1 Enena mani bwebe ko Obulus, oshe ko Owuso ni wo oyikoko ko Oyesu Okristi.

Owuso shun kweyi tumo oleho shini naga ta awase ni Owuso shuwa bwebe ko otuse ni otugbagba shini na tuwabo ana gyo okwokwoshi ko oza ni afu ni bwebe ko geyagye ka, 2 ni kwutiriri bwebe ki iyitagye ko olayi ko gbogbo-gbogbo. Owuso ya kokame lo, osayi okoyi ko olayi mani ome oyese, 3 nishi gye ni osayi dami bwipu koleho nu. Oleho mani ota dami, kweyi ntono bwebe ko oshu ko Owuso ni wine ko ngmaha ni.

4 Otitus, ntokpa mani do, oyi hin ko tata ipu ko otuse ni agbo woye kponu ni.

Owuso Ada kpo Okristi Oyesu ino ngmaha na dawo Oneshi kpo omene.

5 Oza ni yani nshuwo ta Okrete ni, shini oya ashini koza ni oshu ko yoya ni kweyi osha awanyakwase ko oda ko Owuso bwo ogya ogya. Byoni nka dawo ni: 6 Anyakwase naka gbepwo kojije lo; ona wine ko onya oye kponu, ayi nu na kyogwu kpo Owuso, ana ka yoza bibi kwe ba zakpaha lo. 7 Ikweyi koni anyakwase ko oda ko Owuso woteyi ko oko ko Owuso la, oshu ko wine ko gbepwo bibi lo. Naka wine ko zikweyi iso lo, kwe ine ko ya nya papa lo, kwe ine ko yinyi, kwe ine ko tikpo ka apwo, kwe ino ko yimu ki ikwiri lo. 8 Ona wine ko byogboga kweyi yimu koza neshi. Ona wase ni ya gbiyi nu, ona wase ni ya yoza tiriri, ona wase ni ya geyagye do Owuso, ona ka wase ni ya yoza waya lo. 9 Oteyi na wa ase ni ya byela koleho ko Owuso ko kwokwoshi byoni aba fu ni, shini na tashishini otugbagba bwebe ko ono totu kpo oza fofu ko tata, na yotu kawase ni ba yimu koza fofu mani lo yi tese.

10 Agba awase ni gebi owe ni nwashika, awase ni bwi ikpo ka awo Yahuda ni ba gyasegya kpo ozafofu wa shishi. 11 Owotiri ko yuwa nasha, koni aba yotu ki ipwoma nwashika ya bya bwebe koza fofu ni ashu kofu lo ni, kweyi kpiri wi ikweyi koza ki iweyi kweyi kpiri ko oza ki iweyi mani wo ikweyi koni aba yimu ko gbi ikwiri la. 12 Ashe ipu kawo bane ni bwo Okretes ni kamo, <<Ase ko Okretes wa awino kokame la, ale byo obekwu, awo okwashi, ba yela kifu kin.>> 13 Ela nu wokwokwoshi la. Mani oni, gbuwapwo kotata, shini ana hagye loshu ipu kotuse wa 14 shini anaka zakpaha do ono kase ko Oyahuda kwe ela kawase ni ba tela ko okwokwoshi ni lo. 15 Ojoji shoshi ebe kase ni shoshi ni; ebe kawase ni yishi kweyi kyogwu lo, ojije shoshi lo, ikweyi koni otu wa kpo oza ni yipu kotu wa ni kwobonu yishi wa. 16 Amawa gyo Owuso, ake tawashu nu bwebe koza yoya wa. Awoza ko obwa aba geyagye lo, aba gege ko yoza neshi oyoye lo.