1 Omani wela kokwokwoshi la, ase ni gbimu ko woteyi ipu koda ko Owuso, ogbimu koko neneshi. 2 Owotiri shini oteyi koda ko Owuso naka gboza kepwo lo; owotiri shini ona gbonya oye kpokponu, ona gbotumene, na wase ni ya kwiyinu, ona ka wase ni ya yoza waya lo, na wino zogboga ole nu, na gishi ko foza. 3 Onaka wino gwinyi lo, naka wino gbapwo lo, ona wine ko otumene, ona ka wino yimu kikwiri lo. 4 Owotiri shini ona wase ni gishi ko byole nu neneshi kweyi ayi nu ba geyagye danu. 5 Owoni ase gishi ko byole nu neshi lo, oya yamoji ya yiyi kwo oda ko Owuso? 6 Onaka wase ni wa pepe ipu kotuse ni lo, lalo oya zikweyi iso kweyi ya gbo byoni ibiri gbo ni. 7 Ona gbiye neshi ebe kawase ni boda ko Owuso lo ni, lalo oya gbowuru kweyi eda kibiri ya yo kwu.

8 Mamani, awoyoko ipu koda ko Owuso na wawine kotu neshi ki gbo okwokwoshi; ana ka wawo gwinyi ya kwe awino yimu ki kwiri lo. 9 Ana byo kwokwoshi kotuse ni Owuso sayi daha ni kpotu oye kponu. 10 Ana muwa ma ome, owoni are, ana yuwa na yoko. 11 Mamani anya wa, owotiri shana wawine kotu neshi, anaka wawo lokwunu agye lo; ana kwiyiwa kweyi na yo kwokwoshi ipu kojoji. 12 Owotiri shini ino yoko ipu koda ko Owuso na gbonya oye kpokponu, kweyi na gishi ko byayi kpo ole nu neneshi. 13 Awoyoko ni yoko wa neshi, arogwa kabokpa diyiwa kweyi gbokwunu ko kela ikweyi kotuse wa ipu ko Okristi Oyesu.

14 Nyya tokpa mani dawo kpotuse mo nyya wa mo kwekwekwe mani. 15 Owoni nke wa papa lo, okpa mani ya shawo oza ko yoya ipu kipwoma ko Owuso, ni woda ko Owuso ine kolayi, anu ni wi ite kpo otu kokwokwoshi ni. 16 Ashishe ya gege ya tawashu koza ni Owuso sayi daha ni lo:

Obose ese ipu kikpiye kasuse,

Omaku ko Owuso sayi nu mo Owase neshi,

kweyi ayoleho ko Owuso mo.

Atono kela Nu okpagye wonyonya,

asuse kyogwu kpanu ipu kese kpiri,

kweyi azo giso.