1 Kagba anyakwase apwolo, ke geyagye danu byo owa ada wo ni. Byi isongo kpiri bya ayene wo, 2 ma anyasawukye bye ene wo ni. Kweyi ma awisonya bya ayina wo kpotu oye kponu.

3 Bya anyokwu ni gbashishe ko tuwabo lo ni. 4 Owoni onyokwu ke gbayi kwe ayikayi, ana fi ipwoma wa ela ko Owuso shini ana byina wa kpa ada wa, obo wa kpo osokwu wa neshi, bwebe koni aba suwore koni abyuwa gye ni, oza ni ya sho Owuso otu ni oma. 5 Onyokwu ni gbashishe ko yiyi kwo lo, oyotu nu so Owuso kweyi ya tinarigwu ke eno kotu sho Owuso na tabo. 6 Onyokwu ni ke ya yela ko monye kese mani, okwobo nu gekwu koni oyiyi ni. 7 Ala fuwoza mani shini ashishe na ka kwuwepwo lo. 8 Ase ni ke ya tikpo koza dase kema nu lo, otata wipwoma nu, ogbo otuse lo kweyi labi shase ni gyo Owuso lo ni.

9 Onyokwu ni gashayi awihiri lo, ala ka yo togwu kanyokwu lo. Omwepa nu, ona wase ni loba oye kponu ni 10 kweyi ona wase ni gbiye neshi ni: onya ni byayi nu neshi kweyi ya zogboga ole nu, ona yoko dawo ko Owuso gbo zikweyi iso lo, ona tawase ni ba mowe ni abo, kweyi ona ziyinu doko neshi ishi kpiri.

11 Ala ke ka tiye ka anyokwu ni tayayo wisonya ni ipu wa lo, owoni ikpiye shuwabita lo aba wa gboba, kweyi pyitikpi to Okristi, 12 bwebe koni ase ba kwuwepwo koni ayokoyi ni ashe bwikyikyo ni yi kyigbo. 13 Aki ba wa ngmishi wa ba bwole bwole, ba yo byiga byiwa kpo lokwunu agye, ba koza ni ashu ko ka lo ni. 14 Mani oni nyya ta anyokwu ni tayayo wisonya ni oko mana gboba, ana mayi, kweyi na yiyi kwole wa, shini awomonyekwotu kaha naka pyowe ko yahishi lo. 15 Koni anyokwu shishini kwobonu nyowe neshi kweyi ba gbosi Ibiri.

16 Owoni onya oye ipu kawo gboso Oyesu ke gbanyokwu ole nu, ona yiyi kwuwa, naka yenu oni soda ko Owuso lo, shini oda ko Owuso na yiyi kwa anyokwu ni gbase ko tuwabo lo ni.

17 Anyakwase ni yoko wa koteyi neshi ana muwa gyiyi kweyi ana suwore neshi, otata wawase ni hagye giri ipu ko ono totu kpo ozafofu ni. 18 Koni Okpa ko Owuso kamo, <<Ka yena okwunu gbo ishini oya gwizire ni lo,>> oki kamo, <<Aseni yoko ana sore.>> 19 Ala ka zakpaha dase ni ya ya anyakwase ishi ni lo, owoni opwo okwunu ko olobene epa kwe eta lalo. 20 Gbawino yo ozalabi apwo iyi kananoho, shini ashini wa na yoshi.

21 Nyya shogwu yo obutu ko Owuso kpo Okristi Oyesu kpa ayoleho ko Owuso mo geyagye dela mani, ka yimu kashe shashe lo ipu kojoji noya yaya.

22 Ka ya papa ko sase abo lo. Ka gipu ko ozalabi kpase ashini lo. Yagye wo neshi.

23 Ka gwinyo kin lo, gwinyi gbayayi ela kipu wo, koni oyipu ko gbere ni.

24 Ozalabi kase ashini tesese, kweyi kwobonu dawa gebe kepwo koka, ase ashini ke ozalabi wa ya duwaye itikpi. 25 Mamani, aba mo oko neshi ese kyaa, kolamu ni bose neshi lo ni ya gege ya teba lo.