1 Dunuɲa mɔɔilu bɛɛ tɛrɛ ye kan kelen de mɛnna. Ii bɛɛ tɛrɛ ye i ɲɔɔn famunna. 2 Ii bɔra telebɔ fan dɔ, ka wa gbɛkannan ba do tɛrɛn Sineyari jamana rɔ. Ii ka i sii dinkira wo rɔ. 3 Lon do rɔ, ii ka a fɔ i ɲɔɔn yɛ ko: «An ye birikiilu gbasi ka ii janin kosɛbɛ.» Ii ma kabakudun ta fɔɔ biriki. Ii ma boro fanan ta, fɔɔ tulubɔ fasanin. 4 Ii ka a fɔ ko: «An ye so lɔ an jɛrɛ yɛ, ka sankaso jan lɔ a kɔndɔ. Wo lɔ ye se haan sankolo rɔ, sa an di tɔɔ sɔrɔn. Ni an ma wo kɛ, an di jɛnsɛn duukolo fan bɛɛ fɛ.»

5 Allabatala jiira ka so ni sankaso jan dagbɛ, adamadenilu ka mɛn lɔ. 6 A ka a fɔ ko: «A ragbɛ. Ii bɛɛ ye siya kelen de ri, ii bɛɛ ye kan kelen de mɛnna. Ii ye baara mɛn kan ɲin, ii la baara fɔlɔ le wo ri. A tɛ mɛn bakɛ, ii wa ii miri fen fen ma, ii ri se wo kɛla. 7 An ye jii ka ii kan basan, sa ii ti nala sela i ɲɔɔn kan mɛnna butun.»

8 Wo rɔ, Allabatala ka ii farafara ka ii bɔ dinkira wo rɔ, ka ii jɛnsɛn duukolo fan bɛɛ rɔ. Ii la so lɔ ko ra dan wo rɔ. 9 Wo le kosɔn, dinkira wo tɔɔ lara ko Babɛli, baa Allabatala ka dunuɲa mɔɔilu bɛɛ kumakan basan ye le, ka ban ka ii jɛnsɛn duukolo fan bɛɛ rɔ.

10 Nba, Sɛmu bɔnsɔn de ɲin di.

Sɛmu sɔrɔn ka san kɛmɛ (100) bɔ tuma mɛn na, a ka Aripasadi sɔrɔn. Wo kɛra san fila ji dunba kɔ. 11 Aripasadi sɔrɔn kɔrɔ, Sɛmu ka san kɛmɛ loolu (500) le kɛ, ka dencɛ ni denmusoilu sɔrɔn.

12 Aripasadi sɔrɔn ka san bisawa san loolu (35) bɔ tuma mɛn na, a ka Selasi sɔrɔn. 13 Selasi sɔrɔn kɔrɔ, Aripasadi ka san kɛmɛ naanin san sawa (403) le kɛ, ka dencɛ ni denmusoilu sɔrɔn.

14 Selasi sɔrɔn ka san bisawa (30)

bɔ tuma mɛn na, a ka Ebɛri sɔrɔn. 15 Ebɛri sɔrɔn kɔrɔ, Selasi ka san kɛmɛ naanin san sawa (403) le kɛ, ka dencɛ ni denmusoilu sɔrɔn.

16 Ebɛri sɔrɔn ka san bisawa ni san naanin bɔ tuma mɛn na, a ka Pelɛji sɔrɔn. 17 Pelɛji sɔrɔn kɔrɔ, Ebɛri ka san kɛmɛ naanin ni san bisawa (430) le kɛ, ka dencɛ ni denmusoilu sɔrɔn.

18 Pelɛji sɔrɔn ka san bisawa (30) bɔ tuma mɛn na, a ka Rehu sɔrɔn. 19 Rehu sɔrɔn kɔrɔ, Pelɛji ka san kɛmɛ fila san kɔnɔndɔ (209) le kɛ, ka dencɛ ni denmusoilu sɔrɔn.

20 Rehu sɔrɔn ka san bisawa san fila (32) bɔ tuma mɛn na, a ka Seruki sɔrɔn. 21 Seruki sɔrɔn kɔrɔ, Rehu ka san kɛmɛ fila san wɔrɔnwula (207) le kɛ, ka dencɛ ni denmusoilu sɔrɔn.

22 Seruki sɔrɔn ka san bisawa san fila (32) bɔ tuma mɛn na, a ka Nakɔri sɔrɔn. 23 Nakɔri sɔrɔn kɔrɔ, Seruki ka san kɛmɛ fila (200) le kɛ, ka dencɛ ni denmusoilu sɔrɔn.

24 Nakɔri sɔrɔn ka san muwan ni san kɔnɔndɔ (29) bɔ tuma mɛn na, a ka Teraki sɔrɔn. 25 Teraki sɔrɔn kɔrɔ, Nakɔri ka san kɛmɛ san tan kɔnɔndɔ (119) le kɛ, ka dencɛ ni denmusoilu sɔrɔn.

26 Teraki sɔrɔn ka san biwɔrɔnwula (70) bɔ tuma mɛn na, a ka Iburama ni Nakɔri ni Haran sɔrɔn.

27 Teraki bɔnsɔn de ɲin di. A ka Iburama ni Nakɔri ni Haran sɔrɔn. Haran ka Luti sɔrɔn. 28 Haran sara ka a fa kɛndɛ to. A la saya kɛra a sɔrɔn jamana le rɔ, Kalide jamana kɔnin. A sara Uri so le kɔndɔ. 29 Iburama ni Nakɔri ka furu kɛ. Iburama muso tɔɔ le tɛrɛ ko Sarayi. Nakɔri ka Haran denmuso do furu, mɛn tɔɔ ko Milika. Haran denmuso do fanan tɔɔ ko Sisika. 30 Sarayi tɛrɛ densɔrɔnbali le ri. Den tun tɛ a bolo.

31 Nba, Teraki ka a dencɛ Iburama ni a mamarencɛ Luti ta ka wa Kanaan jamana rɔ. Luti ye Haran den de ri. Teraki ka a biranmusoni Sarayi fanan ta, mɛn ye Iburama muso ri. Ii bɛɛ bɔra Uri so la ka Kanaan bɔnsɔn na jamana sila mira. Uri wo ye Kalide jamana le rɔ. Kɔni ii se mɛn kɛni Haran, ii ka i sii ye. 32 Teraki si bɛɛ ladɛnnin kɛra san kɛmɛ fila san loolu (205) le ri. A sara Haran ye.