1 Ogwejeji, agege ko zotu kelo, akwikye ga bagye fufukaha ogya ka Atenas 2 Otimoti ni wo oyene kaha ni aba yoko ko Owuso dudu ko koshu neshi ko Okristi ni, atoleho shini na dala oshu naki talotugbagba ipu ko otuse kala, 3 shini owe mani na ka ya ashishe na kwikye itikpi lo. Ala abiyikala gye neneshi mo owe naha bama mani woyoya ko Owuso la. 4 Koni ishini aha tayoyo baba kpa ala ni, akwobonu ka dala mo aba wa daha egye. Oke wa gbodagye mani, byoni ala gye ni. 5 Ni olemani oni, nggege ko zotu ke lo, nto Otimoti oleho shini na gyo hagye loshu ko otuse kala. Nyya yoshi mo Ibiri wa gyalegya kweyi yoko kaha woyeye wa! 6 Ishini Otimoti ke kwikye bwebe kala wa ni, owa daha oshu neshi ikweyi ko otuse kpi imu kala. Oki ka daha mo ala ba rela kaha kpo oneshi kurutu, ki gbimu ko maha byoni aha gbimu ko mala ni. 7 Ni olemani oni, ayene ipu ko owe kaha kpe egye kaha apyoshu ipu kotu kaha ikweyi ko otuse kala. 8 Koni anani agye mo aba shala bita, ikweyi koni ala hagye loshu ipu ka Adole. 9 Anani aba shotunehe do Owuso ikweyi kala. Aba shotunehe ko otushosha ni agbo obutu ko Owuso ikweyi kala ni. 10 Kotu ke eno aba tinarigwu da Adole ko ki gyiyi kpa ala shan dala oza ni ala ba doka ipu ko otuse. 11 Owuso Ada kaha abiyinu kpa Adole Oyesu na kyowe tu daha ko we ebe kala. 12 Adole na yala shini ala gohobu ko yimu kiyi kala kotata kweyi kyi yimu ka ananoho, byoni aha ba gohobu ko yimu kala ni. 13 Ona talotugbagba shini ala ka gbepwo lo kyi wase sere obutu ko Owuso Ada kaha ishini Adole kaha Oyesu wa kpase sere nu kpiri.