1 N ta̱wa̱ ta̱ a kashina ka̱ va̱,

macigi ma̱ va̱ vuka vu savu vu va̱,

n ɓolongu ta̱ Muru vu va̱ n ili i wali i va̱.

N lyaꞋa ta̱ kabashi ki ishigi n ishigi i va̱,

ɗa n soꞋi ma̱kya̱n koɓolo n mani.

a̱ɗa̱ na yi a maciganai

lyaꞋi i soꞋo ali ma maka ɗa̱ n ucigi u ɗa̱.

2 N lata ta̱ ama ka̱ɗu ka̱ va̱ ki ta̱ wuma.

Zuwa atsuvu, macigi ma̱ va̱ mi ta̱ a̱ kuka̱la̱ utsutsu.

<<Ɓa̱yuwa̱ ka̱ mu kamana ka̱ va̱,

macigi ma̱ va̱, moɗoi ma̱ va̱,

vuza babu unushi u va̱.

Kaci ka̱ va̱ ka̱ ta̱na̱ ta̱ n ciza,

ka̱nji ka̱ va̱ ka̱ ta̱na̱ m mele.>>

3 N foɗo ta̱ ɗe akashi a̱ va̱,

ka̱ta̱ n doku n uka a ɗa?

N saꞋa ta̱ ene a̱ va̱,

ka̱ta̱ n doku n la̱nga̱sa̱ a ɗa?

4 Macigi ma̱ va̱ ma uwaka ta̱

n ekiye a̱ ni a̱ katusu ku utsutsu,

ɗa ka̱ɗu ka̱ va̱ ka̱ ka̱na̱i mali ma̱ ni.

5 Ɗa n ɗa̱nga̱i adama a na m ɓa̱yuwa̱ka̱ macigi ma̱ va̱,

ekiye a̱ va̱ cepepe m maniꞋin ma Muru,

a̱jivu a̱ va̱ a̱ kuɗa̱kpa̱ m maniꞋin ma,

a na n ka̱na̱i a̱ka̱na̱tsu a utsutsu a.

6 M ɓa̱yuwa̱ka̱i macigi ma̱ va̱ utsutsu,

ama macigi ma̱ va̱ ma laza ɗe.

Ɗa ka̱ɗu ka̱ va̱ ka̱ na̱mgba̱i

adama a na u laza ta̱.

n la̱nsa̱i ni ama me ene yi ba.

n ka̱na̱i kuɗekushe yi ama wu ushuku ba.

7 Aza a kindi a gasai nu mpa,

a makyan mana i a̱ kubana n obonoi a̱ likuci,

ɗa a lapai mu, a yaꞋankai mu usa̱n,

ɗa a isai mu kalaba,

aza a na i a kinda a mashilya ma nanlo.

8 A̱ɗa̱ n kere n Urushelima, kucinakai mu,

ɗa baci yenei macigi ma̱ va̱,

yiɗa̱i ya ku dana yi?

Danai ni n lima̱ ta̱ adama ucigi u ni.

9 Avu na vu laꞋi n tsuloboi a̱ ka̱tsuma̱ ka̱ a̱ma̱ci,

Yiɗa̱i i zuwai ɗa macigi ma̱ nu ma laꞋi yaba dem?

Adama a̱ n yiɗa̱i vu danai tsu,

tsu dana yi uteku tsu na vi a kupana?

10 Macigi ma̱ va̱ mi ta̱ n tsuloboi

m ma̱ta̱na̱ n katsura kpamu,

n atakaci a ɗa a̱ kuciya̱ vicuꞋu vu ni vu te

a̱ ka̱tsuma̱ ka uma a̱kpa̱n kupa (10,000).

11 Ka̱nji ka kaci ka̱ ni a kutasa tsu azanariya,

ka̱nji ka̱ ni ulima̱ a kutasa tsu kagawun.

12 A̱shi a̱ ni wa̱ri pu tsu mani

tsu moɗoi ma̱ a̱ri,

a̱ ka̱kina̱ ko kuɗolu.

13 Aguji a̱ ni a na kashina ki ili wali,

a ku utuka̱ n ma̱gula̱ni.

Nla̱ba̱ mu una̱ n ni, mi ta̱ tsu a̱pa̱lu

a̱ kuɗa̱kpa̱ maniꞋin ma̱ Muru.

14 Ekiye a̱ ni i ta̱ tsa alangu azanariya

a na a ukai atali a singai.

ikyamba i ni yi ta̱ ugbori an kanga ka kagiwa,

ka na a kalai n atali a Safaya.

15 Ene a̱ ni ita̱ a na ashamkpatsu,

atali a alabasata,

a na a̱ shikpa̱i e enle azanari.

Iyoci i ni yi ta̱ an Lebano,

vu na vu laꞋi n tsuloboi,

tsu maɗanga ma Sida.

16 Una̱ uni wi ta̱ n uyoꞋo,

ili i ni dem yi ta̱ n ugaꞋin.

ta macigi ma̱ va̱, ka̱ja̱Ꞌa̱ ka̱ va̱ ki nannai

a̱ɗa̱ nkere n Urishelima.