1 Odente wʋtɔkɔ powu fɔ egyu-dɩrɛ ɛn taa talɩ ɛ̀ɛ̀ fwa bʋda, okoro ɛ sa alɛ bɛ ma ka gɩkpa gɛtɛ bɛ ŋwara ade gɛtɛ i sere-sere wo bugyu buu gedi bʋʋya waanɩ fɔ bɛ ba, fɔ bàà bɛ kalan gɩ bɛ tɛ wɔ. 2 Be we gɛtɛ bɛ ŋwara bɛ sa dʋkɔ alɛ Modekayi e tiri Bigitan ma Teresi gɛtɛ bè di egyu-dɩrɛ bɛndɩrɛbi bɛnyɔɔ gɛtɛ bɛɛ dɩyɛ wotunu fɔ bɔɔpɩ-fwe ɔkʋna gɛtɛ bɛ mɛ onyun bàà wolo ɛwɔ Egyu-dɩrɛ Herihesi fɔ.

3 Gɛ egyu-dɩrɛ e lila alan, <<Anʋn yii gebù ma gutoro gii gele gɛ Modekayi e wura e ye ade nyayɩ yaanɩ?>>

Egyu bɛsaranyan be tiri wuunyun alan, <<Bɛn mɛ gɩnyankɩ tɛ wɔ.>>

4 Egyu-dɩrɛ e lila alan, <<Ɛnyan n sa kpata anɩ?>> Fɔ ɔya wʋtɔkɔ gɛ Haman ɛ bɔ e be gyu digyu-kpaara diikòro wʋʋ kpata fɔ anɩ, gɛtɛ ɛ̀ bɛ dɔ̀ egyu-dɩrɛ anlɛ gɛtɛ baà sa Modekayi gigyen ɔŋʋʋ ɛ kyɔlɔga ma oyon gɛtɛ ɛwɔ Haman e sere ɛ tɛ Modekayi gewolo fɔ wuu koro waade.

5 Ɛwʋ gɛ egyu-dɩrɛ bɛsaranyan bɛ dɔ̀ wɔ alɛ <<Haman n sa kpata waanɩ.>> Gɛ egyu-dɩrɛ alan,

<<Ɩ yɛ wɔ èè gyu ba!>>

6 Gɛtɛ Haman e gyu fɔ, egyu-dɩrɛ e lila wɔ alan, <<Ɛnɩ ɛkɩ ɛ̀ sa gɛtɛ nte len nan sa gebù. Anʋn gɛ n mɛ n tɛ wɔ?>>

Fɔ Haman ɛ dɔ̀ wamɩnlɛ yaanɩ alan, <<Ɛnyan n nɩ sa fiya ma nmɩ gɛtɛ egyu ɛ̀ɛ̀ sa gebù?>> 7 Okoro e tiri wuunyun ɛ tɛ egyu-dɩrɛ alan, <<Ɛnɩ gɛtɛ egyu-dɩrɛ ee len ɛ̀ɛ̀ sa gebù fɔ, 8 ɛ yɛ bàà ka bugyu bʋʋ gɛgba gɛtɛ egyu-dɩrɛ ɛ sa, ma dibengyi gɛtɛ egyu-dɩrɛ ɛ sara dii koro fɔ, fɔ bàà ka egyu wɔ sɩka-sɩya gɩnyankɩ gyaga dii duyu dii koro. 9 Fɔ àà tiri aa bɛndɩrɛbi fɔ baanɩ ɛndɩrɛ gɛtɛ ɛ̀ ba gebù, fɔ ɛ̀ɛ̀ ka aa gɛgba fɔ e su ɛnɩ gɛtɛ aa len àà sa gebù fɔ, fɔ ɛ̀ɛ̀ ka wɔ gyaga dibengyi fɔ dii koro, fɔ èè ton dɩ silin ma ditele fɔ powu, fɔ ɛ̀ɛ̀ gbɛrɛ kpen dɔ̀ alan, <Anlɛ gɛ egyu-dɩrɛ ɛ mɛ ɛnɩ gɛtɛ ɛɛ sa gebù fɔ!> >>

10 Ɛwʋ gɛ egyu-dɩrɛ ɛ dɔ̀ Haman alan, <<Bilenten! San ma ka gɛgba-serelɛ fɔ ma dibengyi fɔ, fɔ àà mɛ anlɛ gɛtɛ a bɔ a dɔ̀ mɩ fɔ tɛ Yuda-te Modekayi gɛtɛ è si digyu-kpaara diitunu fɔ. Kara kere ade gɛtɛ a dɔ̀ fɔ waanɩ wʋkɩ ya.>>

11 Okoro Haman ɛ ma ka gɛgba-serelɛ fɔ ma dibengyi fɔ. Ɛ ka gɛgba fɔ ɛ sa Modekayi gɛ ɛ ka wɔ ɛ gyaga dibengyi fɔ dii koro e silin ma ditele, gɛ ɛɛ gbɛrɛ digbongbo alan, <<Anlɛ gɛ egyu-dɩrɛ ɛɛ mɛ ɛnɩ gɛtɛ ɛɛ sa gebù fɔ!>>

12 Nyawʋ wʋʋ gama fɔ, Modekayi e biri ɛ san diigyu-kpaara diitunu. Mɔ Haman ɛ sa bɩsɩrɩ butu ɛ da dɩkpaara ma ɩnɩnfa. 13 Gɛ Haman ɛ ma dɔ̀ wɔsɔ Seresi ma wɔwɔlɔn ɛbɛ powu ade-kamasɛ gɛtɛ i sere wo koro.

Ɛwʋ gɛ wamɩnlɛ yɩɩ bɛtɛlɛ ma wɔsɔ Seresi bɛ dɔ̀ wɔ alan, <<Gɛtɛ Modekayi bʋnʋn gɛ a di ɩnɩnfa lɛ, è di gɛ Yuda-te, an nan nɩ talɩ a biri a yela ma ɛwɔ, aà nyɩ̀ a nʋ̀n gɛ.>> 14 Gɛtɛ boonyun wʋʋn tɛ nʋ̀n fɔ, egyu-dɩrɛ bɛsaranyan gɛtɛ be tiri aforobi fɔ bɛ bɛ ka Haman bilenten bɛ san ɔsɛ wuu gedi, gɛtɛ Esita ɛ pɩna fɔ waanɩ.