1 Enena mani bwebe hin Obulus, oyikoko ko Okristi Oyesu ni ta kpo oshu ko Owuso inongmaha kpo Okristi Oyesu iyitagye ka,

2 Gebe ko Otimoti, oyi hin ko kwokwoshi ipu kotuse:

Owuso Ada kpo Okristi Oyesu Adole ka na dala oneshi kpi iyinyinyi kpo mene.

3 Ishini nshala bita gokpagye ko Omakidoniya ni, ndala oshu shini ala bagye Efesu. Nyyimu shala bagye ebeni shini ala kada awofoza kokame ana sho ozafofu kokame bita. 4 Oya wotiri shini ala ka dawa ase mani mo, anaka ngmishi wa ko gbigwu kokame kpi igwu kipwoma ni gbokweyi lo ni bita. Igwu mani ya yase ba tawashu kpi iyiwa. Edo ka awashu mani ya tashishe abo ko yoko koshu neshi ko Owuso lo. Oke bwebe kotuse ipu ko Okristi pini ase bagyo oza ni Owuso gbo ko ngmawa ni la. 5 Oza ni yun kela mani dala ni wikweyi ki imu ni bwotu neshi kpo otu oye kponu kpo otuse ko okwokwoshi. 6 Kweyi ashini kase pyitikpi toza fofu mani agebi owe ikweyi kela yeye wa. 7 Aba yimu kowa awofono ko Owuso, ake gyoza ni aba kani, kpo oza ni ahagye giri ikweyi nu ni lo.

8 Aha gye mo ono shoshi owoni akanu gyogye. 9 Aha gye mo akwono ikweyi kase neshi lalo, ke wikweyi kase ni ba yo ono kyigbo ni, kpa awo yoza bibi, kpa awase ni gyo Owuso lo ni, kpa awo yo zalabi, kpa awase ni ba ko owe ko Owuso lo ni kwe awase ni gbo Omaku ko Owuso lo ni, kpa awase ni ba ngma adawa kpi inawa ni, kpa awo ngmase, 10 awobeba, kpa ango ko kya kpiyiwa, awokwase ra, awokokame kweyi koshu kokame ni gogo kpo oza fofu kokwokwoshi ni. 11 Ozafofu mani wokwokwoshi ipu koshu neshi ni Owuso dami ko ka dase, Oshu Neshi mani bwebe ko Owuso ni gbigyashi kpa aboneshi ni.

12 Nshotunehe do Okristi Oyesu Adole ka, ni dami oshu ko yoko ni, omun wine kotuse, ki shun ko yoko danu ni. 13 Koni ishini shuga ni nkela bibi ikweyi nu, ndase nu egye, nsesa. Owuso ke miyinyinyi hin ishini ngbotuse lo ni, ngyoza ni nyya ya ni lo. 14 Adole yumo oneshi nwashika, odami otuse kpi imu ni wakaha ipu kema kpo Okristi Oyesu ni. 15 Omani wela ko kwokwoshi ni ananoho shu ko nye kweyi kyogwu kpanu ni: Okristi Oyesu wipu kese ko ngma awine kozalabi, akaka hin pini labi she la. 16 Koni ozalabi hin shaka ananoho ni, Owuso ke miyinyinyi hin, shini bwebe hin Okristi Oyesu na sayi ko otumene nu ikweyi kawase kpiri ni bawa kyogwu kpanu itikpi hin ni shana pyo olayi ko gbogbo-gbogbo. 17 Abokpa kpi igyashi wa ko Ose ni yaba ko gbogbo ni, ni ya gekwu lo ni, ni aba mo lo ni, Owuso oye kpokponu, ko gbogbo-gbogbo! Nalemani.

18 Oyi hin ko Otimoti, nyya dawo ela byoni abane ikweyi wo ni. Yoko kpa awela mani byiyo kefu shini okpefu neshi, 19 kweyi byo otuse wo kpo otu oye kponu. Ashini kase tela ko zela neshi mani kweyi ayo otuse wa tonu. 20 Ohiminayu kpa Alekzanda bipu wa, ngbuwogo agye bwebe ko yuwa nabo di ibiri; omani ya fuwa ko shela karigbetu bita.