Lucas 19

Isa ka karanden fila lɔ fali den ta la

28 Isa banni sanda wo lala, a bilara jama ɲɛ ka wa Jerusalɛmu. 29 A sudunyani so doilu la, Bɛtifase ni Betani kɔnin, a sera koyinkɛ yɔrɔ do ma, mɔɔilu ye a fɔla mɛn ma ko Olibiye Koyinkɛ. A se mɛn kɛni ye, a ka karanden fila lɔ kela diya. 30 A ka a fɔ ii yɛ ko: «So mɛn ye an ɲɛ, ai ye wa se ye. Ai wa don so kɔndɔ, ai ri fali den bulan sidinin tɛrɛn ye, mɔɔ si ma i sii mɛn kan butun. Ai ye a fulɛn ka na a ri. 31 Ni mɔɔ ka ai maɲininka ko: ‹Ai ye fali den fulɛnna nfenna?›, ai ye wo jabi: ‹An Maari mako ye a la.›» 32 Isa ka mɛn nawa ii ka a tɛrɛn ikomin a ka a fɔ ɲa mɛn ma. 33 Ii tɛrɛ ye fali den fulɛnna tuma mɛn na, a tiilu nara ka a fɔ ko: «Hɛn! Ai ye fali den fulɛnna nfenna?» 34 Ii ka jabili kɛ ko: «An Maari mako ye a la.» 35 Ii ka fali den ta, wo rɔ, ka wa a ri Isa ma. Ii se mɛn kɛni Isa tɔrɔfɛ ye, ii ka ii la durukiilu la fali den kan. Ii ka Isa ta ka a layɛlɛ fali kan. 36 Isa watɔla, mɔɔilu ka ii la durukiilu fɛnsɛn sila kan a ɲɛ. 37 Wo ɲa ma, a sudunyara Jerusalɛmu la, ka na se Olibiye Koyinkɛ ma. A seni koyinkɛ lajii diya, Isa la karandenilu jama ba sɛwara ka ii kan nabɔ ka Alla tando Isa la kabannakoilu la ko kosɔn.

38 Ii tora a fɔla ko:

«Duwawu ye mansa yɛ,

mɛn nani Maari Alla tɔɔ rɔ.

Jususuma ye to harijeene rɔ.

Tandoli ba ye kɛ Alla Kɔrɔtaninba yɛ.»

39 Farisi doilu tora jama tɛma ka a fɔ Isa yɛ ko: «Karanmɔɔ, a fɔ i la karandenilu yɛ ko ii ye ii makun.» 40 Isa ka woilu jabi: «Ni ii bɛɛ ka imakun, hali kabakudun ɲinilu ri ii kan nabɔ ka Alla tando karandenilu nɔ rɔ. A ye ten de!»