1 Ayene ka, ala abiyikala gye mo owowa ni awa mala ni wo yeye la lo. 2 Ala gyedo ko owe kpi iweyi ni ama ogya ko Ofilipi imbe awebe kala Otesalonika ni. Koni atasaha eyi ni, Owuso taha otugbagba shan kyoleho koshu neshi ni bwebe nu ni. 3 Oboba ni aba bala mani wogu bibi lalo, kwe agbotu bibi ikweyi kala kwe ko gyala egya la lo. 4 Aha ke ba kela ni Owuso kyogwu mo ahan ka, koni Owuso maha shu kweyi odaha oshu neshi nu. Aha ba yimu ko shasuse otu lalo, Owuso pini aba yimu ko shotu la, anu ni ya motu kaha ma ni. 5 Ala gye maha ba yo okwunu lonye lo, ake ba kela ko yo ofa yoya kaha gwu lalo. Owuso pini wo olobene kaha la! 6 Aha ba yimu shashishe naka kaha lo, kala, kase ashini, 7 koni awayikoko ko Okristi ni agboshu ko dala oka koza shishini. Aha ke byala neshi ishini abagye kpa ala ni, bye ene ya bya ayinu ni. 8 Ikweyi ki imu ni aha gbo dala sheyigagye ni yaha zolayi kaha kpo oshu neshi ko Owuso dala, koni aha yimu kala kotata ni! 9 Ayene hin, kokwokwoshi ala rela ko oko kpo owe ni aha ma kotata ni! Aha yoko ko otu ke eno shini ahan ka wegye dala ishini aba dala oshu neshi ni bwebe ko Owuso ni. 10 Ala wo olobene ka byoni Owuso we ni. Obagye kaha kpa ala ase ni kyogwu kpo Owuso ni, wo sere, kpo oneshi, agbotu bibi ipu kaha lo. 11 Ala gye mo aya kpa ala byoni awada kpa awene baya kpa ayi wa ni, 12 aha tala otugbagba kweyi shinyi shosha shala otu aki bala mala yoza owe ni ya sho Owuso otu ni, anu ni yala ogwu ipu ko obula kpi igyashi nu ni. 13 Oza ni ya ni aba shotunehe do Owuso kurutu ikweyi koni, ishini ala zela ko Owuso, na ala pwo bwe ebe kaha ni, ala kyogwu kpa anu byela ka asuse la lo, ke wela ko Owuso la, ni ya yoko ipu kala ni kyogwu ni. 14 Ayene, oza ni gbodagye kpa ala mani gbodagye kpo oda ka awogboso Owuso okpagye ko Oyahuda ni bipu ko Okristi Oyesu. Ala ba megye abo kase kala, byoni awa ma abo kase ko Oyahuda ni. 15 Ase ko Oyahuda pini ya Adole Oyesu kpa awobane yi ngmo la, aki daha egye. Owuso yanya kpa awa kotata! Awo omonyekwotu kananoho! 16 Atakirikwu ko wahobi ko tono dase ni wo Oyahuda lo ni shini ana ka ngma awa lo. Mani oni akpo ozalabi wa tukpa ikweyi wa. Ogwejeji anya ko Owuso sa ikweyi wa.

17 Ayene, ishini ashala bita kishi gbayayi ni, ikpiye pini shala bita la ke wo otu kaha la lo. Aba rela kala kotata, kweyi ayiyitagye mo aki bawa mala ba. 18 Agbi imu ko webe kala. Ami Obulus ya takirikwu ko wa igbo oye kin lo, Ibiri ke kyahagwu lo. 19 Oji wi iyitagye kaha, ala lalo? Ala pini wo otunehe kaha la, ala pini yaha ba gwakya maha ba rogwa obutu ka Adole Oyesu eno ko wowa nu la. 20 Kokwokwoshi ala pini yaha ba gwakya kyi ba shotunehe la.