1 Yakuba ka a dencɛilu kili ko:

«Ai ye na ai ladɛn n tɔrɔfɛ. N ye a fɛ ka koilu lase ai ma, mɛnilu kɛtɔ ii la sini natɔ kɔnin.

2 N dencɛilu, ai ye na ai tolo malɔ nde ai fa Yakuba la,

a ye fola n ma ko Isirayɛli.

3 Rubɛn, ile le n dencɛ fɔlɔ ri.

I fɔlɔ le kɛra n na cɛɛya ni n na fanka fɔlɔ ri.

Bonya ni sebaya ye i bolo ka tamin i dɔɔcɛilu kan,

4 kɔni i ye ikomin ji ba woyetɔ, mɛn ti se a jɛrɛ mirala.

I ti nala kɛla bonkun ri fewu, baa i ra i la i fa la lafen kan ka si a muso fɛ.

A ka a la n na lafen kan ka a manɔɔ.

5 Simeyɔn ni Lebi miriya ye ko kelen de ri.

Ii ka ii la fanmuruilu ta ka wa tiɲannin kɛ.

6 Ii wa kuma gbundu rɔ, n tɛ sɔn ka n sen bila wo rɔ.

Ii wa ladɛn kɛ, n di n ban wala,

baa ii mɔnɛra ka mɔɔilu faa.

Ii juuyara ka nisiilu senfasailu tɛɛ.

7 Alla ye tɔrɔya la ii kan ii la duɲa wo kosɔn, baa ii la mɔnɛ ka juu,

a ni ii la ɲenikɛjuuya wo kosɔn, baa ii la ɲenikɛjuuya ka ii kɛ hinabaliilu le ri.

N di ii bɔnsɔn datala Yakuba bɔnsɔn na jamana rɔ.

N di ii lajɛnsɛn Isirayɛlika la jamana yɔrɔ bɛɛ rɔ.

8 Juda, i badenmailu ri ile le tando.

I ri se i juuilu la.

I faludenmailu ri ii majii i kɔrɔ.

9 Juda ye ikomin yara kanberen de,

mɛn di wa sobo faa ka wo dɔɔn,

ka na i rasɔmɔn ka i la.

Yon di a lawuli?

10 Faamaya gbeleke ti nala bɔla Juda bolo.

Mansaya gbeleke ri to a bɔnsɔn bolo

fɔɔ mansaya tii wa na,

dunuɲa bɛɛ ri i majii mɛn kɔrɔ.

11 A ri a la fali sidi nɔnbɔ la,

ka a la fali den sidi rɛsɛn nɔnbɔju ɲuma ɲuma la.

A ri a la faanin ko rɛsɛnji la,

ka a la durukiba ko rɛsɛnji la, mɛn wulennin ikomin jeli.

12 A ɲailu ri lafin ikomin rɛsɛnji.

A ɲinilu ri lagbɛ ikomin nɔnɔ.

13 Sabulɔn di i sii kɔɔji da la.

Kulunbailu lɔ diya ri kɛ a wara ri.

A la duu ri wa fɔɔ Sidɔn so fan fɛ.

14 Isakari ye ikomin fali, fanka ba ye mɛn na.

A ri a la a la donin bɔrɔilu tɛma.

15 Ni a ka a yen tuma mɛn na

ko jamana wo ka ɲin,

ko yɔrɔ wo duman kosɛbɛ,

a ri a kɔ rabɛn donin ta kanma

ka kɛ jɔn di ka diyagboya baara kɛ.

16 Daan di a sii a la mɔɔilu kun na ka ii la kiti tɛɛ,

a ri kɛ ikomin Isirayɛli kabila tɔilu fanan.

17 Daan ye ikomin sa, mɛn lanin sila dafɛ,

ikomin fɔnfɔnni, mɛn ye sila mɛsɛnilu la.

A ri soo cin a sen ma,

ka soo tii labe a kɔ kan.»

18 Yakuba ka a fɔ ko: «Ɛɛ Allabatala, n ye i makɔnɔla, i ye n kisi.»

19 A ka a fɔ ko:

«Benkaninnailu ri na be Kadi kan,

kɔni a ri ii gbɛn ka ii kɔsaran kojuuya.

20 Asɛri ri suman duman sɔrɔn;

a ri dɔɔnnifen duman di mansailu ma.

21 Nafitali a la fɛrɛnin ikomin minanmuso, mɛn ye a jɛrɛ ma,

mɛn ye den ɲumailu sɔrɔnna a jɛrɛ ma.

22 Yusufu ye ikomin nɔnbɔ mɛn ye a denna kosɛbɛ,

nɔnbɔ mɛn lɔnin tenke dafɛ,

mɛn bolon ye janjanna fɔɔ ka tamin dandan kun na.

23 Biɲɛkalatiilu wulira a kanma kojuuya.

Ii ka biɲɛilu lafili a ma ka a tɔrɔ kosɛbɛ,

24 kɔni Yusufu la biɲɛkala ma yɛrɛyɛrɛ.

A boloilu ka fanka sɔrɔn Alla Sebɛɛtii bolo,

mɛn ye Yakuba dɛmɛnna.

Wo le ye mɔɔ latankala le ri,

mɛn ye Isirayɛli lakandanna,

mɛn barakani ikomin farakolo.

25 I fa Maari ye i dɛmɛnna.

Alla Sebɛɛtii ye ɲumaya kɛla i yɛ.

A ri fen ɲumailu di i ma ka bɔ san ma.

A ri ji di i ma ka bɔ duu kɔrɔ.

A ri i denilu ni i la kolofenilu siyaya.

26 Fen ɲumailu ye bɔla koyinkɛ kɔrɔilu la,

nanfuluilu ye bɔla fɔlɔ tindiilu la,

kɔni Alla ka ɲumaya mɛnilu kɛ i fa yɛ, woilu ka bon woilu bɛɛ ri.

Alla ye wo ɲɔɔn kɛ Yusufu yɛ.

Alla ye a kɛ, ɲumaya woilu ye mɛn Yusufu fɛ,

mɛn ɲenematɔmɔnni ka bɔ a badenmailu rɔ.

27 Bɛniyaminu fadinma ikomin bakɔrɔn kudu.

Sɔɔma a ye sobo mirala ka do dɔɔn.

Wura la, a ri a tɔ ratalan.»

28 Nba, Isirayɛli kabila tan ni fila le woilu ri. Ii fa duwara ii yɛ tuma mɛn na, a ka kuma woilu fɔ. A duwara ii kelen kelenna bɛɛ ye, bɛɛ ni a la duwa.

29 Nba, Yakuba ka a fɔ a dencɛilu yɛ ko: «N satɔla le ka la n benbailu kan. Ni n sara, ai ye wa n su don n benbailu dafɛ falan na, falan mɛn ye Hɛti bɔnsɔn Efurɔn na sɛnɛ rɔ. 30 Falan wo ye Makipela, Mamere telebɔ fan fɛ Kanaan jamana rɔ. N benba Iburahima ka dinkira wo le san Hɛti bɔnsɔn Efurɔn ma, ka a kɛ a la su don diya ri. 31 N benba Iburahima ni a muso n ma Saran su don diya ye ye le. N fa Isiyaka ni a muso n na Rebeka fanan su don diya ye ye le. N ka Leya su don ye le fanan. 32 Duu wo ni falan bɛɛ sanda Hɛti bɔnsɔn de ma.»

33 Nba, Yakuba banni kumala, a ka a la a la lafen kan ka sa, ka la a benbailu kan.