1 Kpiri kala ni wo oshe ni, owotiri shini ala geyagye dawa adole kala shini ashishe naka kela labi ikweyi kiye ko Owuso kpo ozafofu ka lo. 2 Awoshe ni adole wa wa awogboso Oyesu ni naka tuwanye lo, koni awawogboso Oyesu mamani la. Abishi koni ana yoza ni shoko wa ni dawa, ikweyi koni aseni ba monye koko wa ni wa awogboso Oyesu ni aba yimu ni la.

Ozani oya fase ki ya tono dawa ni yoma. 3 Kpiri kase ni foje gogo kweyi tela kokwokwoshi ka Adole ka Oyesu Okristi kpo ozafofu ko geyagye do Owuso ka, 4 anoni ya miyinu byo oshase kpiri kweyi ogyojije lo. Oya yela kawashu tota kpa apwo gbogbo kpotu bibi. Omani ya yase ba yanya kiyiwa, ba gbapwo, ba sesa, ba mase kpiyi bibi, 5 kweyi ya tawashu ishi kpiri kpa awase ni gbotu labi ni kweyi gbo okwokwoshi ipu kotu wa kelo. Aba ma byo owoni atono kela ko Owuso aba gbodu.

6 Ela ko Owuso ke ya yase ya gbodu, owoni omoza ni ogbo ni gyo. 7 Abyo ojije wipu kese mani lo, ake ba bose bwe ese mani kpo ojije lo! 8 Ni olemani oni, owoni agbo ozarore kpo oshiye, oni gbayi aha. 9 Awase ni ke ba yimu ko wolodu ni, aba gbo gipu komama kweyi eda kimoza kikyo kpimoza ni ya yase ofo ni ya yuwa kwu. Eda mani ya byuwa gikwu. 10 Koni imu kikwiri pini wotu kedo koza bibi kpiri la. Ase ashini ba gbimu kikwiri shoshu kweyi ashowe kotuse wa bita kweyi agipu kotu byobya.

11 Awo ase ko Owuso ke, pya shoza mani kpiri. Takirikwu shini owase neshi, yela ko Owuso, gbotuse, yimu kase, zotu kweyi gbo otumene. 12 Nonu kotata ipu kotuse shini opyo olayi ko gbogbo-gbogbo; koni ikweyi kolayi mani pini Owuso yogwu shini okela kotuse wo obutu kawolobene nwashika la. 13 Nyya ka dawo obutu ko Owuso ni ya dojoji olayi ni, kpo obutu ko Okristi Oyesu ni yolobene kotuse nu obutu ko Opontiyo Obilatus ni mo 14 geyagye dawono mani kweyi gbosuwa neshi gbeyi ke eno ni Adole kaha Oyesu Okristi ya bose ni. 15 Obose nu ya wa ipu kishi neshi ko Owuso, ine ka abokpa, Oteyi ko ojoji, Ose ka awose kpa Adole ka awadole. 16 Anu fufunu ni ya gekwu lo ni, oyipu ko oyoyu ni ashishe ya shabo lo ni. Ashishe mo wa lo, ashishe ke ya gege ko mo lo. Abokpa kpo oshu kpiri wakakanu ko gbogbo-gbogbo! Nalemani.

17 Ka da awolodu kese mani mana ka zikweyi iso lo, kweyi ana ka yotu wa so odu wa ni ya wa kweyi ni lo, ake na yotu wa so Owuso, ni daha ojoji ni aba doka shan monye. 18 Ka dawa mana yoza neshi, ana wo olodu ipu ko yoza neshi, ana dase oza kpotu oye kponu, kweyi ana gbimu ko koza ni agbo ni kpase ashini. 19 Bwebe koni aba kpo odu tukpa diyiwa ni ya wotu ko olayi wa ohobu ni. Ebeni aba pyo olayi ni wo olayi kokwokwoshi ni.

20 Awo Otimoti, gbeho koza ni Owuso yi dawo abo ni. Ka pwela sususu kpa awashu kikyo ni ase ashini ba mo owo <<Ozagyogye,>> ni lo. 21 Ase ashini ba ma bya aziyi, oza ni ya ni agebi owe kotuse ni oma.

Nyya beshi ko Owuso na yo kpala kpiri.