1 Nba, ɲɛmɔɔilu bɛɛ ladɛnnin wulira wo rɔ ka wa Isa malɔ Pilate wara. 2 Ii se mɛn kɛni Pilate ma, ii ka imakasi Isa kan. Ii ka a fɔ ko: «An da a lakɔrɔsi ka a yen ko cɛɛ ɲin ye an na jamana mɔɔilu lafilila ka ii lamurunti. A ye a fɔla ii yɛ ko ii kana niisɔnkɔ bɔ ka a di Romu mansaba ma. A jɛrɛ ko: ko ale le ye Mɔɔ Ɲenematɔmɔnin di, mɛn kɔrɔ ye ko mansa.» 3 Pilate ka Isa maɲininka ko: «Ile ye Judiyailu la mansa le ri wa?» Isa ka a jabi: «I ra wo fɔ.» 4 Wo rɔ, Pilate ka a fɔ sarakalasela kuntiilu ni jama bɛɛ yɛ ko: «N ma kojuu si sɔrɔn cɛɛ ɲin na ko rɔ, mɛn di kɛ a jalaki sababu ri.» 5 Kɔni ii ka ii sɛɛbɛ don a fɔ a ma ko: «Ale le jama lawuli la ka ii karan ka ii lamurunti Jude mara fan bɛɛ rɔ, a ka a damira Kalile ka na haan yan.»

6 Pilate ka kuma wo mɛn ka ii ɲininka ko: «Isa ye Kalileka le ri wa?» 7 Pilate ka a yen tuma mɛn ko Isa bɔni Kalile mara rɔ, a ka a lawa Herodi ma, mɛn siini Kalile mara kun na. Wo tun da na bɔ diya Jerusalɛmu. 8 Isa se mɛn kɛni ye, Herodi sɛwara kosɛbɛ. A tɛrɛ ye Isa la ko siyaman kalama. Kɛbi waati jan, a lɔɔ tɛrɛ ye a la ka Isa yen, ka a masɔrɔn a ye a fɛ Isa ye kabannako do kɛ a ɲana. 9 Wo rɔ, Herodi ka ɲininkali siyaman kɛ Isa kun, kɔni Isa ma jabili si di a ma. 10 Sarakalasela kuntiilu ni sariya karanmɔɔilu bɛɛ lɔni tɛrɛ ye. Ii jamanda ka Isa jalaki kosɛbɛ. 11 Mansa Herodi ni a la tɛsidiilu ka Isa dɔɔya ka a lafɛya ɲa bɛɛ ma, ka ban ka mansa duruki bila a kan na. Wo kɔrɔ ii ka a lasɛ Pilate ma. 12 Pilate ni Herodi tun ma di kɔrɔman. Kɔni wo lon kelen, ii diyara i ɲɔɔn yɛ kosɛbɛ ka kɛ teriilu ri.

13 Pilate ka sarakalasela kuntiilu ni jamana ɲɛmɔɔilu ni Judiya tɔilu ladɛn. 14 A ka a fɔ ii yɛ ko: «Ai nara cɛɛ ɲin di ka a fɔ ko a yɛ jamana mɔɔilu lamuruntila. N ka a maɲininka, ka a fɛsɛfɛsɛ ai bɛɛ ɲana. Kɔni n ka a yen ko ai ka fen fen fɔ a ma, ai jɔ tɛ wo si rɔ. 15 Ai ma a yen? Herodi ra a lasɛ n ma yan, ka a masɔrɔn a fanan ma kojuu si tɛrɛn a la ko rɔ. Cɛɛ ɲin ma foyi kɛ, mɛn ka kan ka kɛ a faa sababu ri. 16 Wo le kosɔn, n di a gbasi biɲɛ la ka a bila.»

17,18 * Ii bɛɛ ladɛnnin ka ii kan nabɔ ko: «I ye cɛɛ ɲin faa ka Barabasi bila!» 19 Barabasi wo ye mɔɔ muruntini ri. Waati taminni, a tun ka kɛlɛ ba lawuli jama tɛma so kɔndɔ, ka mɔɔ do faa fanan. Wo le kosɔn, a mirara ka bila kaso la.

20 Pilate tɛrɛ ye Isa bila ko rɔ. Wo rɔ, a ka jama madiya ikɔ tuun. 21 Kɔni ii jamanda ka ii kan nabɔ ko: «A ye gbɔngbɔn jiri kan, ka a faa. A ye gbɔngbɔn jiri kan, ka a faa!» 22 Pilate ka ii maɲininka a siɲa sawana rɔ ko: «N ye a gbɔngbɔn nfenna? A ka kojuu su ɲuman kɛ? N ma foyi sɔrɔn a la, mɛn di kɛ a faa kun di. N di a gbasi biɲɛ la ka a bila.» 23 Kɔni ii ma diɲɛ fewu, fɔɔ ka to ii kan nabɔla kojuuya ko Isa ye gbɔngbɔn jiri kan. Ii jama kan ka Pilate hankili yɛlɛman. 24 Ii tɛrɛ ye mɛn ɲininna, a diɲɛra wo ma. 25 Ii tun da kasoden mɛn na ko fɔ, mɛn tun ka mɔɔilu lamurunti ka mɔɔ faa, Pilate ka wo bila, kɔni a ka Isa to ii sawo rɔ.

26 Nba, ka ii to wala Isa ri a gbɔngbɔn diya, ii bɛnda cɛɛ do ri mɛn tɔɔ tɛrɛ ye ko Simɔn Sirɛnika. A bɔtɔ waa rɔ. Kɛlɛdenlu ka a mira ko a ye Isa gbɔngbɔn jiri ta ka bila a kɔ. 27 Ii watɔla, jama siyaman bilara ii kɔfɛ. Muso doilu tɛrɛ ye kasila ka kule jama tɛma. 28 Isa ka iyɛlɛman ka a fɔ ii yɛ ko: «Jerusalɛmu musoilu, ai kana kasi nde la ko rɔ. Ai ye kasi ai jɛrɛ ni ai denilu la ko rɔ, 29 ka a masɔrɔn jakankata waati natɔ Jerusalɛmu kan. Wo lon, ai ri a fɔ ko: ‹Muso densɔrɔnbali, baraka ri don ii la ko rɔ. Muso mɛn ma den ko lɔn, a ni mɛn ma sin di den si ma, baraka ri don ii la ko rɔ.› 30 Wo tuma, mɔɔilu ri a fɔ koyinkɛilu yɛ ko: ‹Be an kan.› Ii ri a fɔ tindiilu yɛ ko: ‹Birin an kan ka an natunun,› 31 baa ko mɛn kɛtɔ n na, ni mɔɔilu ri wo su kɛ jiri kɛndɛ la, nfen di kɛ jiri jaran na wo rɔ?»

32 Ii wara Isa ni kojuu kɛla fila malɔ gbɔngbɔnni diya. 33 Ii sera dinkira mɛn tɔɔ ko Kunkolo tuma mɛn na, ii ka Isa gbɔngbɔn jiri kan, a ni kojuu kɛla fila wo. Kojuukɛla kelen gbɔngbɔnda jiri do kan Isa bolokinin ma, a to kelen gbɔngbɔnda jiri kan a bolomaran ma. 34 Ka Isa gbɔngbɔnnin to jiri kan, a ka a fɔ ko: «N Fa, i ye ii makoto, baa ii ra ko mɛn kɛ, ii ma wo lɔn.» Wo tuma, tɛsidilu ka matɛɛli kɛ ka a la faanin dafara.

35 Jama ba lɔnin tɛrɛ ye wo bɛɛ ragbɛla. Judiya ɲɛmɔɔilu tɛrɛ ye Isa dɔɔyala kojuuya. Ii ka a fɔ ko: «A ka doilu kisi kɔrɔman. Ni Alla la mɔɔ Ɲenematɔmɔnin de a ri, a ye a jɛrɛ kisi sisɛn.» 36 Tɛsidiilu fanan ka Isa lafɛya, ka a sɔ rɛsɛnji tintiriɲanin dɔ. 37 Ii ka a fɔ a yɛ ko: «Ni Judiyailu la mansa le i ri, i ye i jɛrɛ kisi.» 38 Sɛbɛli do tɛrɛ ye walan kan Isa kun dɔ. A sɛbɛni wo kan ko: «Judiyailu la mansa le ɲin di.»

39 Kojuukɛla mɛnilu gbɔngbɔnni Isa dafɛ, wo kelen fanan ka Isa lafɛya. A ka a fɔ ko: «I tɛ Mɔɔ Ɲenematɔmɔnin di wa? I jɛrɛ kisi ka an fanan kisi.» 40 Kɔni a duɲɔɔ cɛɛ jamanda a ma ka a jabi: «I tɛ silan Alla yɛ wa? I ma a lɔn ko an bɛɛ gbɔngbɔnni. 41 Andeilu ka kan ka tɔrɔya ɲin sɔrɔn, baa an ka kojuu mɛn kɛ, wo sara le wo ri. Kɔni ale ma kojuu si kɛ.» 42 A ka a fɔ Isa yɛ ko: «Isa, i wa don i la mansaya rɔ, i ye i hankili to n dɔ.» 43 Isa ka a jabi: «N di tuɲa fɔ i yɛ. Bi jɛrɛ i ri kɛ n dafɛ harijeene.»

44 Nba tele la telen waati senin, dibi donda jamana fan bɛɛ rɔ. A tora ten haan tele kɔla waati. 45 Ka a masɔrɔn, tele ma bɔ fewu! Alla batobonba tɛɛtɛɛ faanin farara a tɛma. 46 Isa ka a kan nabɔ, wo rɔ, ko: «N Fa, n da n nii don i bolo.» A banni wo fɔla, a ka a nii bila.

47 Romu tɛsidi kuntii ka ko wo bɛɛ yennin tuma mɛn na a ka Alla tando ka a fɔ: «Tuɲa ka fisa: cɛɛ ɲin telennin tɛrɛ!» 48 Mɛnilu lɔni tɛrɛ ye ka wo bɛɛ lakɔrɔsi, ka ban ka ii sisi magbasi nimisali ni jusu makasi rɔ, ka i kɔsɛ so kɔndɔ. 49 Kɔni muso mɛnilu tun da to Isa kɔ kɛbi a bɔ waati Kalile, a ni a lɔnba tɔilu bɛɛ, ii bɛɛ tora yɔrɔ jan ka wo bɛɛ mafɛnɛ.

50,51 Nba, cɛɛ do tɛrɛ ye mɛn tɔɔ ko Yusufu. A bɔni Arimate, so mɛn ye Jude mara rɔ. Mɔɔ ɲuma le tɛrɛ a ri, a ni mɔɔ telenni. A jii lani Alla la mansaya rɔ. A tɛrɛ ye Judiyailu la ɲɛmɔɔ dɛkuru rɔ, kɔni dɛkuru wo tun ka mɛn natɛɛ ka mɛn kɛ Isa la, wo ma diya a yɛ. 52 A wara Pilate maɲininka Isa su la ko rɔ. 53 Yusufu wara Isa su lajii ka bɔ gbɔngbɔnjiri kan a ka a kansankɛ ka wa a don kaburu rɔ. Kaburu wo le senni farakolo rɔ ikomin falan. Su si tun ma la wo kɔndɔ fɔlɔ. 54 Ɲɔɲɔ Lon ɲarasii lon de tɛrɛ. Ni tele bera Ɲɔɲɔ Lon di bɔ.

55 Muso mɛnilu tɛrɛ ye Isa kɔ kɛbi a bɔ tuma Kalile mara rɔ, woilu bilara Yusufu kɔ ka wa su don diya. Wo bolo ma, ii ka kaburu yen, ka Isa su don ɲa fanan yen. 56 Ii ka i kɔsɛ so kɔndɔ. Ii ka tulu suman duman ni latikolon dabɛn Isa su yɛ, ka ban ka ii ɲɔɲɔ. Ka bɛn sariya ma, ii ma baara si kɛ Ɲɔɲɔ Lon.