A Damira 35

Yakuba wara Beteli

1 Lon do rɔ, Alla ka a fɔ Yakuba yɛ ko: «I ye wa i sii Beteli. I wa se ye, i ye saraka bɔ diya do lɔ Alla yɛ, mɛn ka a jɛrɛ yiraka i la wo lon ka a tɛrɛn i boritɔ i kɔrɔcɛ Esawu kɔrɔ.»

2 Wo rɔ, Yakuba ka a fɔ a la denbaya ni a la mɔɔilu bɛɛ yɛ ko: «Joo mɛnilu ye ai bolo, ai ye wo bɛɛ lafili. Ai ye ai jɛrɛ ladaha, ka ai la faaninilu yɛlɛman. 3 An bɔtɔ yan ka wa Beteli. N watɔ saraka bɔ diya do lɔla Alla yɛ ye, mɛn ka n na tarali lamɛn ka n dɛmɛn n na tɔrɔya waati rɔ. A ra to n fɛ n na taama bɛɛ rɔ.»

4 Joo mɛnilu tɛrɛ ye ii bolo, ii nara wo bɛɛ di Yakuba ma, a ni tololafen mɛnilu tɛrɛ ye ii tolo la. Yakuba ka denka sen jiriju ba do kɔrɔ Sɛkɛmu so dafɛ, ka wo fen bɛɛ dokon. 5 Ii wulira ka wa tuma mɛn na, Alla ka silan ba bila ye mɔɔilu la so bɛɛ kɔndɔ. Wo le ka a kɛ, mɔɔ si ma bɔ ka bila Yakuba ni a dencɛilu kɔ.

6 Yakuba ni a la mɔɔilu sera Lusi, so mɛn tɔɔ bi ko Beteli. Wo ye Kanaan jamana le rɔ. 7 Yakuba ka saraka bɔ diya lɔ Alla yɛ ye, ka a tɔɔ la ko: «Beteli la Alla,» ka a masɔrɔn a ka a bori a kɔrɔcɛ Esawu kɔrɔ tuma mɛn na, Alla ka a jɛrɛ yiraka a la dinkira wo le rɔ.

8 Wo tuma, Debora sara, mɛn tun ka Rebeka lamɔ. Ii ka wo su don jiriju do kɔrɔ Beteli so dafɛ, ka jiri wo tɔɔ la ko An Ye Kasila Jiri Ɲin Kɔrɔ.

9 Yakuba nara Beteli ka bɔ Padani Aramu tuma mɛn na, Alla ka a jɛrɛ yiraka a la ikɔ tuunni, ka kuma ka baraka don a la ko rɔ. 10 Alla ka a fɔ a yɛ ko: «I tɔɔ le tɛrɛ ko Yakuba, kɔni i tɔɔ tɛ ten butun ko Yakuba. I tɔɔ le sisɛn ko Isirayɛli.» Alla ka a tɔɔ la ko Isirayɛli wo ɲa le ma. 11 Alla ka a fɔ a yɛ ikɔ tuunni ko: «Alla Sebɛɛtii le nde ri. I ye jiri ka siyaya. Jamana siyaman di bɔ i rɔ. I bɔnsɔn doilu ri kɛ mansailu ri. 12 N ka duu mɛn di Iburahima ni Isiyaka ma, n di wo di i ma. I bɔnsɔn mɛnilu natɔ i kɔ, n di a di woilu fanan ma.»

13 Alla kumara Yakuba yɛ dinkira mɛn na, a wara. 14 Yakuba ka tɔɔmasere kabakudun do lɔ dinkira wo rɔ, Alla kumara a yɛ dinkira mɛn dɔ kɔnin. A ka rɛsɛnji labɔn kabakudun wo kan, ka Alla sɔ wo rɔ. A ka tulu fanan nabɔn a kan. 15 Alla kumara a yɛ dinkira mɛn na, Yakuba ka wo dinkira tɔɔ la ko Beteli.

Rasɛli la saya ko

16 Ii bɔra Beteli ka wa. Ii tun ma sudunya Efirata la tuma mɛn na, Rasɛli moyi lon sera. A la tin gbɛlɛnyara kosɛbɛ. 17 A ye tin kan tuma mɛn na, tinkɔrɔsilali ka a fɔ a yɛ ko: «I kana silan, i ra dencɛ kura sɔrɔn.»

18 Kɔni Rasɛli ma bɔ a rɔ. A satɔla ka a den tɔɔ la ko Bɛnoni*35.18 Bɛnoni kɔrɔ ye le ko «tɔrɔya dencɛ». A sanin kɔrɔ, Yakuba ka den tɔɔ la ko Bɛniyaminu*35.18 Bɛniyaminu kɔrɔ ye le ko «bolokinin ma dence».

19 Nba, Rasɛli sara. Ii ka a su don Efirata sila da la. Efirata wo tɔɔ le bi ko Betilɛhɛmu. 20 Yakuba ka tɔɔmasere kabakudun do lɔ Rasɛli kaburu kan. Kabakudun wo lɔni ye haan bi.

Yakuba dencɛilu

21 Isirayɛli ni a la mɔɔilu bɔra ye ka wa ai la faaninbonilu lɔ Mikidali Edɛri kɔma.

22 Ai siini ye tuma mɛn na, Rubɛn ka i la Bilaha fɛ, mɛn ye a fa Isirayɛli jɔn muso do ri. Rubɛn ka mɛn kɛ, wo fɔra a fa Isirayɛli yɛ.

Yakuba dencɛilu tɛrɛ mɔɔ tan ni fila le ri. 23 Leya ka Rubɛn de fɔlɔ sɔrɔn, ka Simeyɔn tuun wo la, ka Lebi tuun wo la, ka Juda tuun wo la, ka Isakari tuun wo la, ka Sabulɔn tuun wo la. Rubɛn tɛrɛ Yakuba den fɔlɔ le ri. 24 Rasɛli dencɛilu tɛrɛ ye Yusufu ni Bɛniyaminu ri. 25 Rasɛli la jɔnmuso Bilaha ka Daan ni Nafitali sɔrɔn. 26 Leya la jɔnmuso Silipa ka Kadi ni Asɛri sɔrɔn. Nba, woilu le Yakuba dencɛilu le ri, a musoilu ka mɛn sɔrɔn a yɛ Padani Aramu.

Isiyaka la saya ko

27 Nba, Yakuba sera a fa Isiyaka wara Mamere, Kiriyati Ariba so da la. Bi, mɔɔilu ye a fɔla Kiriyati Ariba le ma ko Heburɔn. Iburahima siini tɛrɛ dinkira wo le rɔ. Isiyaka fanan siini tɛrɛ ye le. 28 Isiyaka sɔrɔn ka san kɛmɛ ni san biseyin (180) bɔ tuma mɛn na, 29 a sara ka la a benbailu kan. A kɔrɔra ka a la kɔrɔya diya bɔ. A dencɛ fila Esawu ni Yakuba ka a su don.