1 Nba, waati wo rɔ, mɔɔilu tɛrɛ ye nala Isa ma ka a fɔ a yɛ ko mɛn kɛni Kalilekailu la Pilate bolo. A ka Kalilekailu jeli ni saraka sobo jeli basan i ɲɔɔn na. 2 Isa ka ii jabi: «A ye di? Ai hankili rɔ, Kalileka mɛnilu faani ten, woilu tun da kojuu le kɛ ka tamin Kalileka tɔ bɛɛ kan wa? Ii faara wo sababu le la wa? 3 Wo kuma tɛ! Kɔni na ai ma tubi, ai fanan di halaki. 4 Waati taminni, Silowame sankaso jan bera mɔɔ tan ni seyin kan ka woilu faa Jerusalɛmu so kɔndɔ. Wo tɛ ai miri rɔ, mɔɔ tan ni seyin wo, woilu la kɛwaliilu tun ka juu ka tamin Jerusalɛmukailu tɔ bɛɛ ta kan wa? 5 Ɛɛn, dɛ! Wo kuma tɛ! Kɔni na ai ma tubi, ai bɛɛ fanan di halaki.»

6 A ka misali di ii ma kuma kɔrɔlama rɔ ko: «Toro ju kelen tɛrɛ ye cɛɛ do bolo a la sɛnɛ rɔ. Lon do rɔ, a wara toro den ɲinin. A ma foyi sɔrɔn a la. 7 A ka a fɔ a la baaraden yɛ ko: ‹N da san sawa kɛ, n ye toro den ɲininna n na toro ju la. Haan bi, n ma foyi sɔrɔn a la munun. Wo rɔ, i ye a tɛɛ, ka a bɔ ye. Tɔnɔ tɛ a la. A kana to ten ka n na duu tiɲan.› 8 Baaraden ka a madiya ko: ‹Faama, i ye a to ten san kelen ɲin na munun. N di duu sen a kɔrɔ ka nɔɔ kɛ a fɛ. 9 Sando ni a ka den kɛ, ale le wo ri. Kɔni ni a ma den kɛ, i ri a tɛɛ ka a bɔ ye.›»

10 Lon do rɔ, Isa tɛrɛ ye mɔɔilu karanna Alla la salibon do la. Ɲɔɲɔ Lon de tɛrɛ. 11 Muso jankarɔtɔ do tɛrɛ ye, jenailu ra dan ba bila mɛn kɔ rɔ. A ra san tan ni seyin bɔ, a ma se a kɔ lawulila. 12 Isa ka muso wo yen ka a kili. A ka a fɔ a yɛ ko: «N badenma muso, i ra hɔrɔya i la jankarɔ rɔ ka bɔ a rɔ fewu.» 13 A ka a bolo la muso kan. Muso kɛndɛyara i kɔrɔ ye ka a kɔ latelen, ka ban ka Alla tando.

14 Kɔni salibon kuntii ka wo bɛɛ lakɔrɔsi ka diminya. A monɛra Isa ma ka a masɔrɔn a ra lakɛndɛyali kɛ Ɲɔɲɔ Lon. Kuntii wulira ka a fɔ jama yɛ ko: «Tele wɔɔrɔ ye an bolo ka baara kɛ. Ai ye na kɛndɛya ɲinin tele wɔɔrɔ wo kɔrɔ. Ai kana na Ɲɔɲɔ Lon fewu!» 15 Maari ka salibon kuntii jabi: «Ai ye jɛrɛmayuwailu le ri. I ɲa lɔ! Ni nisi wala fali kɛra ai bolo, ai tɛ wa ii fulen ka ii mayɛlɛman ka ii lamin Ɲɔɲɔ Lon wa? 16 Ni ai ye wo kɛla, a ye di? Muso ɲin ye Iburahima bɔnsɔn de ri. Setana ra a sidi jankarɔ la kɛbi san tan ni seyin. N ma kan ka wo fulen ka a lakɛndɛya Ɲɔɲɔ Lon wa?» 17 Wo jabili ka Isa juuilu bɛɛ maloya. Kɔni jama bɛɛ sɛwara Isa la kosɛbɛ, ka a masɔrɔn a tɛrɛ ye kabannako bailu kɛla.

18 Wo rɔ Isa ka ɲininkali kɛ ko: «Alla la mansaya ni nfen mununni? N di se a ni nfen lala a ɲɔɔn ma? 19 Alla la mansaya ye ikomin bɔrɔn fira kisɛ. Cɛɛ do ka wo ta ka wa a lan a la nakɔ rɔ. Kisɛ wo fɛrɛnda, ka bonya ka kɛ jiri ju ri. Sankolo kɔnɔilu ka ii ɲaan la jiri wo bolonilu la.»

20 Isa ka ɲininkali kɛ ko: «N ye Alla la mansaya lala nfen ma ikɔ tuun? 21 A ye ikomin lɛbɛn. Ni muso ka wo ta ka dɔɔni kɛ farinin muun siyaman dɔ, a ri farinin muun bɛɛ funu.»

22 Wo kɔ, Isa watɔla Jerusalɛmu, a tɛrɛ ye mɔɔilu karanna sila la so bailu ni so mɛsɛnnilu la.

23 Do ka Isa maɲininka ko: «Maari, mɔɔ gbɛnsɛni ri kisi wa?» Isa ka ii jabi: 24 «Ai ye i raja ka don da dɔɔmanin na. Ka a masɔrɔn n di a fɔ ai ɲana, mɔɔ siyaman di don diya ɲinin ka kaɲa. 25 Maari, mɛn ye bontii ri, ni a wulira ka bonda latuun, ai ri to kɛnɛ ma. Ai ri da makonkon ka a fɔ ko: ‹Maari, i ye da laka an yɛ.› Bontii ri jabili kɛ ko: ‹N ma a lɔn i bɔni yɔrɔ mɛn dɔ.› 26 Ai ri a fɔ ko: ‹Maari, an bɛɛ ka dɔɔnnin kɛ ka an min yɔrɔ kelen. I ka an karan an na soilu la.› 27 Maari ri a fɔ ai yɛ ko: ‹Ai kojuu kɛlailu, n ma ai lɔn, n ma ai bɔ diya lɔn. Ai ye bɔ yan!›

28 «Wo lon, ai wa Iburahima ni Isiyaka ni Yakuba ni kelalaselailu bɛɛ yen Alla la mansaya rɔ, ka a tɛrɛn ai lafilini kɔkan. Ai ri kasi ka duɲa fɔɔ ka ai ɲin macin. 29 Mɔɔilu ri bɔ dunuɲa fan bɛɛ rɔ ka na i sii Alla la mansaya rɔ ka dɔɔnnin kɛ. 30 Nba, doilu ye kɔmamɔɔilu ri bi, mɛnilu ri kɛ ɲɛmɔɔilu ri sini. Doilu fanan ye ɲɛmɔɔilu ri bi, mɛnilu ri kɛ kɔmamɔɔilu ri sini.»

31 Wo waati kelen, Farisi doilu nara Isa lali ko: «I ye yan bila ka wa yɔrɔ gbɛrɛ rɔ, baa Mansa Herodi ye i faa ko rɔ.» 32 Isa ka ii jabi: «Ai ye wa a fɔ banban wo yɛ, Herodi kɔnin, ko n ye jena gbɛnna ka bɔ mɔɔilu fɛ, ka jankarɔtɔilu lakɛndɛya. Bi ni sini, n ye wo baara kan. A tele sawana, n na baara ri dafa. 33 A fɛrɛ tɛ fo n ye n daja ka n taama bi, a ni sini a ni sini kɛndɛ, baa keladen fisamante kana faa yɔrɔ si fo Jerusalɛmu.»

34 Isa ka a kan nabɔ ko: «Jerusalɛmu, Jerusalɛmu. Ai ye kelalaselailu faala mɛnilu ye ai kawandila, ai ye woilu bonna kaba la ka ii faa. Siɲa siyaman, n tɛrɛ ye a fɛ ka ai ladɛn ikomin sisɛ ba ye a denilu ladɛnna ɲa mɛn ka ii dokon a kɔrɔ. Kɔni ai ma sɔn wo ma. 35 Wo rɔ, ai la bon nafilinin de tɛrɛ. Ai ɲa ti nala lala n kan butun, fɔɔ ai wa a fɔ lon mɛn ko: ‹Kunnadiya wo mɛn nanin Maari Alla tɔɔ rɔ.›»