1 Obutu ko Owuso kpo Okristi Oyesu, ase ni ya kepwo ka awino olayi kpa awase ni gekwu, kweyi oya wa kwikye wa kpogwu ko Ose, nyya ka dala, 2 ala ba gege ko tono kela, (kwi ishi gye kwo ogye lo,) ala kpuwokwunu, ala gbuwapwo kweyi tuwotugbabga byoni ala ba fuwoza kpo otumene ni. 3 Ikweyi koni ishi yawa ba ni ase ba tela koza fofu ko kwokwoshi, kweyi ake ba gboso oza ni otu wa ya yimu ni, aba wa tikpo kawo foza nwashika ko fuwoza ni akpaha wa ya woshosho ko pwo ni. 4 Aba pyitikpi tela kokwokwoshi kweyi pya akpaha wa ge ebe kawo gbigwu ko kame dawa. 5 Awo ke gbera kpoza kpiri ni oya ya ni ipu kojoji; zotu kpowe moma, yoko kino tono ko Oshu Neshi, kweyi yoko wo kpiri byo oyole ko Owuso.

6 Ami ke ishi kwobonu gye wa ni aba yun peshi; ishi yawa koni nyya she ese mani bita ni. 7 Nkwobonu nonu neshi wa, nyye enya nye kweyi wa, kweyi nbyo otuse hin pya. 8 Anani abola kase neshi ko Owuso pini ya gbeyi hin la, ni Adole ini kimu, Ino kepwo neshi ya dami Eno ni, ami fufun lalo, kpase kpiri ni ba gbeyi ko bose nu ni.

9 Takirikwu shini owebe hin papa. 10 Odemas shawu kimu kese mani opyitikpi tun, kweyi ganu go Otesalonika. Okreses go Ogalatiya, Otitus go Odalmatiya. 11 Oluka fufunu pini yo kpami la. Yo Omarkus na wa kpawo, shini ona wa tumabo kpoko. 12 Nto Otukyikwus oleho go Efesu. 13 Ishini oya wa, byo oshiye hin ni nshibita ebe ko Okarpus ogya ko Otrowas ni wa, ki bya awokpa hin wa dami, ka nwanyi ako okpa kobize oni lo.

14 Alekzanda ni wo onowa ni yumo ofo nwashika; Adole ya so ore gyogye kpo oza ni oya ni. 15 Ala gbera kpanu, ikweyi koni ohagye giri yata so ozafofu ka eyi.

16 Ishini nnyepwo kikyikyo ni, ashishe gwagye tumotu lo; kpiri wa shunbita. Owuso naka kwuwepwo ikweyi nu lo! 17 Adole Owuso ke hagye kpami kweyi dami oshu, mani oni ntono kela nu dawase ni wase ko Oyahuda lo ni kweyi apwo; ongmami sho okwunu ka abaga. 18 Adole ngmami shipu ki ibiri kweyi byun gipu ko Obula nu kiso. Igyashi wakakanu ko gbogbo-gbogbo! Nalemani.

19 To Oprisila kpa Akwila ogbogba dami kpase kole ko Onesiforus. 20 Erastus hagye Okorentus, nsho Otrofimus bita Omiletus, ikweyi koni oya gbere ni. 21 Takirikwu shini owa ome owu na bose.

Ewubulus, kpo Opudens, kpo Olinus, kpo Oklawudiya kpa ashini ka ayene kpiri ba talogbogba.

22 Adole na yo kpo omaku kala.

Eshi ko Owuso na yo kpala kpiri.