1 Ɲɔɲɔ Lon do rɔ, Isa ni a la karandenilu tamintɔ tɛrɛ ye sɛnɛ do tɛma. Ka ii to sɛnɛ tɛma, Isa la karandenilu ka sɛnɛsuman tɔnsɔn do bɔrɔndɔ ka a toto ka a dɔɔn. 2 Wo kɛra Farisi doilu ɲana. Ii ka a fɔ karandenilu yɛ ko: «Ko mɛn ma kan ka kɛ Ɲɔɲɔ Lon ma, ai ye wo kɛla nfenna?» 3 Isa ka ii jabi: «Kɔnkɔ tɛrɛ ye Mansa Dawuda ni a taama ɲɔɔnilu la, a ka mɛn kɛ, ai ma wo karan wa? 4 A donda Alla la bon kɔndɔ, saraka buru tɛrɛ ye yɔrɔ mɛn. Ka bɛn sariya ma, mɔɔ si ma kan ka buru wo dɔɔn fɔɔ sarakalaselailu. Kɔni mansa Dawuda ka wo ta ka a dɔɔn, ka do di a taama ɲɔɔnilu ma.» 5 Wo rɔ, Isa ka a fɔ ii yɛ ko: «Mɔɔ Dencɛ le ye Ɲɔɲɔ Lon tii ri.»

6 Nba, Ɲɔɲɔ Lon gbɛrɛ, Isa donda salibon do la ka mɔɔilu karan. Cɛɛ do tɛrɛ ye, mɛn bolokinin faanin a ma. 7 Nba sariya karanmɔɔ doilu ni Farisi doilu fanan tɛrɛ ye ye, mɛnilu tɛrɛ ye a kɔrɔsila kojuuya, baa ii tɛrɛ ye fɛrɛ ɲininna ka Isa jalaki. Ni a ka bolo janintɔ wo lakɛndɛya Ɲɔɲɔ Lon, ii ri a jalaki sababu sɔrɔn. 8 Kɔni Isa ka ii miriya lɔn. A ka a fɔ mɛn bolo janin a ma ko: «I wuli ka i lɔ an tɛma.» A ka a lɔ. 9 Isa ka jama maɲininka ko: «A ye di? A dahani ka koɲuma kɛ Ɲɔɲɔ Lon, wa kojuu? Ka mɔɔ kisi, wala ka a faa?» 10 A ka a ɲa lɔ ii bɛɛ rɔ, ka ban ka a fɔ cɛɛ wo yɛ ko: «I bolo rasɔmɔn!» A ka a bolo rasɔmɔn. I kɔrɔ ye, a kɛndɛyara. 11 Farisiilu ni sariya karanmɔɔilu ka wo yen tuma mɛn na, ii jusu bɔra kojuuya. Ii wara i ɲɔɔn yen ka a fɔ ko: «An ye nfen kɛ Isa la?»

12 Lon gbɛrɛ, Isa wara Alla matara diya koyinkɛilu yɔrɔ rɔ. A ka su muumɛ kɛ Alla matarala. 13 Duusa gbɛni, a ka a la karandenilu bɛɛ kili ka mɔɔ tan ni fila ɲenematɔmɔn ii rɔ, ka ii kɛ a la talibidenbailu ri. 14 Wo mɔɔ tan ni fila tɔɔ le ɲin di: Simɔn, Isa ka mɛn tɔɔ la ko Piyɛri, a ni a dɔɔcɛ Andere; Yakuba ni Yuhana; Filipe ni Baritɔlɔmi; 15 Matiyu ni Tomasi; Alife dencɛ Yakuba ni Simɔn Fasokaninden; 16 Yakuba dencɛ Juda; a ni Judasi Sikariyɔti, mɛn ye a janfa mɔɔ ri.

17 Nba, Isa ni talibidenba woilu jiira koyinkɛ la ka wa se gbɛkula do rɔ. Ii bɛnda karanden siyaman di ye. Jama ba fanan tɛrɛ ye ka bɔ yɔrɔ siyaman. Doilu bɔni Jerusalɛmu, doilu bɔni Jude mara rɔ. Doilu fanan bɔni kɔɔji da la, so mɛnilu tɔɔ ko Tiri ni Sidɔn. Ii bɛɛ nani ka ii tolo malɔ Isa la, ka lakɛndɛya. 18 Jenailu tɛrɛ ye mɛnilu tɔrɔla, woilu lakɛndɛyara fanan. 19 Mɔɔ bɛɛ tɛrɛ ye a ɲa ɲininna ka i maa Isa la, ka a masɔrɔn sebaya tɛrɛ ye a bolo ka jankarɔtɔilu bɛɛ lakɛndɛya.

20 Isa ka a ɲa lɔ a la karandenilu rɔ ka a fɔ ii yɛ ko:

«Aile barakaden mɛnilu ye fantanya rɔ,

baa Alla la mansaya ye ai ta le ri.

21 Aile barakadenilu, kɔnkɔ ye aileilu mɛn na bi,

baa ai ri fa.

Aile barakadenilu ai mɛn ye kasila bi,

baa ai ri yɛlɛ.

22 Aile barakadenilu ni mɔɔilu ka ai lagboyaɲɛ, ka i ban ai rɔ, ka ai nanin, ka ai tɔɔ tiɲan Mɔɔ Dencɛ kosɔn. 23 Ai ye sɛwa wo rɔ kosɛbɛ fo ka ɲaalen, baa ai ri baraji ba sɔrɔn harijeene rɔ. Mɛnilu ri kojuu su wo kɛ ai la, woilu benbailu ka wo ɲɔɔn kɛ Alla la kelalaselailu fanan na.

24 Gbalo ye ai yɛ, mɛnilu ye nanfulutii ri sisɛn,

baa ai ra ai la hɛrɛ sɔrɔn ten.

25 Gbalo ye ai yɛ, ai mɛnilu ye dɔɔnninna ka fa sisɛn. Ai ri kɔnkɔ.

Gbalo ye ai yɛ, ai mɛnilu ye yɛlɛla sisɛn. Ai ri duɲa ka kasi.

26 Gbalo ye ai yɛ, ni mɔɔilu ka ai tɔɔ ɲuma fɔ tuma bɛɛ,

baa woilu benbailu tɛrɛ ye wuya kelalaselailu bonyala wo ɲa kelen de ma.»

27 Isa ka a fɔ ko: «Ai, mɛnilu tolo ye n kan na, ai ye ai juuilu kanin, ka koɲuma kɛ ai lagboyaɲɛbailu yɛ. 28 Mɔɔ mɛnilu ye ai dankala, ai ye duwa woilu yɛ. Mɔɔ mɛnilu karagbɛlɛnman ai la, ai ye Alla matara woilu yɛ. 29 Ni mɔɔ ka i gbanfudu fan kelen gbasi, i ye a tɔ kelen lɔ a yɛ fanan. Ni mɔɔ ka i la duruki kɔrɔbila bɔ i bolo, i kana a mabali i la durukiba fanan tala. 30 Ni mɔɔ mɔɔ ka i tara, i ye wo sɔ. Ni mɔɔ ka fen do ta i bolo, i kana a fɔ a yɛ ko: ‹A di n ma.› 31 Ai ye a fɛ mɔɔilu yɛ ko mɛn kɛ ai yɛ, ai jɛrɛ ye wo ɲɔɔn kɛ mɔɔilu yɛ.

32 «Ni ai ka ai kaninbailu dɔrɔn kanin, julu su ɲuman de wo ri? Hali kojuukɛlailu fanan ye mɔɔ kaninna mɛn fanan ka ai kanin. 33 Ni ai ye mɔɔ ladiyala mɛn ka ai ladiya fanan, julu su ɲuman de wo ri? Hali kojuukɛlailu ye wo ɲɔɔn kɛla. 34 Ni ai ka julu don julu saralailu dɔrɔn na, julu su ɲuman de wo ri? Hali kojuukɛlailu ye julu donna a sara ko le rɔ. 35 Ai kɔni ye ai juuilu kanin, ka koɲuma kɛ ai yɛ. Ai ye julu don ii la, ka ban ka a sara ko to ye. Ni ai ka a kɛ ten, ai baraji ri wara; ai ri kɛ Alla Kɔrɔtaninba denilu jɛrɛ jɛrɛ ri. Ka a masɔrɔn ale ka ɲin mɔɔ bɛɛ ma, hali fisiriwali ni mɔɔ juuilu. 36 Ai ye kɛ hinaba ri, ikomin ai Fa Alla hinaba ri ɲa mɛn ma.»

37 Isa ka a fɔ ii yɛ ko: «Ai kana mɔɔilu jii kojuu kɛlailu ri. Wo rɔ, ai fanan ti nala jiila kojuu kɛla ri. Ai kana mɔɔ jalaki. Wo rɔ, ai fanan ti nala jalakila. Ai ye mɔɔilu makoto. Wo rɔ, Alla fanan di ai makoto. 38 Ai ye mɔɔilu sɔ, ai fanan di sɔ. Ai ri sɔ ikomin mɔɔ ye mɔɔ sɔla suman na ka wara ɲa mɛn ma. A ri fɛ lafa, ka a juujuu, ka a madii, ka do fanan la a kan, fɔɔ ka bon. Ai ri sɔ ten. Ai wa mɔɔilu sɔ ɲa mɛn ma, Ai fanan di sɔ wo ɲa ma.»

39 Wo rɔ, Isa ka kuma kɔrɔlama doilu fɔ ii yɛ ko: «A ye di? Ɲa funye di se ka ɲa funyen na gbeleke mira wa? Ii fila bɛɛ tɛ be denka rɔ wa? 40 Karanden ti se taminna a karanmɔɔ la, kɔni ni a ka i raja karanna kosɛbɛ, a ri kɛ a karanmɔɔɲɔɔ di.

41 «Ɲamanin mɛn ye i badenma ɲa ma, i ye wo mafɛnɛla nfenna, ka a tɛrɛn fɛrɛn mɛn ye i jɛrɛ ɲa ma, i tɛ wo kɔrɔsila? 42 I ri se ka a fɔ i badenma yɛ di ko: ‹N badenma, ɲamanin mɛn ye i ɲa ma, n di wo bɔ i ɲa ma›, ka a tɛrɛn fɛrɛn ye i jɛrɛ ɲa ma? Jɛrɛmayuwa! I ye fɛrɛn wo bɔ i jɛrɛ ɲa ma fɔlɔ. Kosa i jɛrɛ ɲa ri laka. Wo rɔ, i ri se ka ɲamanin bɔ i badenma ɲa ma.»

43 Nba, Isa ka a fɔ ko: «Jiri ɲuma ti se den koron kɛla. Jiri juu koron fanan ti se den ɲuma kɛla. 44 Jiri su ri lɔn a den fɛ. Toroden ni rɛsɛnden tɔnsɔn, wo si tɛ sɔrɔnna nɔnbɔwɔninma la. 45 Koɲuma ye bɔla mɔɔ ɲuma sɔnɔmɛ le rɔ. Kojuu ye bɔla mɔɔ juu sɔnɔmɛ le rɔ. Mɛn ye mɔɔ sɔnɔmɛ rɔ, wo kuma ri bɔ a da rɔ.»

46 Isa ko: «Nfenna ai ye a fɔla nde ma ‹Maari, Maari› ka a tɛrɛn ai tɛ n na kumakan bonyala? 47 Mɔɔ mɔɔ nani nde ma, ka a tolo malɔ n kan na ka wo mira, n di se ka wo la mɔɔ mɛn ma, n di wo fɔ ai yɛ. 48 A ye ikomin bonlɔla, mɛn ka duu sen ka a la bon ju birin farakolo kan. Sanci ba nara, ji bɔra. Ji woyora kojuuya ka se bon wo ma. Kɔni a ma foyi kɛ bon na, ka a masɔrɔn bon lɔni farakolo kan. 49 Mɔɔ mɛn tɛ n na kuma mirala, n di wo fanan la bonlɔla do ma. Bonlɔla wo ka a la bon lɔ kiɲɛ kan. A ma a juu sii farakolo kan. Sanci nara, ji bɔra. Ji woyen se mɛn kɛni bon ma, bon bera kojuuya ka tiɲan fewu!»