1 Okpa mani bwebe hin Obulus oyikoko ko Okristi Oyesu ni Owuso shun ko ka dawo ikweyi ko olayi ko okoyi ni agbo ebe kema kaha kpo Okristi Oyesu ni.

2 Gebe ko oyi hin moshi, Otimoti:

Owuso Ada kpo Okristi Oyesu Adole kaha na dawo oneshi nu, kpi iyinyinyi, kpo omene.

3 Nshotunehe do Owuso, ni nyya yoko danu kpotu hin oye ni, byoni awokyikyi hin ya ni. Nshotunehe danu ishi kpiri ni nyya rela wo ipu kinarigwu hin ke eno kotu. 4 Nrela kegba ni okye ni kweyi nyya yimu komo, shini otu hin na sha. 5 Nrela kotuse kokwokwoshi ni ogbo ni, edo kotuse ni obo wo ko Oloyis kpe ene wo ko Oyunisi gbo ni. Ngye mo ogbe edo kotuse oni. 6 Ni olemani, nyya rawo mo yabo byeshi ni Owuso dawo ishini nyya abo hin so ni. 7 Koni Owuso daha Omaku ko yoshi la lo. Omaku nu ke ya daha oshu, kpimu kpo kwiyi ka.

8 Ka yiweyi ko yolobene ka Adole ka, kwe ami ni ayun shetu ikweyi ko Okristi ni lo. Nke ya kamo gipu ko owe moma kpami ikweyi ko koshu neshi, ni Owuso dawo oshu ikweyi nu ni. 9 Ongmaha kweyi yahogwu shini an wa ase nu, wela koza ni aha ya ni la lo, ke wela ko gbogbo kotu nu kpo oneshi nu. Odaha eshi mani bwebe ko Okristi Oyesu ome ona yese, 10 Owuso ke sayi daha bwebe kowowa kino ngmaha, Okristi Oyesu. Oyoshu kikwu kyigbo kweyi bwebe koshu neshi odaha olayi ko gbogbo-gbogbo.

11 Owuso shun woyikoko ko Oyesu kpi inofoza ko tono koshu neshi, 12 ikweyi koni pini nyya mowe mani la. Ami ke ikpiye hin ya loshu, ikweyi koni ngyase ni nyyo otuso ni, kweyi ngye mo oya gege ko gbeho koza ni oyi dami abo ni gbe Eno oni.

13 Byela ko kwokwoshi ni nfo ni pya, na woza ni oya doye ni, kweyi hagye loshu ipu kotuse kpimu yoya ni wakaka ipu ko Okristi Oyesu ni. 14 Bwebe ko oshu ko Omaku ko Owuso ni yo kpaha ni, gohobu ko yoza neshi ni ayi dawo abo ni.

15 Ogye kamo ananoho ipu kokpagye ka Asiya shun bita, ko Ofigelus, ko Ohamogenes.

16 Adole na miyinyinyi kipwoma ko Onesiforus, ikweyi koni otumotugbagba ishi nwashika. Oyiweyi ikweyi koni nyyo oruduru ni lo, 17 ni oke sa okpagye ko Oroma ni, okwotu ko tikpo hin gbishini owa yun pye. 18 Adole na miyinyinyi nu Eno oni! Awo gyedo ko oza ni oya dami neneshi ishi ni nyye Efesu ni.