1 Adama bɔnsɔn tɔɔ le sɛbɛni ɲin di.

Alla ka mɔɔ dan lon mɛn na, a ka a dan ka a kɛ a jɛrɛ munuɲa le ri. 2 A ka ii dan ka ii kɛ cɛɛ ni muso ri. A banni ii danna, a kumara ka baraka don ii rɔ ka ii tɔɔ la ko mɔɔ.

3 Adama sɔrɔn ka san kɛmɛ san bisawa (130) bɔ tuma mɛn na, a ka dencɛ sɔrɔn, mɛn kɛra a la munuɲa ri. Adama ni a dencɛ tɛrɛ su kelen de ri. A ka a tɔɔ la ko Sɛti. 4 Sɛti sɔrɔn kɔrɔ, Adama ka san kɛmɛ seyin (800) de kɛ, ka dencɛ ni denmusoilu sɔrɔn. 5 A si san bɛɛ ladɛnnin kɛra san kɛmɛ kɔnɔndɔ san bisawa (930) le ri. Wo dafanin, a sara.

6 Sɛti si ka san kɛmɛ san loolu (105) bɔ tuma mɛn na, a ka dencɛ sɔrɔn. A ka wo tɔɔ la ko Enosi. 7 Enosi sɔrɔn kɔrɔ, Sɛti ka san kɛmɛ seyin san wɔrɔnwula (807) le kɛ, ka dencɛ ni denmusoilu sɔrɔn. 8 Sɛti si san bɛɛ ladɛnnin kɛra san kɛmɛ kɔnɔndɔ san tan ni fila (912) le ri. Wo dafanin, a sara.

9 Enosi si ka san bikɔnɔndɔ (90) bɔ tuma mɛn na, a ka dencɛ sɔrɔn. A ka wo tɔɔ la ko Kenan. 10 Kenan sɔrɔn kɔrɔ, Enosi ka san kɛmɛ seyin san tan ni loolu (815) le kɛ, ka dencɛ ni denmusoilu sɔrɔn. 11 Enosi si san bɛɛ ladɛnnin kɛra san kɛmɛ kɔnɔndɔ san loolu (905) le ri. Wo dafanin, a sara.

12 Kenan si ka san biwɔrɔnwula (70) bɔ tuma mɛn na, a ka dencɛ sɔrɔn. A ka wo tɔɔ la ko Mahalalɛli. 13 Mahalalɛli sɔrɔn kɔrɔ, Kenan ka san kɛmɛ seyin san binaanin (840) de kɛ, ka dencɛ ni denmusoilu sɔrɔn. 14 Kenan si san bɛɛ ladɛnnin kɛra san kɛmɛ kɔnɔndɔ san tan (910) de ri. Wo dafanin, a sara.

15 Mahalalɛli si ka san biwɔɔrɔ san loolu (65) bɔ tuma mɛn na, a ka dencɛ sɔrɔn. A ka wo tɔɔ la ko Jɛrɛdi. 16 Jɛrɛdi sɔrɔn kɔrɔ, Mahalalɛli ka san kɛmɛ seyin san bisawa (830) le kɛ, ka dencɛ ni denmusoilu sɔrɔn. 17 Mahalalɛli si san bɛɛ ladɛnnin kɛra san kɛmɛ seyin san bikɔnɔndɔ san loolu (895) le ri. Wo dafanin, a sara.

18 Jɛrɛdi si ka san kɛmɛ san biwɔɔrɔ san fila (162) bɔ tuma mɛn na, a ka dencɛ sɔrɔn. A ka wo tɔɔ la ko Hanɔki. 19 Hanɔki sɔrɔn kɔrɔ, Jɛrɛdi ka san kɛmɛ seyin (800) de kɛ, ka dencɛ ni denmusoilu sɔrɔn. 20 Jɛrɛdi si san bɛɛ ladɛnnin kɛra san kɛmɛ kɔnɔndɔ san biwɔɔrɔ san fila (962) le ri. Wo dafanin, a sara.

21 Hanɔki si ka san biwɔɔrɔ san loolu (65) bɔ tuma mɛn na, a ka dencɛ sɔrɔn. A ka wo tɔɔ la ko Metusalemu. 22 Metusalemu sɔrɔn kɔrɔ, Hanɔki ka san kɛmɛ sawa (300) le kɛ Alla la dɛn dɔ, ka dencɛ ni denmusoilu sɔrɔn. 23 Hanɔki si san bɛɛ ladɛnnin kɛra san kɛmɛ sawa san biwɔɔrɔ san loolu (365) le ri. 24 Hanɔki mɛnda Alla la dɛn dɔ. A tunura ka a masɔrɔn Alla ka a ta ka wa a ri.

25 Metusalemu si ka san kɛmɛ san biseyin san wɔrɔnwula (187) bɔ tuma mɛn na, a ka dencɛ sɔrɔn. A ka wo tɔɔ la ko Lamɛki. 26 Lamɛki sɔrɔn kɔrɔ, Metusalemu ka san kɛmɛ wɔrɔnwula san biseyin san fila (782) le kɛ, ka dencɛ ni denmusoilu sɔrɔn. 27 Metusalemu si bɛɛ ladɛnnin kɛra san kɛmɛ kɔnɔndɔ san biwɔɔrɔ san kɔnɔndɔ (969) le ri. Wo dafanin, a sara.

28 Lamɛki si ka san kɛmɛ san biseyin san fila (182) bɔ tuma mɛn na, a ka dencɛ sɔrɔn. 29 A ka wo tɔɔ la ko Nuhan. A ka a fɔ ko: «Allabatala ka duu tiɲan ka an bila baara gbɛlɛn dɔ. Kɔni cɛɛ ɲin de kɛtɔ an masabarila baara gbɛlɛn jusukasi kosɔn.» 30 Nuhan sɔrɔn kɔrɔ, Lamɛki ka san kɛmɛ loolu san bikɔnɔndɔ san loolu (595) le kɛ, ka dencɛ ni denmusoilu sɔrɔn. 31 Lamɛki si bɛɛ ladɛnnin kɛra san kɛmɛ wɔrɔnwula san biwɔrɔnwula san wɔrɔnwula (777) le ri. Wo dafanin, a sara.

32 Nuhan ka san kɛmɛ loolu (500) sɔrɔn tuma mɛn na, a ka Sɛmu ni Hamu ni Jafɛti sɔrɔn.