1 Nde Simeyɔn Piyɛri Isa Ɲenematɔmɔnin na baaraden ni a la talibidenba, nde le ka ɲin sɛbɛ, ka a lawa ai ma, ai le mɛnilu fanan da lemɛniya sɔrɔn mɛn ni an na gbiliya ka kan ai ka mɛn sɔrɔn an na Alla ni an na kisila la telenbaya fɛ, Isa Ɲenematɔmɔnin. 2 Alla ye hinani ni jususuma di ai ma, ka wara Alla la kolɔn ni an Maari Isa la kolɔn dɔ.

3 Alla la fanka ra fɛrɛ bɛɛ di an ma kosa an ye an na dunuɲaratɛɛ ni an na Alla ɲɛsilanɲɛ kɛ Alla lɔn dɔ mɛn ka an kili a la gbiliya ni a la ɲumaya rɔ. 4 Wo rɔ, a ra an lahidi lahidi gbɛlɛn na, mɛnilu ka bon ka tamin bɛɛ la, kosa ai ye ai jɛrɛ laban kɔsɔ koilu ma kunfan ye mɔɔilu lɔla mɛn ma dunuɲa ɲin dɔ, ko ai fanan di Alla la kɛɲa sɔrɔn. 5 Wo rɔ, ai ye karan ai fanka bɛɛ la, ka sɔnɲuma la ai la lemɛniya kan, ka lɔnnin la sɔnɲuma kan, 6 ka jɛrɛ mira la lɔnnin kan, ka tunadiya la jɛrɛ mira kan, ka Alla lɔn la tunadiya kan, 7 ka badenmaya ladiyaɲɛ la Alla lɔn kan, ka kaninteya la badenmaya ladiyaɲɛ kan. 8 Ni kɛɲa ɲinilu wa to ai rɔ, ka sabati, ii tɛ ai to tunnagboya ni baarabaliya rɔ an Maari Isa Ɲenematɔmɔnin lɔn dɔ fewu. 9 Kɔni ni woilu tɛ mɔɔ mɛn dɔ, wo tii ɲa tɛ ko ragbɛla, a totɔ le ikomin ɲa funyen, ka ɲina ko Alla ra a julumun kɔrɔilu kafari.

10 Wo le rɔ, badenmailu, ai ye ai raja ka tamin sisɛn na Alla la kilili lamɛnna diya a ni ai suwandinin ko, ka a masɔrɔn ni ai ka wo kɛ, ai ti be muumɛ. 11 Wo rɔ, an Maari ni an Nakisila Isa Ɲenematɔmɔnin di habadan mansaya ladon fɛrɛ ba di ai ma.

12 Wo le ka a kɛ, n ye ko ɲinilu labilala ai la waati bɛɛ, hali ai ka ii lɔn, ka wo tuɲa ko mira fanan gben ai ka mɛn sɔrɔn. 13 N na miriya rɔ, fanin n ye n nii la faribanku rɔ, n ka kan n ye wo koilu labila ai la kosa ii ye to ai ɲana. 14 Ka a masɔrɔn n ka a lɔn, n nii bɔtɔla le ten faribanku rɔ, ikomin an Maari Isa Ɲenematɔmɔnin jɛrɛ ka n nalɔnni ɲa mɛn ma. 15 Wo rɔ, n ye karanna le fɛrɛ bɛɛ rɔ, hali n na saya kɔrɔ, ko ɲinilu ye se labilala ai la waati bɛɛ.

16 Nba, Maari Isa Ɲenematɔmɔnin na ko rɔ a ni a la fanka, an ma mɔɔilu la tali rabɛniilu fɔ ai yɛ ka bɛn wo koilu ma, baa andeilu jɛrɛ le ka a la gbiliya yen an ɲailu la. 17 A ka kunnafulen ni gbiliya sɔrɔn an Fa Alla le bolo, a ka wo kan namɛn ka fara Gbiliya Kunnafulen ba la tuma mɛn na ko, «N Dencɛ le ɲin di, n ye mɛn kaninna, a ra n hɛnɛ kosɛbɛ!»* 18 An jɛrɛ ka wo kumakan mɛn, ka bɔ sankolo rɔ, an tɛrɛ ye a tɔrɔfɛ koyinkɛ sɛniman kan waati mɛn na.

19 Ikɔ tuun, kelalaselailu la kuma gbɛnin an ma ten ka tamin fɔlɔ la. Ai ka kan ka ai hankili lɔ woilu la ikomin fitinna mɛn ye mɛlɛnna dibi rɔ haan bandaka, bandaka da lolo fanan ye mɛlɛn damira ai jusu rɔ. 20 Mɛn taminni a bɛɛ la, ai ka wo lɔn, ko Kitabu nabiya kuma si ma fara keladen fisamante la ko ɲafɔ ɲa ma. 21 Ka a masɔrɔn nabiya kuma si tɛrɛ tɛ bɔla adamadenilu sawo rɔ, kɔni Alla la Nii Sɛniman de tɛrɛ ye adamadenilu dɛmɛnna, ka kuma ka fara Alla la.