Esita 3

Haman ɛ mɛ gɛtɛ èè muru Yuda bete

1 Ade nyayɩ yɩɩ gama fɔ, Egyu-dɩrɛ Herihesi ɛ bʋma Agagi-te Hamedata wobi Haman bɩndɩrɛ, gɛ ɛ tɛ wɔ gɛsarakʋn-dɩrɛ gɛtɛ gɩ da bɛndɩrɛbi-kurumakyɛɛ fɔ powu. 2 Gɛ egyu-dɩrɛ ɛ tɛ wɔ bɛndɩrɛbi gɛtɛ bɛ̀ sa digyu-tele diitunu fɔ ose gɛtɛ ɛkamasɛ èè ti kura Haman gebù gaanɩ. Mɔ Modekayi bɩrɛ ɛn taa kura Haman ɛ tɛ wɔ gebù.

3 Ɛwʋ gɛ bɛndɩrɛbi gɛtɛ bè si egyu-dɩrɛ wotunu fɔ be lila Modekayi alan, <<Anʋn yii koro gɛ an taa di egyu-dɩrɛ wose fɔ wuu koro?>> 4 Duwi n di duwi fɔ, bɛɛ tabʋrʋ bɛ tɛ wɔ, mɔ ɛn taa nʋn baakʋn. Gɛlɛ wuu koro bɛ ma dɔ̀ ade fɔ bɛ tɛ Haman bàà nya alɛ baà ka Modekayi wade fɔ bɛ kyɛ wɔ, yema ɛ dɔ̀ bɛ alɛ è di gɛ Yuda-te okoro.

5 Gɛtɛ Haman e we gɛtɛ Modekayi ɛn nan kura wɔ ɛ tɛ wɔ gebù fɔ, wowurufa wʋ tɔ. 6 Gɛ gɛtɛ ɛ nʋn alɛ Modekayi è di gɛ Yuda-te fɔ, ɛ mɛ wamɩnlɛ gɛtɛ ɛn nan wolo gɛ Modekayi woko, mɔ fɔ, ee bugiti osele gɛtɛ ɛ̀ɛ̀ ka muru Modekayi bɛnɩ powu gɛtɛ bè si Egyu-dɩrɛ Herihesi bugyu buu gedikʋn powu fɔ.

7 Egyu Herihesi bugyu buu gedi wʋʋ gɩkyan fwo-nyɔɔfɛ giibon-gyangbasɛlɛ gɛtɛ bee kpèlè Nisan wanɩ fɔ, gɛ Haman ɛ dɔ̀ wɔ bɛnɩ alɛ bàà da ma Puri wataa yɩɩ gɛsɩ̀ yii koro bàà ka tiri duwi ma ebon gɛtɛ wanɩ baà mɛ ade fɔ. Ɛwʋ gɛ wʋ ma sere ebon fwo-nyɔɔfɛ gɛtɛ bee kpèlè Ada fɔ.

8 Gɛ Haman ɛ ma dɔ̀ Egyu-dɩrɛ Herihesi alan, <<Bɛnɩ bɛkɩ bɛ̀ sa gɛtɛ bɛ yasɩ be gyu aa gɩfɩɩ fɔ gaanɩ ɔkʋn-kamasɛ. Gɛ baade-mɛlɛ ì we kperen ma bɛnɩ-kurumakyɛɛ, gɛ bɛn taa di awɔ egyu aa-ise fɔ yii koro. Wun di gɛtɛ àà sara nya bɛ bàà mɛ gɛlɛ gaade nyayɩ. 9 Gengyi wʋ̀ kɔlɔ tɛ wɔ fɔ, sɩ̀ ose bàà muru bɛ powu, gɛ nan ka sɩka-fututu bekotoku ɩgbaa ton (10,000) n bɛ sa gigyu-bɩya gɩɩ dɩdaka daanɩ gɛtɛ bàà ka le ɛbɛ gɛtɛ baà mɛ gʋtʋn fɔ gutoro.>>

10 Ɛwʋ gɛ egyu-dɩrɛ e lo wo gitola gɛtɛ wɔ dɩdawʋ dɩ̀ gyaga gii koro fɔ e ye wɔ gʋlɔ gaanɩ ɛ tɛ Hamedata wobi Haman, gɛtɛ e ye Agagi gɛ ɛɛ kyʋn Yuda bete fɔ. 11 Gɛ egyu-dɩrɛ ɛ dɔ̀ Haman alan, <<Awɔ yɛ sɩka-fututu fɔ ɛ̀ɛ̀ sara aakʋn, mɔ fɔ, mɛ bɛ anlɛ gɛtɛ aa len.>>

12 Ebon-gyangbasɛlɛ wo duwi fwo-siyefɛ daanɩ fɔ, be kpèlè egyu-dɩrɛ gɩkpa gɩɩ bɛŋwaralɛ be tuma, gɛ bɛ yɛ bɛ bɛ ŋwara akpa anlɛ gɛtɛ Haman e wùlà bɛ fɔ. Bɛ ŋwara yɩ ma gɩfɩɩ-kamasɛ gii ginde gaanɩ, ma gɩɩ gɛŋwarabi. Bɛ ŋwara akpa fɔ Egyu-dɩrɛ Herihesi diyere daanɩ, gɛ bɛ ka wo gitola-dɩrɛ fɔ bɛ nyɩ akpa fɔ yii koro. Gɛ bɛ ka yɩ bɛ san ma egyu-dɩrɛ bɛndɩrɛbi powu, gɛtɛ bɛɛ nya bɩfɩɩ kperen-kperen ma bʋʋ bɛnɩ powu boo koro fɔ. 13 Okoro bɛ sa bɛnɩ bɛ ka akpa fɔ bɛ san bɩfɩɩ-kamasɛ gɛtɛ bʋ̀ sa egyu-dɩrɛ gatɩn fɔ powu baanɩ. Gɛ anyun-gyebi gɛtɛ bɛ ŋwara bɛ sa akpa fɔ yaanɩ n di alan, <<Ebon-fwo-nyɔɔfɛ wo duwi fwo-siyeefɛ daanɩ fɔ, wù di gɛtɛ duwi-kɩlɩn dɩtɔkɔ daanɩ fɔ, bàà wolo Yuda bɛnɩ powu be muru. Wù di gɛtɛ bàà wolo bebi-sʋgʋgyanbi, ma bɛsaranyanbi, ma bɛndɩrɛ, ma bɛnanɩ, ma bebi-sorobi powu, fɔ bàà kpila baanyan.>> 14 Baà gbɛrɛ gɩkpa fɔ gaade yii digbongbo, ɔkʋn-kamasɛ bɛ tɛ bɩfɩɩ, bɩfɩɩ bʋʋ bɛnɩ, fɔ bàà wura nʋn yɩ, fɔ bàà pɩna koro bɛ tɛ duwi dɩtɔkɔ.

15 Okoro egyu-dɩrɛ e tiri bɛnɩ-salɛ osele gɛtɛ bàà yo akpa fɔ bilenten, gɛ bɛ sɩ̀ ose nyawʋ Susa ditele daanɩ. Gɛ Egyu-dɩrɛ Herihesi ma Haman bɛ waran bɛ sara bɛɛ nyʋn bʋkan, mɔ fɔ, ditele-dɩrɛ Susa dɩɩ bɛnɩ bɩrɛ, bɛ̀ sa getutu dɩrɛ gaanɩ.