1 Ogwejeji, ayene ka, byoni aha fala ni, oyagye kala na sho Owuso otu, byoni ala kwobonu ba ya ni. Anani aba kadala, aki ba tala otugbagba ipu ka Adole Oyesu mo ala takirikwu shini ala ki ya she mani. 2 Koni ala gyo oza ni aha fala bwebe ko oshu ka Adole Oyesu ni.

3 Oza ni Owuso ya yimu ebe kala ni wo, ala wase sere kweyi ala ngmi iyikala she ebaboba. 4 Ananoho kala na kwiyinu ipu ko sere shini ase na mala gyiyi, 5 ala ka showu keba byoza ni Awase ni gyo Owuso lo baya ni lo. 6 Ikweyi kela mani, ashishe na ka yo oyinanu ozalabi kwe ona mowu nu lo. Byoni akwobonu ka dala ni kyi pyala akpaha ni, Adole ya gbawino yoza mani ogo agye. 7 Owuso yaha ogwu ko beba lalo, ke wa ko yawu ipu ko sere la.

8 Ni olemani oni, ase ni tela ko ozafofu mani, otela kasuse lalo, oke tela ko Owuso ni da aha Omaku nu sere ni la.

9 Ela kimu ka ayene ashu ko ta dala kelo ikweyi koni Owuso abiyinu fala owe ko yimu kiyikala. 10 Kokwokwoshi ala ba yimu ka ayene kpiri ni bo okpagye ko Omakidoniya ni. Aba tala otugbagba ayene sha ala gohobu ko ya mani.

11 Ala takirikwu sha ala bagye ko mene, ala yiyi kwo oza ni yo ohobu kala kin, kweyi yo oko kpa abo kala, byoni akwobonu ka dala ni, 12 bwebe koni awase ni gyo Owuso lo ni ba mala gyiyi, kweyi ala ba yotu sa ashishe ko pyoza ni ala ba yimu ni lo.

13 Ayene, aba yimu sha ala gyo kwokwoshi ikweyi kawase ni gbola ni, shini ala ka byotu byawase ni gbotuse lo ni. 14 Akyogwu mo Oyesu gekwu okyi nyiso akyi kyogwu mo bwebe ko Oyesu, Owuso ya shawa ase ni gbola mani iyi dudu kpo Oyesu. 15 Byoni Adole kani, aba ka dala mo, aha ni tayoyo biyi, ni shishini gbeno ko owowa ka Adole ni, aba kwobonu dawa ase ni gbola ni ko ga lo kpiri-kpiri. 16 Koni Adole abiyinu ya sa bwi iso, ya zoko loshu loshu, kpo oko nyaku ko oyoleho, kpa ajigwo ko Owuso, awase ni gekwu ipu ko Okristi ni ba nyiso ikyikyo. 17 Itikpi koni, aha ni biyi ni, aba kpaha gbayi kpawa dudu ipu ka akpa, shini agbayi kpa Adole ipu ki iso. Aba bagye kpanu ko gbogbo-gbogbo.

18 Mani oni ala tiyi kala otugbagba kpe ela mani.