1 Oke wotiri shini ala foza ni ga gyogye kpo ozafofu neshi. 2 Ala fa ango sawukye shini ana kwiyiwa, ana gyoza ni aba ya ni, ana hagye loshu ipu ko kwokwoshi kpi imu kweyi ana zotu. 3 Mamani, ala fa anya sawukye ana yoza byoni anya ni ba ko Owuso ba ya ni. Ana ka wa awine ko yase ishi lo, ana ka wa awo gwinyi shoshu lo. Ana ke fase oza neshi, 4 shini ana fa awisonya oza ko yimu ka awobu wa kpa ayi wa ni, 5 shini ana kwiyiwa ikweyi koza yoya kpela ni aba ka ni, ana bagye neshi ole wa kpo oko yoya kweyi ana geyagye do obuwa, shini ashishe naka kela bibi ikweyi koleho ni wa bwebe ko Owuso ni lo.

6 Mamani ala ta awisongo otugbagba shini ana kwiyiwa ipu kela kpo oza yoya wa. 7 Ipu ko ojoji, wase ni aba gboza yoya neshi wo ni. Ipu koza fofu wo, fu kpo okwokwoshi kpo otu oye kponu. 8 Ko okwokwoshi ni ashishe ya gege ya tawashu lo ni, shini iweyi na kwa awomonyekwotu wo, ana ka gbo ojije labi koka ikweyi kaha lo.

9 Fa awoshe oza shini ana geyagye da awadole wa, ana yotu wa nasha ipu ko ojoji. Ana ka nya awadole wa okwunu lo, 10 kweyi ana ka wuwiyi lo. Ana yoza ni ase ba gye mo awase neshi ni gbo okwokwoshi ni, shini oza fofu ikweyi ko Owuso ino ngmaha na woza ni kimu dase.

11 Ikweyi koni eshi ko Owuso ni ya ngma ase ni bose dase kpiri wa. 12 Eshi oni ya faha ko kamo <<Aayi>> de edo koza bibi wonyonya kpo oza ni wa ko Owuso lo ni. Shini an gege ko kwiyi ka, an wase ni ba yoza gyogye ni, kweyi yoza ni sho Owuso otu ipu kese ni atayoyo banu mani, 13 byoni aha ba gbeyi ke Eno neshi ni aha yi iyitagye ni, ni igyashi ko Owuso kaha ine koshu kpiri kpi ino ngmaha Oyesu Okristi ya bose ni. 14 Anu ni gekwu ikweyi kaha ni, ko ngmaha sho owe koza bibi shini an wase neshi kweyi ba showu ko yoza ni shoshi ni.

15 Fa awoza mani kweyi yoko kpo oshu wo ishini oya tase otugbagba kweyi ya gbuwapwo. Ka ya ashishe na mo nye lo.