1 Mani oni, ikyikyo nyya ka dala mala tinarigwu da ananoho. Ala bo Owuso na tuwa abo kweyi suwabo neshi kpiri, kweyi keshi ko Owuso ikweyi ka ananoho; 2 awo ose kpiri kpa awase ni gboshu ikweyi wa, shini ahan bagye koneshi kpo omene kweyi ahan geyagye do Owuso kweyi ahan yoza ni oya yimu mo ahan ya ni. 3 Omani woza neshi ni sho Owuso Inongmaha otu ni, 4 oya yimu shini ana ngmase kpiri shini ana gyo kwokwoshi. 5 Owuso wo oye la, kweyi ashe hagye otutehe ko Owuso kpa asuse ipu ko omene. Anu oni pini wo Okristi Oyesu, 6 anu ke yi iyinu keyi kweyi gekwu okwunu kasuse kpiri. Oni sayi mishi gye wa ni Owuso ya ngma asuse kpiri ni, 7 oza ni ya ni Owuso shun woyikoko ko Oyesu kpi inofoza kawase ni wo Oyahuda lo ni oma, ko tono koshu kotuse kpo okwokwoshi. Nyya kokame lo, nyya ko okwokwoshi la!

8 Nyya yimu shini ango kpiri ebebenya na zabo wa sere iso ipu kinarigwu, gbanya kyokye kwawashu tota lo.

9 Nkyi ya yimu shini anya na sho oshiye wa gyogye, ana gwagya neshi, wako teyi kyarigada, kwo ozinariya, kwe ekye, kwiyo ni gbakwekye ni lalo, 10 ake na yoko neshi, ni shoshi kpanya ni gyo Owuso ni.

11 Ebe koza fofu, anya na sha, kweyi ana geyagye kpiri-kpiri. 12 Ndanya oshu ko fango oza kwe gboshu ikweyi kango lo; ana sha. 13 Adomu pini Owuso ya ikyikyo la, ome owa ya Awawu. 14 Kweyi Adomu pini ibiri gyegya lalo, onya pini ibiri gyegya yo yozalabi la. 15 Owuso ke ya ngmo onya ebe koyi moma, owoni ozotu ipu kotuse, ipu kimu yoya, ipu ko yela ko Owuso, kpo kwiyinu.