1 Awo oyi hin, loshu bwebe keshi ni wakaka ipu kema kaha kpo Okristi Oyesu ni. 2 Zoza fofu ni omun ya fu iyi ka awolobene nwashika ni, gayi nabo dawase ni ba yo otusuwa, ni ba gege ko fase ashini oza mamani.

3 Zotu kpowe moma wo byoni owadakare neshi ko Okristi Oyesu ni. 4 Adakare ni yo ogo kefu ni ya yimu ko yoza ni shadole nu otu ni, mani oni oya byiyinu gipu koko kase ashini lo. 5 Mamani, ino myenya ni ya nyinya, oya gege ya rogwa lo owoni oyoko kpono kawo omyenya lalo. 6 Osheho ni gbotu ko yoko ona wa kikyikyo ko hizire keho nu. 7 Rela koza ni nyya ka mani, ikweyi koni Adole ya yo ya gyikweyi nu kpiri.

8 Rela ko Oyesu Okristi, ni nyiso bwikwu ni, obwipwoma ko Odawuda, byoni nfu ipu ko Oshu Neshi ni ntono ni. 9 Ikweyi koni ntono ko Oshu Neshi ni, nmowe gbishini ashuma ashirika byo owi. Ake shela ko Owuso ashirika lo, 10 mani oni nzotu kpojoji ela kawase ni Owuso shu ni, shini awa na ki pyolayi ipu ko Okristi Oyesu kweyi byigyashi nu kogbogbo-gbogbo.

11 Ela mani wo kwokwoshi:

<<Owoni aha gekwu kpanu,

aha ki ba gbo olayi kpanu.

12 Owoni aha gohobu ko zotu,

aha ki ba wa rose kpanu.

Owoni aha tawashu nu,

anu ya tawashu ikweyi kaha mamani;

13 Owoni aha gbo okwokwoshi lo,

anu wine kokwokwoshi,

ikweyi koni Okristi ya gege ya tawashu kiyinu lo.>>

14 Rawase wo awoza mani, pyuwakpaha kotata obutu ko Owuso shini ana ka tawashu ko okwunu lo. Oni ya byoneshi oyoye yawa lo, oke ya yawase ni ba pwo ni yishi kin la. 15 Takirikwu shini opyabokpa obutu ko Owuso; byino yoko ni ya yiweyi koko nu lo, ni ya fase ela kokwokwoshi gyogye ni. 16 Ka rema kawo kela sususu lo, edo kela mani ya yase ko kpo Owuso. 17 Koni oza fofu wa ya lema bya akrigya ni ya homu ki ikpiye ni la. Ipu wa asepa ni ba foza mani wo Ohimenayus kpo Ofiletus. 18 Ashowe kokwokwoshi bita kweyi ba yo otuse kase ashini yishi baka mo onyiso kawase ni gekwu ni kwobonu gbodagye wa. 19 Omani ke yotu ko oda ni Owuso ma ni ojije lo; ikweyi nu ata mo, <<Adole gya awase ni wa akakanu ni>> kweyi <<Kpiri kase ni manu wa ka Adole ona sho ozalabi ko yoya bita.>>

20 Ipu kole nyakwu ogo kpo owatu nwashika banu: ashishi aya kpo azurupa ashini kpo ozinariya, ashini agbogba kpe efu, ashini ama kpo ome; ashini wa ko oko neshi, ashini wa ko oko neshi lo. 21 Ase ni yi iyinu na neshi shoza bibi, aba yoko kpa anu ko oko neshi, ikweyi koni owiyinu shu da adole nu, ya gbeyi ko yoko neshi wonyonya.

22 Nyinya shi imoza ni ya mayileke ma ni, kweyi tikpo ko wase neshi, ko gbotuse, ko yimu kase, kweyi yagye ko omene, kpa awase ni ba shogwu ya Adole kpo otu oye ni. 23 Ishini awikyo ba tawashu ikweyi koza ni gbo oko ko ojije lo ni, ka gipu wa lo, ikweyi koni ogye mo oya byapwo wa. 24 Oyole ka Adole naka wino gbapwo lo, ona ke gbo otumene kpa nanoho, na gishi ko fase oza, ona zotu, 25 awase ni ba tawashu kpanu ni ona kyawatu ipu koko mene, kwe Owuso ya dawa ishi ko shagbotu, shini ana gyo kwokwoshi. 26 Shini ana kwikye wiyiwa shini ana bose she eda ki biri, ni oyuwa shetu koyoza ni oya yimu ni.