1 Macigi ma̱ va̱ vi ta̱ n tsuloboi,

a̱shi a̱ nu i ta̱ tsu a̱shi o moɗoi punu upali.

ka̱nji ka̱ nu ki ta̱ tsu ushiga wu nraɗika

u na wi a̱ kugida̱la̱ a kusan ku Giliyadu.

2 Anga a̱ nu i ta̱ wa̱ri buga̱-buga̱

tsu ushiga wu nkyon n na a̱ sumba̱i,

a takpai sararai ra̱ka̱ vu le i ta̱ ugeri,

yaba dem m gbaɓi vi ni,

ko vuza wi endeꞋin ba.

3 Nla̱ba̱ mu una̱ u nu ushili pa̱za̱za̱

adanshi vu sura ta̱ ili i shili,

una̱ u nu ili i maluwa i ɗa,

o yotsongi nla̱ba̱ mu una̱ u nu,

nguji n nu a kutasa

tsu kucina̱ ku umaci u ruman.

4 Kuɗeku ku nu ki ta̱ an kumaꞋa

ku ugaɗi ku Dawuda,

ku na a maꞋi n tsuloboi,

idolu yi ta̱ ugeri uka̱ra̱Ꞌi

e kuɗeku ku nu,

tsu n nra̱ga̱ ka̱kpa̱n,

ra̱ka̱ vi le nra̱ga̱ mo ovonshi a ɗa.

5 Mani ma̱ nu mi ta̱ a na nreꞋe n re

a na mpeshe mu nreꞋe,

a kalina punu apulufa.

6 Ali kayin ka asa

ubuta̱ dem wu akana,

mi ta a kubana a kusan ka̱ Muru

n kaginda ki ili i ma̱gula̱ni.

7 Vu gaꞋan ta̱ macigi ma̱ va̱,

ili i gusa̱ wu a ikyamba i nu ba.

8 Ta̱wa̱ nu mpa a Lebano, vuka vu savu vu va̱,

tsu waluka koɓolo a Lebano.

Gida̱la̱ a̱ kuta̱wa̱ ɗe a kaginda ka Amana,

ɗe a gaɗi vu Seru, n gaɗi vu Hamonu,

ɗe e kpenle ki ikawu

n kaginda ka na a̱kunzu o ci yongo.

9 Vu uwa ta̱ a̱ ka̱ɗu ka̱ va̱,

vutaku vu va̱, vuka vu savu vu va̱,

n kindi ku a̱shi a̱ nu

vu uwa ta̱ a̱ ka̱ɗu ka̱ va̱,

n vudolu vu te vu kuɗeku ku nu.

10 N yiɗa̱i n kugisanku n ucigi u nu,

macigi ma̱ va̱ vuka vu savu vu va̱,

n yiɗa̱i a kugisanku uyoꞋo wu ucigi u nu

u na u laꞋi ma̱kya̱n uyoꞋo,

n yiɗa̱i a kugisanku ili ma̱gula̱ni i nu

i na i laꞋi ili i ma̱gula̱ni ra̱ka̱ ma̱gula̱ni.

11 Nla̱ba̱ mu una̱ u nu n uyoꞋo ci ishigi,

vuka vu savu vu va̱,

mani n ishigi yi ta̱ e kelentsu ka̱ nu.

ma̱gula̱ni mo ntogu n nu

a na ili ma̱gula̱ni i Lebano.

12 Avu kashina kaꞋa ka na a kanzai adama a̱ va̱,

macigi ma̱ va̱ vuka vu savu vu va̱,

a̱shi a̱ mini a na a kanzai,

a̱shi a̱ mini a na a̱ sa̱nka̱i yaba dem.

13 Mere ma̱ nkuta̱ n nu kashina ki ta̱ punu,

tsu kashina ka Adini

n umaci wu nɗanga u singai,

ka umaci u ruman mu uyoꞋo

n ili i ma̱gula̱ni mu uyoꞋo tsa ma̱jigi n nardi,

14 Nardi n safaron,

kalamusu n sinamon,

n icuꞋu yi nɗanga i na i ci neke ma̱gula̱ni dem,

m Muru n alosu,

n ili i ma̱gula̱ni i na i laꞋi m ma̱gula̱ni.

15 Avu a̱shi a̱ mini a ɗa a na i e kuneke mini a kashina ka,

kuɗolu ku na ku ci neke mini ma wuma,

mana mi e kuyene a Lebano.

16 Ɗa̱nga̱, wunla̱i wu uɓongaɗi,

ta̱wa̱ wunla̱i wu uɓonɗakai

vu uvula̱ kashina ka̱ va̱,

tsu na ma̱gula̱ni ma̱ kimba̱i a̱ ubuta̱ dem.

yaꞋan macigi ma̱ va̱ ma̱ ta̱wa̱ a kashina ka̱ ni,

u lyaꞋa umaci wu nɗanga u na u laꞋi n uyoꞋo.