1 Kɔni Alla hankili tora Nuhan dɔ, a ni waa rɔ soboilu ni so kɔndɔ kolofenilu, mɛnilu tɛrɛ a kun kulunba kɔndɔ. Wo rɔ, Alla ka fɔɲɔ lawuli ka a tɛɛ duu kan ka ji majii. 2 Duukolo ji bondon da tuunda, a ni sankolo ji bondon. Sanci tɛɛra. 3 Ji tora majiila dɔɔnin dɔɔnin duukolo kan. Tele kɛmɛ tele biloolu (150) taminda tuma mɛn na, ji madɔɔyara. 4 A karo wɔrɔnwulana (7) tele tan ni wɔrɔnwulana (17), kulunba nara i sii Arara jamana koyinkɛ do kan. 5 Ji tora madooyala fɔɔ ka se karo tanna (10) ma. Wo karo tele fɔlɔ, koyinkɛilu kunilu bɔra.

6 Tele binaanin (40) taminda tuma mɛn na, Nuhan ka fɔɲɔ don da laka, a tun ka mɛn bɔ kulunba la. 7 A ka ɲaɲasila do bila. Wo bɔra ka taa ni sɛ kɛ haan ji jara duukolo kan tuma mɛn na. 8 Wo kɔ, a ka kanba do bila ka a kɔrɔsi ni ji ra dɔɔya duukolo kan. 9 Kanba wo bɔ mɛn kɛnin, a ma sii yɔrɔ sɔrɔn. A ka a kɔsɛ ka na Nuhan ma kulunba kɔndɔ, baa ji tɛrɛ ye duukolo yɔrɔ bɛɛ kan fɔlɔ. Nuhan ka a bolo labɔ ka kanba mira ka a ladon a fɛ kulunba kɔndɔ. 10 Nuhan ka a to tele wɔrɔnwula (7) ye tamin ikɔ tuun, ka ban ka kanba bila ikɔ. 11 Wura fɛ, kanba ka a kɔsɛ Nuhan ma. Olibiye fira kɛndɛ ye a da la. Nuhan ka a lɔn wo le rɔ ko ji ra fɔlɔ madɔɔyala duukolo kan kosɛbɛ. 12 A ka a to tele wɔrɔnwula (7) ye tamin ikɔ tuun, ka ban ka kanba bila. Kanba wa mɛn kɛni, a ma a kɔsɛ Nuhan ma wo kɔ. 13 Nuhan sɔrɔn san kɛmɛ wɔɔrɔ ni kelen (601), wo karo fɔlɔ tele fɔlɔ, ji tun tɛ duukolo kan butun. Nuhan ka kulunba kunnafen waranka ka a yen ko duu ra fɔlɔ jala. 14 A karo filana (2) tele muwan ni wɔrɔnwulana (27) sera ka a tɛrɛn duu ra ja fewu!

15 Nba, Alla kumara Nuhan fɛ ko: 16 «I ye bɔ kulunba kɔndɔ sisɛn, i ni i muso ni i dencɛilu ni ii musoilu. 17 I ye niimafen bɛɛ labɔ. Kɔnɔilu wo, waa rɔ soboilu wo, so kɔndɔ kolofenilu wo, ni niimafen mɛsɛn mɛnilu ye taamanna duu ma, i ye ii bɛɛ labɔ, sa ii ri jiri ka siyaya duukolo fan bɛɛ rɔ.»

18 Wo rɔ, Nuhan bɔra kulunba kɔndɔ, a ni a dencɛilu ni a muso ni a dencɛilu musoilu. 19 Nimafen bɛɛ bɔra. Waarɔ soboilu wo, so kɔndɔ kolofenilu wo, kɔnɔilu wo, ni niimafen mɛsɛn mɛnilu ye taamanna duu ma, bɛɛ ni a la siya bɔra kulunba kɔndɔ.

20 Nuhan ka Alla saraka bɔ diya do lɔ ka Allabatala bato kanma. A ka sobo dahanin ni kɔnɔ dahanin su bɛɛ do ta ka Allabatala sɔ ii rɔ. A ka ii janin Alla saraka bɔ diya wo kan, ka ii kɛ buuri ri. 21 Saraka wo suma diyara Allabatala yɛ. Allabatala ka a latɛɛ ko: «N tɛ duu danka adamaden kosɔn butun. N ka a lɔn ko ka bɔ ii den mɛsɛnya waati ma fɔɔ ka na se ii la mɔɔya laban ma, ii miriya bɛnnin kojuu le ma. Hali wo, n tɛ sɔn ka niimafen bɛɛ halaki butun, ikomin n ka a kɛ ɲa mɛn ma fɔlɔ. 22 Ka bɔ bi ma ka wa haan dunuɲa laban, si foyi tuma ni suman ka tuma, nɛnɛ tuma ni tara tuma, sanma ni telema, su ni tele, wo si tɛ ban.»