैणीं किई गहल़े दुआलीए मराम्मत बपारी अर सनारै।