1 Omaku ko Owuso ka daha tiriri mokweyi kese mani ashini kase ba wa shotuse wa bita; aba wa geyagye domaku kokame kweyi ba gboso ozafofu kawomaku bibi. 2 Ozafofu mani ya gyehe ebebe nya bwokwunu kawo kokame ko gyasegya, awase ni otu wa gekwu byayi yola kpogye ni shola ni. 3 Awase mani ba foza kamo onya ko gbogbo wozalabi, aki wobi ko rozarore shishini. Owuso ke yawoza oni ko rore la, ishini awogboso ni gyo kwokwoshi ni tinarigwu ko shotunehe. 4 Oza kpiri ni Owuso ya ni shoshi; ojije wako tela lo, owoni anyojoji kpi inarigwu ko shotunehe, 5 ikweyi koni ela ko Owuso kpi inarigwu yo gbepwo lo.

6 Owoni ala kela mani da awogboso, ala ba wayole neshi ko Okristi Oyesu, byoni ala ba roza komaku ipu kela kotuse kpo ozafofu kokwokwoshi ni ala gboso ni. 7 Ka rema ka asa kokame kpigwu yeye lo, oya yase ya gyo Owuso lo. Abishi koni, ala fiyikala owe ko Owuso. 8 Owoni atola kikpiye ogboko gbayayi, owoni ake tola ko Omaku ogboko owe wonyonya, ikweyi koni oya dase olayi anani okyi ya dase olayi ni ya wa ni. 9 Ela mani wokwokwoshi la ni ananoho shu ko kyogwu kpa anu ni. 10 Aba takirikwu ba yoko kotata, ikweyi koni atotuso Owuso ine ko olayi, anu ni wino ngmase kpiri, otata wawase ni kyogwu kpanu ni.

11 Ala fuwo oza mani kweyi kada ananoho mana ya mani. 12 Ka yashishe na monye koni owi isongo ni lo, ke woza ni awogboso ba gbawo ebe kela koka wo, ebe koza yoya wo, ebe kimu yoya, ebe kotuse kpo yagye gyogye. 13 Ome nawa, zishi wo ya kokpa ko Owuso ebe kogbayi kasuse, tono kela nu kyi fuwa. 14 Ka yeshi ni Omaku dawo ni yi tonu lo, eshi ni Omaku dawo ishini awobane kela kweyi awanyakwase ko oda ko Owuso sabo eyi ni. 15 Yoza mani kweyi zishi wo dawa, shini ase kpiri na mo gohobu ko oko wo. 16 Gbera kpiyo kpozafofu wo. Gohobu ko yawoza mani, oya ngmiyo kin lalo kawase ni ba pwela wo ni.