1 Ra ase kala shini ana geyagye da awose kpa awoteyi, ana geyagye dawa, ana wiyiwa shu ko yoza neshi owe wonyonya. 2 Ke kada wa mo ana ka kela bibi ikweyi kashe lo, ana bagye ko omene kpo yimu ka ananoho, kweyi ana sayi da ananoho mawa ba zikweyi iso kpa ashishe lo. 3 Ikweyi koni ishi oye aha abiyika wikyo, aba zakpaha kpo yoza bibi. Awo oshe ki imu ko oza kpo yimu ko monye ki ikpiye. Abagye ka wa awino yanya kpa afu kase; ase ba tela kaha, aha ba tela wa mamani. 4 Ishini iyinyinyi kpi imu ko Owuso ino ngmaha ke wa, 5 ongmaha. Owi ikweyi koza neshi naha ya ni la lo, ke wi ikweyi ki iyinyinyi nu pini ongmaha la, bwebe ko Omaku ko Owuso, ni yozalabi kaha na kweyi kyaha ma kpo olayi pepe ni. 6 Owuso shaha Omaku nu kpotu oye kponu bwebe ko Oyesu Okristi ino ngmaha, 7 shini bwebe keshi nu ahan wase neshi ebe ko Owuso, shini ahan rogwu kiyitagye ko pyo olayi ko gbogbo-gbogbo. 8 Omani wela ko kwokwoshi la.

Nyya yimu sho kyela mani ka neneshi, shini awase ni kyogwu kpo Owuso na gbera kweyi zishi wa hagye ko yoza neshi, oza neshi ni gbo oko da ananoho. 9 Ala ke sha awashu yeye bita, ko tikwu ki iye ka awokyikyi kala, kpa apwo gbogbo, kpo onu nonu ikweyi ko Ono. Agbo oko lo, awo yeye la. 10 Awase ni ba yimu ko yikweyi kase ko, owoni opyuwa akpaha kikyikyo, ki pyuwa akpaha ko omwepa, ka yojije kpa awa kelo. 11 Ala gye mo edo kawase lemani kwobonu yishi, ozalabi wa kwobonu kwuwe epwo wa.

12 Ishini nto Artimas kwe Otukyikwus oleho ebe wo, takirikwu sho webe hin Onikapolis, ikweyi koni ngbimu ko ngmishi ko owu ebe ni. 13 Nyya yimu sho to Ozenas ino kepwo kpa Apolos abo shini ana kwowe. Ka yojije na nyuwa lo. 14 Owotiri sha ase ka na zishi wa ba yoko neshi shini ana tikpo koza ni ya tuwabo ni, ana ka bagye yeye lo. 15 Ase kpiri ni bagye kpami ni ba tala ogbogba. Ta ayene ka ni bipu ko otuse ni ogbogba daha.

Eshi ko Owuso na yo kpa ala kpiri.